Etiketa Artxiboak:Gerrans

2010eko taldeen analisia (IX): Sky, Tourra irabaziko duen Ingalaterrako lehen taldea

Sky taldea

Ingalaterrak elite mailako talde indartsu bat sortu asmoa zuen aspaldian eta talde hau Sky Team izango da. Talde berria da dakizuen bezala eta helburu nagusia 5 urteren barruan Tourra irabaztea du. Babeslea Sky Sport telebista britainiarra izango da nagusiki eta 34 milioi euro inguruko aurrekontua du. Esan dutenaren arabera, 2013 arte ziurtatua izango dute babesgoa.

Tourra irabazteko asmo hori dela eta, aurtengo helburu nagusiena Tourrerako gonbidapena lortzea izango dute. Horretarako lehen pausua eman zuten Wiggins britainiarraren fitxaketa eztabaidatu harekin. Wigginsek 4. postu ikaragarria lortu zuen iazko Tourrean eta horrek gonbidapena lortzeko bidea erraztuko dutelakoan dira. Wiggins izango da taldeko txirrindularirik garrantzitsuenetakoa, baina aurtengoan, Tourrean parte hartzeko gonbidapena lortuko balute ere, ingelesak Giroa du helburu.

Baina esan bezala, talde bikaina osatu dute ingelesek. Beste fitxaketetako bat Boasson Hagen norvegiarra da. Txirrindulari honek erakustaldi bikainak eman zituen iaz eta aurtengo urteari ere bikain ekin dio: Omango Tourrean bi etapa garaipen eta Qatarrekoan beste bat, nahiz eta azken hau taldeko erlojupekoa izan.

Aurreko bi txirrindulariekin batera kontutan hartu beharreko beste txirrindulari garrantzitsuak aipatzearren, ezagunak zaizkigun Arvesen, Gerrans, Lövkvist eta Flecha aipatuko nituzke. Arvesen-ek iaz garaipenik lortu ez bazuen ere, Norvegiako txapelduna da eta langile bikaina. Gerrans-ek 2009 denboraldi bikaina burutu zuen, besteak beste Giroan eta Vueltan etapa garaipenak lortuaz. Klasikoetan ere lehen hamar postuetan sailkatzen ere ederki daki australiarrak eta aurten ere berdin arituko dela iruditzen zait. Tropeleko 2010eko egutegiko klasikoei dagokionez, kontutan hartu beharreko txirrindularia.

Lövkvist, Boasson Hagen bezala, Columbia-High Road taldetik etorri dira Sky taldera. Suediarrak ere maila duela ederki erakutsi zigun talde zuri-horian iazko Giroan, taldekako erlojupekoa irabazi eta 5 egunez lider izan zelarik.

Flechak iazko urtera arte Rabobanken aritu zen. Ez dakigu beragatik ala taldearengatik izan zen, baina egia esan iaz ez zuen garaipenik eskuratu. Izen handiko txirrindularia da eta ikusi beharko da talde aldaketa honek mesede egingo dion ala ez.

Bukatzeko, taldearen promesa izango dena aipatu nahiko nuke: Kennaugh. 20 urteko ingelesa pistan ere aritua da eta iaz maila bikaina erakutsi zuen. Aipagarriena 23 urtez azpiko munduko txapelketan lortutako 4. postua. Aurtengo urtean zail ikusten dut aurrealdean ikustea, baina neurria ondo hartzen badio elite mailari, kontutan hartu beharko genuke izen hau.

Talde ingelesa puntan ikusiko dugula iruditzen zait bere debut urtean, batez ere Giroan nire aburuz.

Gerrans Bolognan nagusi

Gerrans. 14. etapan garaipenaBazirudien gaurko etapak sailkapen nagusian zalaparta eragingo zuela, baina LRP taldea 12. kilometroan osatutako ihesaldiak jokoz kanpo harrapatu du. Ihesaldi horretan zen australiarra eta Bolognako 2,1 kilometrotako igoeran ihesaldiak zuen errenta eta gordeta zituen indarrak nahikoa izan ditu Cervélo taldeko txirrindulariak etapa garaipena eskuratzeko.

Eguneko ihesaldia 12. kilometroan osatu da. Montaguti, Gavazzi, Petrov, Vorganov, Reda, Bertogliati, Gerrans,Grivko, Visconti, Deignan, Cheula, Froome, Kiryenka eta Bonnafond txirrindulariek osatu dute LPRri horrenbesteko buruhaustea sortu dieten taldea. Taldeak izan duen errentarik handiena 4’38”koa izan da. Atzetik, tropelean LPR taldeak hartu du erantzukizuna eta bukaeraraino iheslariak harrapatzeko saiakeran izan dira. Beharbada taldea juxtu samar ibili da Di Lucak bi taldekideren laguntza bakarrik izan baitu, Spezialetti eta Bosisiorenak. Emaitza, beraz, egindako ahaleginaren parekoak izan direla deritzot. Di Lucak segundoak eta maillot arrosa berreskuratzeko zituen gaurko asmoak Bolognako kaleetara iristean erabat zapuztuta geratu zaizkie.

11 txirrindulari ziren ihesaldiko tropeltxoan Bolognara iristean. Oraindik maldak hasteko zirela, Grivkok bere saiakera egin du baina maldak igotzen hasi denean ezinak gailendu du ukraniarra. Ondoren Gerransek, zalantzarik gabe biziago eta pedal kolpe iraunkorragoz, aurrera egitea lortu du Froomen baimenarekin (ikustekoak 1kmko pankartapean egin dituen zig-zag mugimenduak). Helmugan Gerrans, Bertogliati eta Gavazzi izan dira urrenez urren.

Etapa garaipena erabakita zegoenean faboritoen mugimenduak hasi dira atzealdean. Killerrak aurrez pentsatutako erasoa jo du baina alferrik izan zaio Menchov, Pellizotti eta Garzelli atzetik izan baititu. Hala ere gain saririk gabe geratu da Di Luca eta faboritoen artean ez da nabarmentzeko denbora tarterik izan.

Di Lucak sailkapen nagusian aurrera egiteko egun bat alferrik galdu duela esan daiteke. Bestalde, Basso, Sastre eta Leipheimer justu samar ikusi ditugu. Menchov, berriz, maillotaren defentsan bikain aritu da.

Gaurko bajak

Giok bere iruzkinean aipatzen zigun bezala, gaurkoan bi txirrindulari garrantzitsuk lasterketan uztea erabaki dute. Bat Pozzato izan da belauneko minez zela eta. Bestea, berriz, hiru garaipen eskuratu dituen esprinter ingelesa, Cavendish. Esaten genuen bere asmoa Tourra prestatzea zela eta segur aski ez zuela Giroa bukatuko. Egin beharrekoak egin dituela esan daiteke.