Cancellarak ez du hutsik egin

Cancellara. 2009ko Vueltako 7. etapan garaipenaAssenen motoen zirkuitu batean irabazi zuen Cancellarak eta motoekin konparatze nuen. Gaurkoan F1eko autoak ibiltzen diren Valentziako kaleetatik aritu dira txirrindulariak erlojuaren kontra eta oraingoan ere Cancellarak ez du areriorik izan. 49 km/h inguruko bataz besteko abiaduraz gailendu zaie gainontzeko txirrindulariei eta maillot horia berreskuratu du. Millar eta Grabsch 32 eta 36 segundotara sailkatu dira hurrenez hurren espero bezala.

Gaurko etaparen nondik norakoak espero bezala joan dira. Beharbada eguraldiak batzuri kalte gehiago egin badie ere, orokorrean ez da ezusteko nabarmenik izan. Millar eskoziarrak denbora oso ona jarri du eta denborarik onena izan da Cancellarak bere lanak burutu dituen arte. Bazirudien Grabschek Millarren denbora gaindi zezakeela, baina azkenean 2 segundora sailkatu da alemaniarra.

Faboritoetan lanei ekiten lehena Vinokourov izan da. Kazakhstandarrak zerbait egitekotan gaurko erlojuaren kontrako saioan egingo zukeela pentsatzen nuen, baina ez da hala izan. Berak egin ohi izan dituen saioetatik urruti izan da eta Millarren denbora baino 41 segundo gehiago behar izan ditu.

Mosquera Samuel Sanchezen aurretik ekin dio saioari, baina galiziarra pattal zebilen erlojuaren kontrako espezialista ez baita, eta asturiarrak gainditu egin du. Bazirudien oso ondo ari zela Euskaltel-Euskadiko txirrindularia eta helmugan ere hala izan da. Millar gainditzeko gai izan ez bada ere, 15 segundora helmugaratu da eta faboritoen artean denborarik onena egitea lortu du gaurkoan.

Danielsonek tarteko mugarrietan denbora kaxkarragoak egiten joan den arren, bukaeran Samuel Sanchez baino 3 segundo gehiago behar izan ditu ibilbidea egiteko.

Haimar Zubeldia izan da hurrengoa helmugaratzen eta denbora bikaina egin du usurbildarrak. Aspaldian erlojuaren kontrako saioetan ez dut ikusi hain ondo eta sailkapen probisionalean 10. sailkatzea lortu du Millarrengandik 46 segundora.

Dagoeneko Valverde, Evans eta Bassok zer egingo zutenaren zain ginen. Lehen mugarrian murtziarrak 20 segundo galtzen zituen, 10 australiarrak eta 29 italiarrak. Bigarren mugarrian 23, 23 eta 49 ziren hurrenez hurren. Gaizki, beraz, italiarra. Helmugan azkenean, 33, 30 eta 1’11”. Evansen denbora ez da espero bezain ona izan kontutan izanda bera erlojuaren kontra espezialista dela. Valverde ohiko moduan, eta Basso espero baino askoz okerrago.

Faborito nagusien atzetik, Kiriyenka eta David Herrero bilbotarrak egindako denborak benetan aipagarriak. Errusiarra 14 Millarrek baino 14 segundo gehiago besterik ez ditu behar izan eta bilbotarrak 10 besterik ez. Ikaragarria David Herrerok egindako erlojuaren kontrako saioa eta ondorioz sailkapen nagusian 3. postuan aurkitzen da.

Cancellarak lehen mugarrian ez du denborarik onena egin, baina kilometroak aurrera zihoazen heinean, abiadura handitzen joan da. Esan bezala azkenean helmugan lehen postuan sailkatu da eta Millarri 30 segundo jan dizkio.

Aipatzekoa Bennati eta Boonek egin duten saioa. Bennatik lehen mugarrian denborarik onena egin du Millarrena 4 segundoz hobetuz. Ez genuen espero erritmo horri eusteko gai izango zenik. Ezin jakingo dugu hori zehazki, izan ere zulatua izan du italiarrak eta azkenean Cancellararengandik 1’12”ra sailkatu da. Antzeko zerbait izan da Booneni gertatutakoa eta azkenean 1’02”ko denbora egin du. Denbora bikain honi esker sailkapen nagusiko bigarren postuari eusten dio.

Honenbestez esan Cancellarak ez duela areriorik. Biharko etapan liderraren maillota eramango du baina etzi ez. Vueltan egin behar zituen lan guztiak, beraz, egin dutela dirudi eta ez harritu laster erretiratzen bada. Ez dio axola, bere espezialitatean onena dela erakutsi baitigu berriro ere.

Faborito nagusiei dagokienez, Samuel Sanchezek egin du gaurko saiorik onena eta Bassok txarrena. Sailkapen nagusiari begirada bat ematen badiogu, faboritoetan lehena Evans dela ikusten dugu eta atzeratuena Basso australiarrarengandik 40 segundora. Beste faboritoei begiratuta, berriz, atzeratuena Mosquera dugu 1’40”ra. Ahaztu gabe beharbada kontutan hartu beharko genuke Kiriyenka mendian ondo moldatzen den txirrindularia baita. Hau 5. aurkitzen da sailkapenean, Evansen aurretik 4 segundo gutxiagoz.

Euskaldunetan esperantza pizten dizkiguten bi txirrindulari aipatu nahi nituzke. Alde batetik David Herrero. Gaur egin duen erlojupeko bikainaren ostean sailkapen nagusian 3. postuan baitago. Ez dakit bihartik aurrerako lanetan nola moldatuko den, baina oraingoz bikain dabil. Bestea Haimar Zubeldia dugu. Horner-ek lasterketa utzi ostean eta Vinokourov %100ean ez dagoela ikusita, Astana taldearen lider bihurtu daiteke usurbildarra bere mendiko ezaugarriak kontutan hartzen baditugu. Hala ere kazakhstandarraren baimena beharko du, baina seguru aurrealdean ikusiko dugula.

Bihartik aurrera benetako lasterketa hasiko da. Aitana gainak lehen filtro lana egingo du. Gaurko erlojuaren kontrako saioak sailkapena pixka bat nahastu badu ere (batez ere esprinterrak lehen postuetatik atzeratuz), biharkoan lehen hamabost postuetan beharko du izan Vuelta irabazi nahi duenak. Adi izango gara, zalantzarik ez.

Bai, azkarrena Bozic

Bozic. 2009ko Vueltan 6. etapan garaipenaSorpresa izan da beharbada, baina abisua ere eman zigun Bozic txirrindulari esloveniarrak 3. etapan. Orduan garaipena eskura izan zuela pentsatu genuen, baina indarrez ondo ez zen ibili eta Hendersonek garaipena kendu zion. Gaur ez. Gaurkoan urrutitik jo du erasoa eta erritmoari ederki eutsi dio. Merezitako garaipena.

Esprinterrei gaurko etapa ere esprintean bukatzea komeni zitzaien bihar (erlojuaren kontra), etzi (Aitanako gaina) eta astelehenean (Xorret de Cati) aukerarik ez baitute izango ibilbidea ikusita. Lan gogotik egin behar izan dute esprinterren taldeek batez ere azken kilometroetan baina helburua lortu dute.

Eguneko ihesaldia izan dugu gaurkoan ere. Protagonista izan direna iheslariak Bingen Fernandez eta Aitor Perez Arrieta euskaldunak izan ditugu eta beraiekin tropeltxoa osatzen Pronk eta Lopez Gil. Azken bi hauek atzoko ihesaldian ere sartu ziren eta gaur errepikatu egin dute. Lopez Gilek Euskaltel-Euskadiren onespena izan du ihesaldian sartzeko, eta igandera arte izango bada ere, Aitor Hernandezek atzo lortutako maillota bereganatzea lortu du. Etekina behintzat atera dio Andalucia CajaSur-eko txirrindulariak ihesaldiari.

Helmugara iristeko 24 kilometro ingurura Benjamineko gaina zuten. Ordurako tropelak tarteak murriztu ditu aurreko tropeltxoarekiko. Lehenik Pronkek eta beranduago Aitor Perez Arrietak ezinak jota aurreko taldetxoa utzi eta tropelak irentsi du. Aurrean oraindik Bingen Fernandez bere iheskideekin ari zen etapa garaipena eskuratzeko lehian.

Tropeletik Tiralongok aurrera jo eta iheslariekin bat egite lortu du eta aurrekoekin bat egitea lortu du. Hirukotea aurrera zioan eta ibilbidearen baldintzei esker, tropelari tartea mantentzeko gauza izan dira, baina ez denbora luzez. Tropelak abiadura hartu du eta 19 kilometro ingururen falta ihesaldiarekin amaitzea lortu du.

Atzokoan bezala, etapari zirrara eragin asmoz edo, esprinterren taldeei tropela kontrolatuta mantentzea zain egin zaie ibilbideak zail jarri baitie. Horretaz lehenik Ballan eta gero Breschel-ek aurrera egin dute. Biak elkarrekin eta zein ziren kontutan izanda, ihesaldiak aukera asko zituela pentsatu dugu. Hauek aurrean zirela, atzo bezala De la Fuentek eta Gilbertek berriro beste saiakera bat egin dute eta ez zaie batere gaizki atera. Aurrekoekin bat egitea lortu eta laukote arriskutsua osatu dute.

Bennatik ere esprinta nahi zuen eta Liquigas tiraka hasi da. Hortxe bukatu da laukotearen abentura. Oraindik bazen indarrak probatu nahi zituenik. Saiatu diren beste txirrindulariak Moncoutie eta Hoogerland izan dira, baina hauenak ere gutxi iraun du.

Azken kilometroan esprinter nagusiak azken zuzenerako prestatu dira. Aurrean Bozic bera jarri da eta gaurkoan erritmo biziarekin eta gogor eutsiz, Farrar eta Bennatiren aurretik etapa garaipena lortu du. Vacansoileko esprinterrak merezitako garaipena, beraz, baita taldeak berak ere. Garaipen honek ez du sailkapen nagusian aldaketarik eragin.

Bingen Fernandezen agurra

Bingen Fernandezek aurtengo denboraldiarekin txirrindularitza profesionalari agur esango dio. Abenduan 37 urte beteko ditu bermeotarrak eta txirrindularitza profesionalari etapa garaipenen batekin egin nahi dio agur. Bingen Euskadi (1996-1997), Euskaltel-Euskadi (1997-2001) eta azken 7 urtean Cofidis taldean eman ditu etapa garaipenik lortu gabe. Gaur ihesaldian sartuta saiatu da baina ez da posible izan. Baina izan seguru berriro ere saiatuko dela. Ea zortea duen eta hainbeste desira duen etapa garaipen hori lortzen duen. Animo Bingen!!

Greipelen bigarrena esprintean

Greipel. 2009ko Vueltako 5. etapa garaileAurreratu bezala, gaur Vinarosen amaitu den etapa ere esprintean amaitu da. Bigarrengo aldiz, eta oraingo honetan esprinter nagusiak etapa garaipenaren esprintean sartuta, Greipelek bere Vueltako bigarren garaipena lortu du jarraian Boonen eta Bennatiren aurretik. Honenbestez, bi garaipenek emandako gain sariei esker, Vueltako lider jarri da Columbia-HTCko txirrindularia. Taldearentzat, berriz, hirugarren garaipena.

Gaurko etapak esperotako gidoia jarraitu du. Beno, esperotakoa baino motelagoa. Izan ere antolatzaileen aurre ikuspenik motelenak ere azkar geratu dira gaurko etapan, eta Greipelek helmuga zeharkatu duenean 18:00ak gertu ziren. Beharbada jasan behar izan duten beroak bere eragina utzi du tropelean.

Lehen kilometroetan eguneko ihesaldia sortu da. Tropeltxoan Aitor Hernandez txirrindulariaz gain Lopez Gil, El Fares, Sanchez Pimienta, Pronk eta Serafín Martinez bildu dira. Hauek azken 20 kilometroetara iritsi arte ihesaldian jarraitu dute, baina une oro tropelak kontrolpean izan du aurreko tropeltxoa. Hori bai, Aitor Hernandez ermuarrak etekina atera dio ihesaldiari eta Boom-i mendiko maillota kendu dio lortutako puntuei esker. Gai izango al da maillot horri eusteko? Beharbada igandera arte bai, baina hortik aurrera…

Vinarosera iritsi aurretik, antolatzaileek helmugatik 8 kilometrotara gaintxo bat zuten prestatua. Bigarren mailako bide batetik joan dira Ermitako gaina igotzeko eta hor De la Fuentek lehenik eta gero Gilbertek erasoa jo dute. Espainiarraren saiakera ez da behar besteko gogorra izan, baina bai belgikarrarena.

Silence-Lottoko txirrindularia tropelari tartea 20 segundoko tartea ateratzen zion 4 kilometroren faltan. Etapa garaipena eskuratzen bazuen lasterketako lider ere jarriko zen Greipelek egin duen bezala. Bazirudien ondo zihoala, baina atzetik tropelak ez du barkatu eta Gilbertek, ustu-ustu eginda, amore eman behar izan du. Esprinta jokatu behar zen.

Gaurkoan esprinter faborito guztiak aurrean ziren baina azken bihurgunean Ciolek erori egin da. Ez dirudi ezer larririk izan duenik baina etapa garaipenaren lehiatik kanpo geratu da. Azkenean, esan bezala, nagusitasunez lortu du garaipena Greipelek Boonen eta Bennatiren aurretik.

Aitor Hernandez bidoi eramailea

Ez dakit etapa ikusteko aukera izan duzuen, baina ikustekoa izan da. Tropelean ohiko “gregarioek” beren taldeetatik ur bidoiak hartzen aritu dira gainontzeko taldekideei emateko, esan bezala bero baitzen Tarragona aldean. Helmugarako 40 kilometro inguru falta zirela, eguneko ihesaldia aurretik zela, tropeltxoak minutu bateko errenta zuen. Euskaltel-Euskadiko zuzendariak ihesaldiaren amaiera iristen ari zela edo pentsatuko zuen (besterik ez zait bururatzen), eta Aitor Hernandezi banatu beharreko bidoi guztiak eman dizkie! Barkatu, baina nik ez dut oso ondo ulertu. Gizajoak gutxienez 8 bidoi izango zituen soinean. Delgado eta De Andresek arrazoi ezberdinak eman dituzte gertaera ulertzeko, baina bukaeran txiste eta guzti egiten aritu dira. Eta ez zen gutxirako! Mandoa baino kargatuago (zer, 2-3kgr soinean?) hor ari zen erreleboak ematen.

Noski, tropelak ez zuen nahi ihesaldia oraindik amaitzerik (ohikoa den bezala) eta ihesaldiak beste 20 kilometrotako bizia izan du. Ordurako Aitorrek zituen bidoi guztiak gainontzeko ihes-kideen artean banatu ditu. Seguru adiskide gehiago egin dituela keinu honekin. Ikustekoa, benetan.

Asteburuari begira

Aitana inguruakTxirrindulariek egun bateko atsedena izan zuten atzo eta gaur lanera itzuli beharko dute. Herbeheretako euri eta hotzak alde batera utzi eta Mediterraneoko beroari aurre egin beharko dioten gaurtik aurrera.

Gaur eta bihar jokatuko diren etapak transiziozko etapak izango dira, segur aski esprintean erabakiko direnak. Jarraitu jarraituko ditugu bi etapa hauek, baina interesgarriena asteburua izango da.

Valentzian 30km-tako erlojupekoa jokatu beharko dute larunbatean. Suitzarrak minik ez badu behintzat etapa irabazteko moduko erlojuaren kontrako etapa izango du. Gaur eta biharko etapak orain arte bezala badoazkio, Cancellarak lider jarrai dezake Valentzian, baina ez zait iruditzen erlojupekoko irteera hartze azkena izango denik.

Erlojupekoak sailkapen nagusian aldaketak sortuko ditu, baina igandeko etapak, Aitanako gainean bukatuko denak, lider aldaketa ekarriko duela aurrera dezakegu. Hau izango da sailkapen nagusian lehian aritu nahi dutenek pasa beharko duten lehen azterketa.

Ikuslegoaren inguruan aipamena egin nahiko nuke. Ez zait iruditzen Vueltako arduradunak Herberehetan izan duten ikuslego kopuruaz kexatzeko moduan direnik. Berdin izango al da penintsula espainiarrean?

Erorketa ikusgarriak Greipeli garaipena erraztu dio

Liège-Bastogne-Liège klasiko ezaguna izaten den parajeetan ibili da gaur tropela, baina ez da espero zen ikuskizuna izan. Eguraldiak protagonismo handia hartu du eta ikuskizuna bestelakoa izan da. Helmugarako kilometro t’erdira izan den eroriko itzelak eman du. Biribilgune bat igarotzen ari zirela, tropelaren aurre aldean zihoanetako txirrindulari bat erori egin da eta atzetik zituen guztiak lurrera bidali ditu. Aurrekoak, Greipel tartean, ez du zailtasun gehiegirik izan Weylandti esprintean irabazteko.

TVEk gaurko etapatik espero zuena ez du jaso. Guk ere ez, noski. Hauen ustetan gaurko etapan ikuskizuna bermatua zegoen eta horren erakusgarri eguerdiko 13:30etatik Teledeporteko seinaletik etaparen jarraipena egiten hasi dira. Zorionez lana nuen eta ez naiz jarri arratsaldeko 16:30ak arte lasterketa ikusten, eta eskerrak! Klasikorik onenen pareko etapa espero zen, baina esprintean amaitu den horietako bat izan da, atzokoaren antzekoa euriagatik izan ez balitz.

Boom eta Roels (gaur ere bai), Ramirez Abeja eta Lagutinek osatu dute gaurko ihesaldia. Boomek helburu garbia zuen, hiru mendateetatik lehen postuan igaro eta mendiko maillota eskuratzea eta bere helburua lortu du. Tropelak, une oro, lasterketa kontrolpean. Hori bai, euria ari zuen eta arriskua aurre ikusten zen.

Liègeko helmugatik lehen aldiz bezain laster ihesaldian ziren kide guztiak harrapatu dituzte eta esprintean pentsatzen hasiak ziren txirrindulariak. Hala ere Kirchen edo Gasparotto bezalako txirrindulariak saiatu dira lasterketa puskatzen, baina ez dute posible izan.

Esan bezala gaurko etapa erabaki duen unea helmugatik kilometro t’erdira izan den erorikoak markatu du. Ikaragarria izan da erorikoa eta 50 txirrindulari inguru lurrean ziren beren zauriei begira. Aurre aldean, Columbia-HTCko eta Quick Stepeko hiruna txirrindularik helmugara bidea hartu dute, eta erraztasun handiz, Greipelek garaipena lortu du. Atzetik Weylandt eta Grabsch taldekidea izan ditu. Honenbestez, eta nahiz eta Cavendish ez den Vuelta lehiatzen ari, bigarren garaipena lortu du Columbia-HTCek eta biak esprintean.

3 kilometro barruan izan da eroriko ikusgarria eta horregatik Cancellarak lidergoari eusten jarraitzen du. Hala ere ezin esan zorteko dabilenik, erorikoan min hartu duela ikusi baitugu. Biharkoa atseden eguna dela kontutan izanda, zauritutako txirrindulariek beren egoera aztertuko dute eta etzi Tarragonako irteeran izaten saiatuko dira, baina ez harritu norbait erretiratzen bada min hartuta. Hori da adibidez Horner-en kasua. Dagoeneko taldeak jakitera eman du Horner-ek Vuelta utziko duela erorikoan eskumuturra autsi baitu.