Badirudi gaurko etapan talde guztiak elkarri begira geratu direla ea nork hartuko erantzunkizuna.
Bai, ez dago lider garbirik, eta taldeek ez dute behar baino indar gehiago xahutu nahi. Ondorioz, ia ordu erdiko atzerpenarekin iritsi da tropela helmugara, 29 minutu eta 57 segundura, eta lider berria dugu: Oscar Pereiro. Ni behintzat zur eta lur geratu naiz. Beharbada taldeek egoera kontrolpean izango dute, baina bost lagunek tropelari honenbesteko aldea ateratzea… Motorretako kronometratzaileak ere gaurkoan ederki aspertu dira tropelaren zain (Ikusi argazkia).
Faboritoen arteko diferentziek txikiak izaten jarraitzen dute, beraz, badirudi, gaurkoak hauentzat ondorio larriegirik ez duela izango.
*** Tropela.net ***
Ez dakit patatinek gure lasterketa irabaziko duen, baina jada 9 etapa daramatza lidertzari eusten. Bejondeiala! Baina kontuz, vegeta eta beste zenbait hautagai indartsu ari dira gerturatzen eta ikusi egin beharko da azken aste honetan zer gertatzen den. Gainera gure liderra Alpeetara indarrez juxtu-juxtu iritsiko delakoan naiz.
Gaurkoan atxi70 bergararra izan dugu garaile nahiz eta eskasius zarauztarrarekin puntuz berdinduta izan iritsi den. Dakizuen bezala, kasu hauetan kiniela lehenago gorde zuenak du lehentasuna, beraz, Dionio Galparsororen maillota atxi70rentzat izango da. Zorionak honi ere!
Gaur bai, gaur azkenean Tour honetako oilarrek beraien indarrak erakutsi dituzte eta nahiz eta beraien artean eraso bortitzik ez den egon, etapa luzea eta gogorra gertatu denez azkenerako indartsuenak geratu dira buruan. Atsedenerako tarte gutxi zegoen eta tarte horietan, ordea, lasterketa ez da mantsotu. Hasieran Ag2r-ek maillot horia defendatu nahi zuelako, T-Mobilek gero, lasterketa gogortu nahi zuelako Klodenen mesederako eta bukaeran Rabobank-ek, Menchov-entzat lana beltz eginaz, uneoro erritmoari eutsi diote eta azken maldara iristerako (Pla de Beret suabea dela diote) txirrindulariak pixkanak erortzen joan dira udare helduak zuhaitzetik bezala. Azken malda igotzen ari zirenerako dozena bat besterik ez ziren geratzen, talde gutxi ziren bi txirrindulari zituztenak eta zoragarriena, inork ez genekien nor zen indartsuena. Beraien artean ere ez.
Tropeleko lasterketa bizi doa. Azken 5 etapetako sailkapen nagusian patatin zumaiarra buruan izan da eta lasterketa buruari eusten dio. 
2002an joan ginen Jon Gonzalo lankidea eta biok Tour-era, irratiak bidalita. Pirinioetako etapa batera joan, eta zaletuekin egon behar genuen, bertako giroa jasoz.
Eguraldi txarra dela eta gaurko eta biharko aurrikusita zeuden grabaketak bertan behera geratu dira. Ondorioz, bihar, uztailak 12, estrak Lizarraga mendatera gerturatzeko autobusak ere ezerezean geratzen dira.