Etiketa Artxiboak:UCI

UCIren titulua

UCI DiplomaUCIk protagonismo gehiago nahi duela dirudi. Protagonismoa edo behintzat sortu duten erakunde honi zentzua eman nahi diotela dirudi. Ez dakit onerako ala txarrerako, baina berrikuntzak eman dituzte ezagutzera ikasturtea asteko hiru aste falta diren honetan.

Taldeetako zuzendariek UCIren titulua izan beharko dute beren lanean jarraitu nahi badute zuzendari gisa, bai behintzat ProTour eta Continentaleko zuzendariek. Ikastaroak eskuragai izango dituzte zuzendari direnek edo izan nahi dutenek azarotik aurrera. Hori bai, UCIko kideek ez dute makina gehiegi behartu nahi izan eta ProTourreko zuzendariei 2013ra arteko epea ematen die titulu hau eskuratzeko. Continentalekoei, berriz, 2015 arte.

Orain ez dela denbora asko hainbat talde UCIren jokabidearekin kritiko agertu ziren eta bazirudien ProTourrak amaiera gertu zuela. Berri honekin, berriz, taldeek neurria onartzen badute behintzat, badirudi ProTour eta UCIren kontsolidazioa bermatzen dutela. Ikusi beharko da.

Baina zer erakutsi behar diete Bruyneel, Unzue,… bezalako talde zuzendariei? UCIren esanetan, alde batetik UCIren araudian oinarrituko dira eta bestetik taldeak zuzentzeko ezagutzetan. Araudiari dagokionez, bereziki atentzioa sortu arazi didana da kurtso honetan dopinaren aurkako araudiaz arituko direla adierazi izana da. Zuzendariek ez al dute dopinaren inguruko araudia ezagutzen? Hala balitz, kezkagarria iruditzen zait.

Guzti honi gorputz gehiago eman asmoz edo, UCIko akademiaz gain, Manchesterreko Negozio Eskola (Manchester Business School) izango dira ikastaroaz arduratuko direnak. UCIren akademiak mundu osoan zehar txirrindularitzaren garapenean lagundu duela diote, eta honekin pauso bat aurrera eman nahi dutela. Ez dakit aurrerapausoa izango den, baina garbi dagoena da zenbaitek eskolara buelta egin beharko dutela (kexaka hasten ez badira bederen).

Txirrindulariak klausulen kontra

Klausularen eztabaidaKatusha taldeak bere txirrindulariei sina arazi nahi zien klausulak hari luze dakar. Azkena gai honen inguruan hitz egiten Txirrindulari Profesionalen Elkartea (PCA) izan da, eta pentsatu bezala, kritiko.

PCAren arabera UCIren arauen kontrakoa da aipatutako klausula hau. Ez zaie legezkoa iruditzen UCIren araudia kontutan hartuta txirrindulariak urteko soldata bost aldiz ordaintzera behartu ditzakeenik talde batek positibo emateagatik. Klausula hori txirrindularien kontrakoa dela argudiatzen dute.

McEwen Katusha taldeko txirrindularia kezkati agertu da taldearen etorkizuna dela eta, dagoeneko bi izan baitira taldean positibo eman dutenak, Pfannberger eta Colom. Hau gutxi balitz, Dehaes belgikarrak Katusha taldearekin zuen kontratua bertan behera uztea erabaki du klausula hau onartzeko prest ez zegoelako eta Silence-Lotto taldearekin sinatu berri du urte beterako. Steegmansek ere ez zen sinatzekoa eta Tourra lehiatzera joateko taldetik kanpo gera liteke. Azken berrien arabera, ordea, sinatu omen du beharrak jota.

Katusha taldearen desagertzearen aurrean al gaude? Zerk eraman du taldea txirrindulariei klausula hau sina araztera behartu nahi izateko? Gehiegizko neurria al da taldeak hartu duena? PCAk behar besteko argudioak al klasula kritikatzeko? Tarteko biderik ez al dago? Gainontzeko taldeek zergatik ez dute antzekorik egiten? Hobe al da…. Galdera asko eta erantzun gutxi. Edo beharbada galderak baino iritzi gehiago. Nahasmena behintzat esanguratsua Katusha taldearen inguruan sortu dena.

Irratirik gabeko bi etapa 2009ko Tourrean

2009ko Tourrean irratitxoarik gabeko etapakDirudienez aurtengo Tourreko berrikuntzetako bat irratia edo “pinganilloa” ezin erabiltzea izango da. Tourreko arduradunak ez dira ausartu lasterketa guztian zehar kentzera, baina aurten, proba gisara, bi etapetan irratirik gabe lehiatu beharko dira txirrindulariak.

UCIk ontzat eman du neurria eta 10. eta 13. etapetan aplikatuko omen da debekua. Lehenengo etapa erabat laua da Limoges eta Issoudun bitartean, baina nahiko luzea: 194,5 kmkoa. Badirudi etapa honetan neurri berriak ihesaldiak sortzeko erraztasunak emango dizkiela txirrindulariei esprinterren kaltetan, baina ikusi beharko da. Bigarrena Vittel eta Colmar arteko etapa luzean izango da. Hau 200 kmkoa izango da lehen, bigarren eta hirugarren mailako mendateak ditu bere ibilbidean. Kasu honetan lider doan taldeari egin diezaioke kalte neurriak, baina hau ere suposizio bat besterik ez da eta ikusi beharko da.

Garbi dagoena da Tourreko arduradunek berritu eta ikuskizunaren aldeko apustu egin nahi dutela. Ez dakiguna da ia asmatuko duten neurri honekin, baina hor dago ausardia. Badaezpada, ordea, bigarren asteko etapetan probatuko dute neurriaren eragina onerako naiz txarrerako gehiegi antzeman ez dadin nire iritziz.

Segur aski neurriak iritzi bat baino gehiago sortuko du bai aurretik baita egun horietan bertan ere. Gogoz naiz ikusteko ia zer eskaintzen duen aldaketak, zer eskaintzen duen “kontrolik gabeko etapak”.

Astana, Livestrong ala talde txuri-urdin-horia

2009ko Giroan Astana taldea maillot hutsekinGogoan izango duzue nola Kazakhstango babesleekin Bruyneelen taldeak soldatak jasotzeko arazoak zituzten. Protesta gisara, Astana izenik gabeko maillotak eraman zituzten txirrindulari gehienek, batek izan ezik. Noski, Kazakhstandar izaki, Zeitsek ezin protestarekin bat egin.

Giroa lehiatzen ari ziren bitartean, era guztietako zurrumurruak sortu ziren. Horien artean indarrik gehiena hartu zuena Livestrong Armstrongen fundazio “multinazionalak” bere gain hartuko zuela taldea. Tourrean parte hartu nahi badu babesle eta txirrindularien arteko ordainketa guztiak normalduta izan behar dituzte eta konponketa horiek guztiak egiteko denbora gutxi dute. Kontrol lan horretan UCI aritu da. Bigarren urtez Tourrean parte hartu gabe Astana taldea?

Azken egun hauetan, ordea, bestelako informazioa iritsi zaigu komunikabideetatik. Dirudienez Kazakhstango babesleek apirila eta maiatzari dagozkien ordainketak egin dituzte eta horri eskerrak Luxenburgoko Itzulian, Dauphiné Libérén eta Tourrean parte hartzeko arazorik ez luketela izango san du McQuaid UCIko presidenteak. Badirudi, beraz, momentuko arazoak konponduta dituela Bruyneelen taldeak, baina Tourra amaitu ondoren eta Vinokourov eta Kaschekin zigorrak beteta itzultzen direnean auskalo zer gertatuko den egungo taldearekin.

Nor oroitzen da ProTourraz?

ProTour-etarainoMartxan da Giroa eta ukaezina da txirrinduzaleon arreta han dagoela asteotan. Bost axola ProTour zirkuitutik at dagoela. EHko Itzulia eta Romandiako Itzulia ere gozatu genituen. Australiako Tour Down Under amaitu zenetik 2 hilabete pasa ondoren, Pro Tourraren barne lehiaturiko itzuli bakarrak izan dira. Egun bateko lasterketak ere ez dira askoz gehiago izan: Flandriako Itzulia, Gante Wevelgem eta Amstel Gold Race soilik. Lasterketa garrantzitsuak dudarik gabe, baina ProTour-aren distira beharrik gabeak ere bai seguraski.

Bitartean, ASO eta UCI-ren arteko pultsoa argitzen ari zelakoan nengoen eta UCI-k malgutasun pixkat erakutsiko zuela espero nuen. Baina ez dirudi horrela denik. Aurrera darraite Txinaz, Errusiaz etabarrez hizketan. Teilatua eraikitze lanetan zimendu egokirik gabe. Hala ere, Tourraren antolatzaileak aurretik doazela dirudi beraien arteko lasterketa luze, nekagarri eta azpijokoz beterikoan, eta Espainiako Vuelta ASOk Antena3-i saldoan erosiko diola ere entzuten da. Frantsesei baina, ez omen zaie buruan sartzen nola litekeen Espainiako lasterketa nagusiak galerak izatea eta aurtengo urtea aztertu nahi omen dute erosketa aurrera eraman aurretik.

Zurrunbilo honetan, egin dezagun geldialditxo bat memoria pixkat egiteko. Hiru handirik gabe eta klasiko handi gehienak kanpoan dituen ProTour zirkuitoaren hastapenetara eta motibazioetara begira dezagun:

Verbruggen UCIko lehendakari ohi ahoberoa (gaur hau diot, bihar kontrakoa) eta Manolo Saiz AIGCP elkartearen buru bezala (orain desgrazian eroritako Theo de Rooy eta Lefevre zuzendaritza-kide zituela) izan zirela sustatzaile nagusiak gauza jakina da. Ezkutaezina da, era berean, Continue reading “Nor oroitzen da ProTourraz?”