UCIko bitxikeriak (I)

ProTour-etarainoUCIko arauen 2.15.125 artikuluak honakoa dio (orijinala frantsesez edo ingelesez): “Txirrindulari eta Pro Team-ek debekatua dute euren kontratuen berritzearen edo traspasoen inguruko elkarrizketak publiko egitea irailak 1a baino lehen. Arau hau hautsiz gero, txirrindulariak 2.000 CHF-ko zigorra jasoko du eta 5.000 CHF-koa UCI Pro Team-ak.”

Ez dut entzun arau hau inoiz aplikatu denik. Ez dakit zergatik mantentzen den arauetan ere, zentzu handirik ez baitu eta sistematikoki hausten baita. Txikikeria bat dirudien arren, UCIk arauak aplikatu beharko lituzke, edo bestela betirako artikulu hau erretiratu. Ez bata ez bestea egiten ez duenez, arduragabe jokatzen ari da honetan ere.

Beste bat da, ordea, sortzen zaidan zalantza handiena. Arau hau txirrindulari eta Pro Tour talde gehienek ez dutela ezagutzen dirudienez (begira bestela azkenaldiko fitxaketa berriak medioetan), zenbateraino ote da egia lizentziak eskatzeko orduan sinatzen dutena, hau da, UCIren arauak ezagutzen eta errespetatuko dituztela?

Txirrindularitzaren benetako arazoaz

VerbruggenTxirrindularitza kinka larrian dago. Errepideko txirrindularitza profesionala zehazkiago esateko. Zalantzarik ez. Baina ez da doping-a errudun nagusia. Doping aferak arazo sakonago baten ondorioetako batzuk besterik ez dira, zoritxarrez jendartean ezagunenak eta minik gehien egiten ari zaizkienak kirol honi. Baina oker dabiltza txirrindularitza doping-aren arazoa konpontzeak salbatuko duela pentsatzen dutenak.

Txirrindularitzaren arazoa, instituzionala da. Egiturazkoa, nolabait esateko. Goitik hasita, hots, UCI nazioarte mailan, beheraino, probintziarteko edo autonomietako federazioak, lotsagarri jokatzen ari dira arlo askotan. Eta nire irudipena da beren kirola krisian ikustearekin batera areagotzen ari dela erabaki okerrak hartzeko duten joera. UCI eta 3 handien arteko liskarra edo gipuzkoar eta euskal federazioetako klanen arteko botere borroka etengabea aski ezagunak dira txirrinduzale askorentzat. Baina erakunde hauen funtzionamenduari arreta pixka bat jarri dionak badaki 2 adibide hauek ur tanta batzuk besterik ez direla astakerien ozeanoan. Continue reading “Txirrindularitzaren benetako arazoaz”