Kategoria Artxiboak:Lehiaketak

Bukatu da Giroa. Basso erraz nagusitu da eta gurean ere, Tropelean, badugu irabazlea. Aurtengo Giroko irabazlea nini zarauztarra izan da eta bere atzetik podiumean enekinskw donostiarra eta iker ikaztegietakoa izan dira. Behean daukazue aukeratu behar zen talde perfektua. Irabazleak talde horretako zortzi txirrindulari zituen (* ikurrarekin markatuta) eta beste zazpi txirrindulariak ere ez zaizkio herren geratu. Guztira, 6630 puntu. Informazio gehiago nahi izanez gero badakizue sailkapenetan edozein erabiltzaileren izenaren gainean sakatuz bere kiniela eta bestelako informazioa ikus dezakezuela.
Talde perfektua (aukeratu behar zena):

BASSO, Ivan (1594) *
SAVOLDELLI, Paolo (757) *
GARATE, Juanma (519) *
PELLIZOTTI, Franco (411)
BETTINI, Paolo (770) *
POLLACK, Olaf (460)
McEWEN, Robbie (435) *
FORSTER, Robert (215)
VILA, Patxi (196) *
FDEZ. DE LARREA, K. (95)
GUTIERREZ, J. Enrique (1152) *
SCHUMACHER, Stefan (478)
PIEPOLI, Leonardo (477) *
CASAR, Sandy (260)
VAITKUS, Tomas (260)

Ez dakit zenbagarren bukatu duzuen baina lasai, hau beroketa besterik ez da izan. Frantziako Tourra berehala izango dugu hemen eta hor erakutsi behar du norberak bere talentua eta forma!!
Zorte on guztioi!

Oraindik biharko etapa gelditzen bada ere, aurtengo Giroaren balorazio orokor bat egiteko moduan gara. Hasiera batean ibilbideak ikuskizun handiak ikusteko lagungarri izango zela ematen bazuen ere, gizon batek, Ivan Bassok, beste guztiengan erakutsi duen nagusitasunak hori ekidin du. CSC taldeko txirrindularia beste guztien gainetik izan da, bai erlojupekoan, bai mendian. Nagusitasun ikaragarria erakutsi du, horrek zaleentzako azken urteetako Girorik “lehorrena” ikustera eraman gaituelarik.

Giroa hasi aurretik aipatzen ziren 5 faborito nagusiek jarrera desberdina izan dute. Esan bezala, Ivan Basso denen gainetik ibili den Giro honetan, Simonik bere urteak gora joan arren neurri polita eman du. Aldiz, Savoldelli eta Cunegori aldapa gora hasten ziren bakoitzean puntu bat falta zitzaiela ikusten zitzaien eta Di Lucari berriz puntu bat baino gehiago falta izan zaio. Azken honena izan da agian ezustekorik handiena, txarrera noski, denboraldi hasiera guztia itzuli honetara bideratua baitzuen eta ez du lortu iazko Danilo Di Luca handiaren hanka azpira iristerik. Continue reading “Nagusitasun osoa”

Txirrindularitzaren alde ilunaz askoz gehiago hitz egingo den aste honetan, Tropela Elkarteak ez du iritzik plazaratuko informazio nahikoa eduki artean. Nahikoa denbora izango dugu gero ere horretaz jarduteko. Kirol arlo hutsari dagokionez, Leonardo Piepoli txikiak bere garaipenen zakua betetzen jarraitzen du. Bere zuzendariak esan duenez italiarrak ez zuen Giroan parte hartu nahi baina begira azkenean nola atera zaion…
Simonirekin podioa eskura dute, Piepolirekin bi etapa irabazi dituzte eta gainera, egun hauetan, Kataluniako Volta ere irabazi du Saunier Duvalek David Cañadarekin. Guzti honi, Gomez Marchantek Euskal Herriko Itzulian lortutakoa gehituz gero, denboraldi ikusgarria!

Basso jaun eta jabe azaldu zaigu orain arte. Bai ikusi den mendate apurrean, bai erlojupekoan (bakarka eta taldeka) denen gainetik dela argi erakutsi du. Nahiko izango al du bere lehen itzuli handia poltsikoratzeko? Ni baiezkoan naiz, nahiz eta ibilbide beldurgarri baten aurrean gaudela ez dudan ahazten.

Bere atzetik direnei tokatzen zaie orain aurpegia ematea. Azken porturarte gurpilean joanda ezin dute denbora ikaragarririk irabazi eta arriskatu beharrean izango dira. Euren pertsonalitatea erasokorra dela gehituz gero, Cunego, Simoni, Savoldelli, Di Luca edota Rujanok ikuskizun polita eman dezaketela uste dut. Continue reading “Hemen da mendia!!!”