Kategoria Artxiboak:Lehiaketak

Mendiarekin bigarren kontaktua izango dute gaurkoan Italiako Giroko txirrindulariek. Monteverginen amaitu zen etapa baino bukaera gogorragoa du, ia 9 kilometro dituen eta %8ko bataz besteko aldapa igo beharko baitute.

Falta diren mendiko etapak kontutan hartuta zaila da gaur Giroa erabakita uztea (hori Armstrongek eta iaz Bassok bakarrik egin dute aspaldian) baina ziur Giro hasieran hautagaien artean zeudenen arteko izen zerrenda murrizten dela. Monteverginen oso indartsu agertu ez ziren batzuk, Popovych edo Savoldellik adibidez, aste honetan beroien sasoi-puntua hobetu ez badute agur esan diezaiokete Giroan izan ditzaketen aukerei.

Bestalde, euskaldun batek “maglia rosa” jazteko aukera izan daiteke. Noski, Patxi Vilataz ari naiz, nahiz eta Cunegoren aldeko lanean jarraitu beharko duen eta Bruseghin edo Arroyok ere beroien aukerak izan baditzakete ere.

Etapa garaipenerako Perez Cuapiogatik apostu egingo nuke, sailkapenean atzean egonik ez delako, momentuz behintzat, goian daudenen arerio zuzena.

Giroaren hasiera irla baten izan eta berorrek dakarren tokialdatzearen ondorioz segituan dugu aurreneko atseden eguna, eta hurrengo egunean aurreneko “mendiko etapa”. Kakotx artean jartzen dut, etapa esprinterrentzat ez den arren ez delako agian aproposena mendi gogorragoetan ikusiko ditugun protagonista berberak ikusteko.

Mendiarekin aurreneko kontaktua izateko etapa polita iruditzen zait. Mendate luze baina ez hain gogor honetan eskalatzaile petoak ez direnek beren aukera izan dezakete etapa garaipena lortzeko. Hau esatean Rebellin edo Bettini bezalako txirrindulariekin gogoratzen naiz, bigarrengoak osteguneko etapa aproposagoa baldin badu ere eta ziurrenik ez den sartuko Montevergineko etaparen lehian.

Momentu aproposa baita ere hain ondo dagoela esaten duten Riccardo Ricco gaztearen benetako sasoi puntua ikusteko. Eta ezin ahaztu Di Luca edo Cunego (hemen helmuga izan denetan, azken bi irabazleak berauek izan dira) bezalako txirrindularietaz ere. Aipatutako 5 txirrindulari hauek izan behar lukete hautagai nagusienak.

Hurrengo egun batzuetarako uzten ditut Simoni, Piepoli, Savoldelli edo Popovych bezalako txirrindularien aukerak. Ez dut uste bihar sailkapen nagusiari begira ikaragarrizko borrokarik izango denik baina ziurrenik izango dugu sorpresatxoren bat eta askoren ahotan dagoenen batek segundu garrantzitsuren batzuk gal ditzake. Bihar hautagai nagusiren batek minututik gorako kaltea jasotzen badu oso seinale txarra izango da, ez bait da inondik ere diferentzia ateratzeko bezalako mendatea. Asko bustitzea izan badaiteke ere Popovych izan daiteke sorpresa negatiboa eman daitekeena. Hau esan eta gero eskuak goian dituela helmugan sartzeko kapaza da baina…
Eman zuen aurreikuspenak eta gozatu etapaz.

Gaur hasi da 2007ko Italiako Giroa. Azkenean 2832 kide izan gara kiniela egin dugunok, iaz baino kide gehiago. Zorionak guztioi!

Lehen etapa taldekako erlojupekoa izan da. Nagusi Liquigas taldea izan da pronostiko guztien aurka eta Euskaltel taldea azken postuan sailkatu da. Bagenekien talde apala zeramala talde euskaldunak eta inoiz ez dela izan taldekako erlojupeko etapetan nabarmendua, ez eta ere bere garairik onenetan ere. Ni behintzat ez nau harritu.
Gogoratu taldekako erlojupeko etapak Tropeleko lehiaketetan ez direla puntuagarri, beraz, ez larritu punturik batu ez baduzue gaurko etapan! Hori bai, bihartik aurrera komeni da puntuak batzen hastea Atxaspi Hoteleko asteburu hori irabazi nahi baduzue.

Faboritoei dagokionez, Di Luca dugu aurreneko postuetan, 13 segundotara Savoldelli, 42ra Cunego eta minutu t’erdira Simoni, Iban Mayoren taldekidea. Saunier Duval-Prodir taldea ez da fin ibili gaurko erlojupekoan. Ikusiko dugu hurrengo etapetan zenbaterainoko eragina izango duen faboritoen artean gaurko etapak.

Jada gutxi falta da Italiako Giroa abiatzeko, beraz, baita kinielak egin eta errepasatzeko epea ere!

Tropela Elkarteak esfortzu handia egin du lehiaketa honetan sariak jarri ahal izateko. Ohiko laguntzaileen artean Atxaspi Hotela izan da 2007ko Giroko Tropeleko lehiaketan saria eskaini duena. Beraien eskutik asteburu zoragarri bat bertan igarotzeko saria izango da 2007ko lehiaketako irabazlearentzat. Gure eskerrik beroenak Atxaspi Hoteleko adiskideei!

Lehiaketaren inguruan iritzi asko plazaratu dira bai txirrindulari zerrenden inguruan, lehiakideen gehien aukeratutako txirrindularien portzentaiak argitaratzearen inguruan… Denak izango ditugu kontuan, baina garbi dagoena zera da: lehiakide guztiok dituzue aukera eta informazioa eskuragai, baldintza berdinetan.

Zorte on guztioi!

Larunbatean hasten zaigu Italiako Giroaren 90. edizioa. Garai honetan txirrindulari desberdinen sasoi puntu eta helburuek izan behar zutenean denen hizpide, Puerto Operazioak eta batez ere bertan Basso egoteak ekarri diezaiokeen zigorrak hartu dute indarra. Hain karrera garrantzitsu baten aurretik gai nagusia hori izateak alde batetik pena ematen didan arren, errudunek euren zigorra bete beharra dute, eta hori momentuz Bassori tokatu zaio, nahiz eta geo eta argiago izan Discoverykoaren ondoren beste txirrindulari batzuei (oso ezagunak gainera) tokatuko zaiela.

Kirol arloari begiratuta, urtero bezala ibilbide ikusgarria aukeratu dute antolatzaileek, nahiz eta beti izaten diren gustuko ez ditudan puntutxo batzuk (aurreneko atseden eguna hain azkar, Briancongo etaparen ondoren erlojupekoa izatea, Zoncolan edo Tre Cime Lavaredoko azken mendateak etapa guztia blokeatu dezakeela…). Aurkitu daiztezkeen erru eta guzti, urtero urtero ibilbide zoragarria izaten dugu Italiako errepideetan. Garbi dagoena da mendateetan ondo ibiltzen direnentzako ibilbidea dela eta aukera gutxi uzten duela euren aukerak erlojupekoan izan ditzaketenentzat.

Hautagai nagusienei begiratuta, lehiaketan multzo horreta jarri diren Simoni, Cunego, Savoldelli eta Di Lucaren arteko borroka izan daitekeela uste dut. Hala ere, proba denetan gertatzen den gisa, beti agertzen dira inor gutxik esperotako txirrindulariak, Rujano duela bi urte edo iaz Q. Gutierrez (ay, ay Eufemiano, ez zara txarra!!!) bezala. Aurten ere egon ziur norbait “berria” agertuko zaigula eta hori asmatzean egon daiteke lehiaketa irabaztearen giltza. Continue reading “Italiako Giroa eta lehiaketa”