Hilabetekako Artxiboak:uztaila 2009

Eta bigarren garaipena Juanma Garatek!!

Juanma Garate. 20. etapan garaipenaAzken sei urteetan etapa garaipenik lortu ezinda ibili eta gero, aurtengo edizioan bi etapa garaipen lortu dituzte gure txirrindulariek. Gaurkoan Juanma Garate izan da Martin-i aurre hartuta etapa garaipen itzela lortu duena, non eta Mont Ventoux mendate mitikoan. Zorionak Juanma!

Azken aurreko etapa izaki eta Mont Ventouxen gainean bukatzen zela ikusita, sailkapen nagusiko postuen lehian dabiltzanak zalaparta sortu beharra zuten zerbait egin nahi bazuten. Lehia horrek etapa garaipena aurtengo Tourreko gizonik indartsuenen artean izango zela pentsatzen genuen, baina ez da hala izan.

Eguneko ihesaldian zen Juanma Garate, Ruben Perez, Delage, Gutierrez, Posthuma, Martin, Kuschynski, Roulston, Riblon, Geslin, Bonnet, Righi, Lemoine, Dumoulin, Timmer eta Bouet txirrindulariekin batera. Tropelak ihesaldia 5 minutu ingurura izan du Mont Ventouxeko igoerara gerturatu artean, baina behin igoerari ekiteko 5 kilometro inguru falta zirela, Astana eta Saxo Bank txandakatuz tropel nagusia luzatu dute mozketa bat eragiteraino. Orduan iheslariekiko errenta murrizten joan denez, Juanma Garatek erasoa jo du aurreko tropeltxoan eta Martin eta Riblonek aurrera egin dute. 21 kilometroko portua luzea zen eta indarrak ongi dosifikatu beharrak zeuden eta ederki egin dutelakoan naiz.

Atzealdean sailkapen nagusiaren lehian zebiltzan txirrindulariak erasoka hasi dira. Andy Schleck izan da hamaika eraso egin dituena, baina Contador erne zen erasoak baliogabetzeko. Frank ere saiatu da birritan, baina honen zaintza lanetan Armstrong ederki moldatu da. Sailkapen nagusiko lehen txirrindulariak, beraz, beraien postuak babesten edo eta hobetzeko saiakeratan ziren. Noski, erasoen ondoren atsedenaldiak izaten ziren eta hori bikain etorri zaie aurreko hiru iheslariei bestela harrapatuko baitzituzten.

Azken kilometroetan Riblonek ezin zuen beste bien erritmoarekin jarraitu eta geratu egin da. Atzetik, berriz, sailkapen nagusiko lehiatik kanpo zela aprobetxatuz, Pellizottik aurrera jo du etapa garaipenaren bila, baina ez da gauza izan aurreko biak harrapatzeko. Gauzak horrela, etapa garaipena Juanma eta Martinen artean zen. Azken kilometroan bigarren erasoa jo du. Lehenengoan Martin hurbiltzeko gauza izan bada, azken honetan nahikoa izan da egin duen ahalegina eta etapa garaipena eskuratu du Mont Ventoux handian. Honi eskerrak, Rabobankek aurten eman duen irudi kaxkarra itxura hobetzea lortu du.

Faboritoen artean Schleck anaiak gogor aritu diren arren, lortu duten gauza bakarra Franken postua aurreratzea izan da Klöden atzeratuta iritsi baita helmugara. Ezin esan Schleck anaiak saiatu ez direnik, baina bai Armstrong baita Wiggins bera ere ederki aritu diran beren postuen defentsa lanetan.

Ez zaigu ahaztuko aurtengo Tourra hain erraz. Mikel Astarlozak asteartean Alpeetan eta gaur Juanma Garatek Mont Ventouxen bi garaipen ekarri dituzte Euskal Herrira. Zorionak biei bihotz bihotzez!!

Argazkia: www.cyclingnews.com

Kontuz! Tropelean kakalardoak daude!

Gogoratuko duzuen bezala Frantziako Tourra hasi zen asteburuan Tropelean kakalardoak zirela eta sailkapenak publiko egitea atzeratu behar izan genuen. Baina zer dira kakalardoak?

kakalardoak

Tropelean dauden arauak betetzen ez dituzten erabiltzaileak, horiek dira kakalardoak. Tropela.net-eko lehiaketa guztietan parte hartzea doakoa da eta horren ondorioz, pertsona bakoitzari ez diogu nahi adina kiniela egiten uzten. Pertsona bakoitzak erabiltzaile bakarra sor dezake eta erabiltzaile bakoitzak kiniela bakarra egin dezake. Gainera irabazleentzat sariak ditugunez, horrek araudia zorrotz betetzera behartzen gaitu.

Ez da erraza araudi zehatzak ezartzea eta berauek zuzen interpretatzea eta aplikatzea baina ondoren adierazten dizkizuegun ezaugarri arbuiagarrietako bat betetzen dute gure Tropeleko kakalardoek.

1. Lehiaketa batean erabiltzaile bat baino gehiago sortu dute, hots, kiniela bat baino gehiago egin dute.

2. Erabiltzailea datu faltsuekin sortu dute.

Irizpide hauei jarraituz hainbat kakalardo topatu ditugu Tropelean. Guk oso nabarmenak direnak soilik markatu ditugu eta seguru beste askok ihes egin digutela.

Nola atzeman daitezke kakalardoak?

Kakalardoak erraz nabarituko dituzue. Sailkapenetan nahiz tropeltxoetako sailkapenetan kakalardoaren ikonotxoarekin agertuko dira. Kontuz, beraz, kakalardo horiekin, kiratsa baitarie!!

Ze ondorio izango ditu kakalardo izateak?

Kakalardo den erabiltzaile bat, sarien lehiatik at geratuko da eta ezingo du saririk jaso, urteko sailkapenean ere ez da kontuan hartuko eta hurrengo lehiaketetan ezingo du kinielarik egin.

Ez naiz kakalardo bat!

Bestalde, norbait kakalardo moduan markatu badugu eta bere ustez aurreko bi irizpideetatik kanpo badago, mesedez, bidali iezaguzue posta elektroniko bat egoera argituz. Guk ere akatsak izan ditzakegu eta komeni da akats horiek zuzentzea oker daudenean.

Saria jasotzeko zer egin beharko da? Datuak ziurtatu.

Arazo guzti hauengatik, saria egokitu zaionak bere datuak egiazkoak direla ziurtatu beharko du Tropela Elkartearen aurrean, eta horretarako emailez bere nortasuna ziurtatzen duen agiriren bat (nortasun agiria, gida-baimena, liburutegiko txartela…) bidali beharko du emailez.

Jakin ezazue kakalardo guztiok, atzemandako eta atzeman gabekook, ez zaretela Tropelaren joko arauak errespetatzen ari eta ondorioz gainontzeko parte hartzaileei iruzur egiten ari zaretela.

Amorruz beteriko etapa garaipena

Mikel Astarloza. 16. etapan garaileAzkenean iritsi dan zaleok nahi genuen euskal garaipena. Saiatu bai saiatu dira orain arte talde laranjako kideak ihesaldietan sartu eta etapa garaipenaren lehian sartzen, baina gaur arte lortu ez dena gaur Mikel Astarlozak lortu du. Zorionak Mikel!!

Euskaltel-Euskadik Egoi Martinezek mendiko maillota eskuratzeko aukeraren lehian Egoi eta Gorka Verdugo eguneko lehen ihesaldian sartu ditu. Bertan zen Pellizzoti eta maillotaren lehian jarraitu nahi bazuen, gertutik zaindu beharra zuten. Baina ez da posible izan. Italiarra gehiago da eta Col du Grand Saint-Berndard igotzen ari zirela Karpets eta Pellizzoti aurrera joan dira. Egoi Martinezek bere eskuetan zegoen guztia egin du hauei jarraitu ahal izateko, baina ezinak jota, amore eman behar izan du. Zoragarria Egoi Martinezen jarrera, txalotzekoa zalantzarik gabe.

Tropela atzetik Astanako kideak gidatuta zetorren. Mikel Astarloza gaur zerbait egiteko gogoz zen eta tropela utzi eta aurreko iheslarien bila joan da. Lortu ere lortu du. Lehen mendatearen pankartapetik pasatzen lehenak Pellizzoti, Karpets, Fedrigo, Casar, Igor Anton, Voigt, Mikel Astarloza, Velits, Ten Dam eta Goubert izan dira.

Col du Petit Saint-Bernard eguneko bigarren mendatea igotzen hasi direnerako tropel nagusiarekiko ia bost minututako diferentziak zituzten. Mendateko honetan erasoak espero ziren eta hala izan da. Aurreko tropeltxoan Van de Broeck izan da taldea astindu duena eta bere atzetik Pellizzoti joan da. Biak aurrera egin dute eta bazirudien tropeltxoko gainontzekoak ez zirela gai izango haiei jarraitzeko, baina Mikel Astarlozak atzetik aurrera jo du eta muinera iritsi aurretik aurreko biekin bat egin du. Hirukote honi Moinard gehitu zaie eta laukotea osatu dute.

Tropel nagusian ere mugimendu asko izan dira. Saxo Bankek tropela tiratzen hasi da eta noski, beranduago Andy Schleckek erasoa jo du. Atzetik Frank Schleck, Contador, Wiggins eta Nibali izan dira jarraitu diotenak, baina Armstrong, Sastre eta Evans geratu egin dira. Hala ere amerikarra ez zegoen amore emateko, eta metro batzuk aurrerago erasoa jo eta aurrekoak harrapatzea lortu du. Batek daki nondik atera dituen indarrak Texaseko txirrindulari ezagunak, baina egin duenak harrituta utzi nau.

Mendian behera lasterketa buruan Mikel Astarloza eta gainontzeko hiruak ziren. Atzetik Fedrigo eta beste laukote bat 15 segundo ingurura eta tropel nagusia Wiggins buru zutela 1’15” ingurura. 20 kilometro falta ziren helmugarako eta aurreko lauek zuten guztia eman dute diferentziak mantendu eta etapa garaipena lauen artean gera zedin. Tarteak mantentzea lortu dute eta 4 kilometroren faltan Moinard izan da lehen erasoa jo duena baina besteak gurpilera jarri zaizkie. Bi kilometroren faltan, ordea, Mikel Astarlozak hamarreko handian bertsoa abestu die gainontzeko iheskideei. Hauek harri eta zur geratu dira ezer ez baitzuten ulertzen elkarri begira eta ez dira gauza izan Pasaiako txirrindulari adoretsuari jarraitzeko. Fedrigo eta bere taldeak bitartean aurrekoak harrapatzea lortu dute, baina ez Mikel. Mikelek amorru biziz bere azken kilometroetan gogor eutsi dio abiadurari eta amorrazio guztiak kanporatuz helmugako pankarta besoak jasota pasa du. Ikaragarria, Mikel!!

Euskal zalegoak behar zuen horrelako garaipen bat. Urte honetan garaipen gutxi izan dira eta gaurkoa, zalantzarik gabe, handiena. Denbora asko pasa da euskaldun batek Tourrean etapa garaipenik lortzen ez zuela, eta hainbeste itxaron eta gero, gaur iritsi da. Lan bikaina Mikelena, eta lan bikaina, era berean, Euskaltel-Euskadi taldearena mendiko maillota lehiatzen saiatu baitira eta hori galdu badute ere, etapa garaipen lortu baitute. Egun askoren ahalegina izan da ostiraleko etapan Amets Txurrukak bigarren egin zuenekoa bezala eta hona hemen esfortzu guztien fruitua. Zalegoak eskertzen dizue egindako guztia eta honek etorkizuneko txirrindulariei ere motibazioa eragingo diela uste dut. Zorionak guztioi!!

Tropeleko lehiaketa aztertzen

2009ko Tropela.net lehiaketako behin behineko sailkapenaAzken astean sartu gara eta gure lehiaketa pil-pilean da. Zenbait lehiaketan buru belarri sartuak izango zarete eta beste asko zuen tropeltxoetako lehen postuen lehian arituko zarete. Zenbat aldatuko da sailkapen hau azken aste honetan? Hemen zenbait ausnarketa.

Lehiaketa lehen 10 postuetan direnek 3000 puntutik gora bildu dituzte. Esanguratsua irizten diot lehen 3 postuak 31 punturen tarte laburrean izateak. Lehen hamar postuak, berriz, 130 punturen barruan. Azter ditzagun postu hauetako erabiltzaileek dituzten taldeak.

Sanpete eta al2xu-ren artean bi txirrindulariren arteko ezberdintasuna dago, Kirchen-Kreuziger eta Wiggins-Fedrigo. Lehiaketa momentu honetan bukatuko balitzake sanpetek irabaziko luke sailkapen nagusian puntu gehiago bilduko bailituzke. Baina ez da gaur bukatzen lehiaketa.

Zaldibik beste erabateko kinielarekin ari da. Pronostikoen kontra Contador eta Armstrong hartu ditu lehen multzoan, eta badirudi oraingoz aukeraketa ona egin duela. Ez dut kalkulurik egin, baina uste du zaldibik gaur Tourra bukatu ezkero lehiaketa irabaziko lukeela. Ez al zaizue iruditzen? Lepotxok ere  Contador eta Armstrong aukeratu ditu, baina zaldibik baino aukeraketa kaxkarragoa du oraingoz eta badirudi zaldibiren atzetik geratzea kondenatua dagoela.

Skakek sanpeteren kiniela bera du aldaketa bakar batekin: honek Haussler du Cioleken ordez. Badirudi Hausslerrek aurtengo Tourrean nahikoa puntu bildu dituela. Haussler ez bada esprintetan sartzen Skakek ez du zereginik sanpeteren aurrean.

6. postuan ZenonJaskula aurkitzen da. Harrigarria bada ere, Tropelean posible da aurrealdean izatea txirrindulari bat gutxiagorekin eta hau da kasua. Koldo Fernandez de Larreak lasterketa utzi zuen eta ZenonJaskula 14 txirrindularirekin ari zaio azken asteari ekiten. Egia da puntu gutxien biltzen dituen multzoa dela euskaldunena eta horregatik ez dio kalte gehiegi egin Zarauzko erabiltzaile honi Koldo etxera joan izanak. Gainontzeko txirrindulariei dagokionez, honek ere Contador eta Armstrongen aldeko apustua egin du.

Jon Zumeta ZenonJaskularen antzera txirrindulari bat gutxiagoz ari da baina hiru txirrindularik bereizten dituzte bi kiniela hauek. Kinielak ezberdin izaki, lasterketa aldaketa nabarmenik izan ezean ZenonJaskula Jon Zumetaren aurretik izango da amaieran.

Jonsis tolosarrak azken etaparen ondoren 3 postu egin ditu bera eta 8.ean aurkitzen da. Hau ere Koldo gabe maila bikaina ematen ari da, baina aurrera egin nahi badu Kirchen edo Monfortek puntu gehiago bildu beharko lituzke, edo Feilluk, aurreko postuetan txirrindulari hau duen bakarra baita.

Zestoako Marduk oraingoz aukera asko izan dezakeen kinielaren jabe dela uste dut. Armstrong lehen postuei eusteko gauza bada eta Schleck anaiek atzoko moduan jarraitzen badute, seguru izan Mardu hautagai nagusia izan daitekeela Teneriferako bidaiaren lehian. J.voight ere hor izango da, baina ez zait iruditzen Voigt eta Hincapiek puntu gehiago bilduko dituztenik, eta hori Marduren alde litzateke.

Kuriosoa iruditu zait lehen hamar postuetatik erdiak Contador eta Armstrong aukeratu dituztela eta beste erdiak Contador eta Evans. Dakizuen bezala Tropelan %51ak Evansen alde egin duzue eta %23,8ak Armstrongen alde. Baina gai izango al da Armstrong podiumeko postuei eusteko? Oraindik Schlecktarrek dena eman al dute? Wigginsek maila horrekin jarraituko al du? Beste sorpresaren bat izango al da? Galdera asko aste honetan argitzen joango direnak. Animo guztioi eta lehiaketa nagusiaren lehiatik kanpo bazarete ere animo, beharbada tropeltxoren batean lehenak izango zarete eta!

Tourra hasi dela!!

Contador. 15, etapan garaipena eta lidergoaAurtengo Tourra gaur hasi dela diodanean gehienak ados izango zaretela pentsatzen dut. Bazen ordua! Pirinioetako aho gustu kaxkarra alde batera utzi (nork usteko zuen Nocentinik aste osoan maillot horiari eutsiko zionik Astanakoak hain segundo gutxitara izanda?) eta gaur bai, gaur lehia ikusi dugu.

Eguneko ihesaldia osatu da tartean Mikel Astarloza eta Moncoutie bezalako txirrindulariekin, baina espero genuen gaurkoan etapa amaiera goian izanik ez zietela utziko aurreko egunetan ez bezala. 4 minutu t’erditik gorako tartea izateraino iritsi da ihesaldia eta ondorioz etapan zehar Mikel Astarloza lasterketako lider birtuala izan da. Azken mendatea igotzen hastearekin batera, ordea, tropelak ihesaldiko kide guztiak irentsi ditu.

Saxo Bankek Schleck anaiak lanean jarri aurretik indartsu luzatu du tropel nagusia. Saxo Bankeko kideek, Cancellara barne, tropela luze luze jartzeko ahalegin guztiekin amaitzean, Frank izanda lasterketa mugitzen hasi dena eta berarekin faborito nagusiak eraman ditu. Gaurko lehiaren lehen testa izan da hau, izan ere beranduago Contadorrek lasterketa eraso gogor bat egin du, inork erantzuteko gai izan ez dena. Andy Schleck saiatu da eta atzetik atera zaio baina ez da gauza izan Pintoko txirrindulariarengana hurbiltzeko. Hori ikusita, helmugaraino bere erritmoan igotzea erabaki du Schleck anaietan gazteenak.

Atzealdean Sastre hasieran geratu egin da baina bere erritmoan han hurbildu zaie faboritoen tropeltxoari ohiko gisan. Armstrong ahal zuen eran tropeltxo nagusiari eusten saiatu da Klödenen laguntzarekin. Baina harritu gaituena tropeltxoan tiraka Klöden izan dela da. Horrek galdera bat dakarkigu gogora: nor da Astanako talde burua?

Frank Schlekek beste eraso bat jotzea erabaki du eta orduan Armstrong geratu egin da erritmoari jarraitzeko gauza ez zela. Aldamenean Klöden geratu zaio eta gainontzekoek aurrera egin dute.

Sastre, Nibali, Wiggins, Frank Schleck eta Evansek elkarrekin egin dute helmugarainoko bidea eta atzetik iritsi dira Armstrong eta Klöden. Garaile erraztasun handiz Contador izan da eta atzetik 43 segundotara Andy Schleck.

Gaurkoan taldeko liderra Contador bera dela erakutsi du Pintoko gazteak. Badirudi Texaseko txirrindulariak onartu duela (kostata) bera baino indartsuagoa dela, eta bigarren postuarekin konforme izango dela. Azken astean ikusi beharko dugu ia amerikarra gai den postuari eusteko.

Gainontzekoei dagokienez, Andy bikain aritu da eta oraindik lasterketa erabaki gabe dagoela dio eta Alpeak hasi besterik ez direla egin. Nola ez, Frank anaia ere oso ondo. Garbi dago bi anaiek sailkapen nagusiaren lehia estuan izango direla.

Liquigas-i dagokionez, Nibali maila oso ona eman du eta Kreuziger taldekidea, beharbada, espero baino okerrago. Sastre, aurrez esan bezala, bere ohiko moduan faboritoen artean izan da. Evansi, berriz, espero baino gehiago kosta zaio aurrealdean izatea.

Ikaragarri ibili dena Wiggins izan da, bere taldean Wiggo bezala ezagutzen duten txirrindulari ingelesa. Bagenekien Giroan ondo ibili zela eta mendian asko hobetu duela, baina gaurko bezalako etapa batean eman duen maila ikaragarria izan da. Bere Vande Velde taldekidea bera baino hobeto sailkatu da eta momentuan podiumeko postuetan aurkitzen da. Gogoan izan ostegunean erlojupekoa jokatzen dela eta sailkapenean Armstrongekiko duen denbora hobetzeko balio izango diola.

Asteazkeneko etaparen zain geratzen gara biharko atseden eguna pasa zain. Pozten gara Tourra hasi delako, berandu bada ere. Ia zer eskaintzen digun azken aste honek!