Kategoria Artxiboak:Lehiaketak

Ekin diote txirrindulariek Londreseko kaleetan zehar prologoari. 7,9 km izango dira 2007ko Tourreko lehen liderra erabakiko dutenak. Laister jakingo dugu nork jantziko duen aurtengo lehen maillot horia.

Tropelan ere hasi da gure lasterketa. 6.414 kiniela egin dira, baina arauei jarraiki, Tropela Elkarteak, arauak betetzen ez dituzten kinielak baliogabetuko ditu eta horren ostean ikusiko dugu benetako kinielak zenbat diren. Hala eta guztiz, inoizko markarik onena lortu dugu guztiok eta zorionak eman nahi dizkizuegu parte hartu duzuen guztioi. A ze tropela osatu dugun!!

Gozatzeko garaia hasi da. Orain artekoak prestakuntzak ziren, usteak, iritziak,… baina orain jada hainbeste itxaroten genuen eguna iritsi da eta txirrindulariek duten guztia eman beharko dute. Orain ikusiko dugu zein zebilen zuzen, zein oker, zein joan den Tourrera behar beste prestatuta, zein ez.

Zorterik onena opa dizuegu eta ia lasterketa interesgarri bat ikusteko aukera dugun.

OHARRA: Arauetan jarri genuen bezala arratsaldeko 3etan kinielak egiteko aukera itxi egin dugu. Frantziako Tourra ere arratsaldeko 3etan hasten zen baina Londresen. Hau da, hemengo 4ak zirenean hasten zen. Ordu bete gehiago geneukan kinielak egiteko baina gure aplikazioak ez du hori kontuan hartu eta arauetan jarritako orduan itxi da kiniela egiteko epea.

Tropela Elkartea

Urtero bezala Frantziako Tourrak bere joko arauak ipini ditu, UCIren gainetik. Txirrindulariek sinatu behar duten ditxosozko dokumentu horrekin aurrera eta atzera ibili gara. Eta Tourrak parte hartu nahi zuen oro, dokumentua sinatzera derrigortu du. Honela, txirrindulari guztiek men egin eta dokumentua sinatu behar izan dute, baina ez oso gogo onez. Normala iruditzen zait ez sinatu nahi izatea, baina denak elkartu eta kontra egin beharrean, banan-banan denak pasa dira Tourrak jarritako uztaitik.

Eta orain zer? Bazirudien dokumentuak izugarrizko triskantza eragingo zuela eta ez da horrelakorik gertatu. Tourrera joan diren guztiek sinatu dute, lasterketa guztietako hasierako kontrol medikuak gainditu dituzte eta atzo Tourraren aurkezpen ekitaldia egingo zuten. Continue reading ““Liste des engagés provisoire” ziklistak abiatu arte”

Egun gutxi falta da Londresen 2007ko Frantziako Tourrari hasiera emateko. Pixkanaka pixkanaka txirrindulariak ere Britainia Handira abiatzen ari dira. Horien artean Tropelako partehartzaileen bi euskaldun nagusiak: Haimar Zubeldia (%51) eta Iban Mayo (%40).

Talde laranja abiatu zen beraien autobus berrian. Autobusaz gain, bizikletak ere berriak dituzte. Iban Mayo ere aeroportuan ikusi dugu. Inoiz baino argalago omen doa Tourrera.

Igor Antonengan ere itxaropen handia dagoela dirudi (%35). Atzerago Juanma Garate eta Egoi Martinez daude (%17 inguru), eta beste koska batean Mikel Astarloza eta Patxi Vila (%8 inguru). Tropelakoak ere gustura gaude txirrindulari handi hauen artetik gehienen maillotak sarien artean baititugu.

Orain hemen doa galdera. Zuen ustez nor izango da sailkapen orokorrean lehen euskalduna? Norbaitek etapa garaipen bat ekarriko al du Euskal Herrira? Etapa garaipen batek 125 puntu ematen ditu baina sailkapen orokorrean erregularrena denak, lehen euskaldunak, 100 puntu emango dizkie berau aukeratu dutenei.

Zuen ustez zeinen aldeko apustua egin behar da? Nork aterako ditu puntu gehien euskaldunen artean?

Oraingoz, lehiaketan, %52,2k hartu dute Petacchi, eta oraindik ez dakigu Londresko irteeran izango den edo ez! Zuek ze uste duzue, izango dela? Badaezpada ere, Milram taldeak Volodymyr Dyudya eta Petacchi, bien izenak eman ditu inskripzioetan, badaezpada ere. CONIren epaiaren zain dago. Eta gaur asteazkena da!

Iritsi da aurtengo txirrindularitza munduko hitzordurik garrantzitsuena, Frantziako Tourra. Duela urte gutxi txirrindularitzaren festa zen ekitaldi honek, denborarekin, zalantzez jositako egunak ekartzera ohitu gara. Zalantzak txirrindularien artean nork parte hartuko duen jakiterako orduan, zalantzak mediku kontroletan zerbait gertatuko ote den, zalantzak UCIk agindutako eskutitza sinatzearekin… utz ditzagun zalantza guzti hauek web orrian irekita dauden beste gaietako eta saia gaitezen hemen kirol arloari bakarrik aipamena egiten. Ez da ziurrenik lan erraza izango baina…

Urtero bezala badira Tourra irabazteko hautagai nagusiak. Eta hori berau Tropela Elkartearen porran ederki ikus daiteke. Aditu askok aipatzen dituzten Vinokourov edo Valverde bezalako txirrindulariak dira lehiaketan ere gehien aukeratu direnak. Hala ere, ez nintzateke euren multzo berdinean edo “Beste hautagaietan” dauden beste txirrindulariekin.

Italiako Giroan ez bezala asko dira Tourra irabazteko aukerekin irteten duten txirrindulari eta taldeak. Kasu askotan gainera, talde bakoitzak izen bat baino gehiago ditu sailkapenean goian amaitzeko: Valverde, Pereiro, Karpets Caissen, Vinokourov, Kloden, Kashechkin Astanan, Sastre eta Schleck CSCn, Leipheimer eta Contador Discoveryn… borroka polita ikusi dugulakoan nago.

Joango gara esprinterrak eta eskalatzaileak hobekiago aztertzen baina aurreko etapa 6km ko erlojupekoa dugu? zein duzue hautagai nagusia? Fabian Cancellararen izena aipatu beharrean gara baina lehiaketan zenbatek aukeratu duten ikusi ondoren ez da inongo ezustekoa izango. Gutxiago aipatzen den izen bat esatearren Stefan Schumacherren aldeko botua ere emango dut.

Joan zuen izenak ematen, idatzitako mezu hauetan irabazlea asmatu ezkero, betirako hor gelditzen bait da.