Etiketa Artxiboak:Euskaltel-Euskadi

Astarlozak ustez EPOa hartu du

Mikel Astarlozak ustez EPOarekin positibo eman duHori da berria. Gordin gordin jarri nahi izan dut zalantzarik izan ez dadin. Aurtengo Tourrean etapa garaipena lortu zuen Pasaiatarrak lehiaketaz kanpo egindako kontrol batean (ekainak 26an hain juxtu), EPOaren zantzuak antzeman dizkiote. Iñigo Landaluzeren kasuaren ondoren, kontra analisiak baieztatzen badu, Euskaltel-Euskadiko bigarren txirrindularia izango litzateke hilabete baten barruan dopinarengatik zigortutakoa.

Aste t’erdi besterik ez da pasa Mikel Astarlozak Alpeetan etapa garaipen ikusgarri hura lortu zuenetik. Azken urteetan Tourrean ez dugu izan garaipenik eskuratu duen  euskal txirrindularirik eta Mikelek poza eta euskal txirrindularitzaren berpiztea erakusten zigun. Baina pozak gutxi iraun digu. Ekaina bukaera aldera zurrumurruren bat iritsi zitzaidan Mikelen inguruan horrelako berriren bat izan zitekeelakoan, baina ez nion sinesgarritasunik eman nahi izan batez ere txirrindularien errugabetasunean sinesteko joera dudalako. Gaur UCIk ekainak 26an egindako kontrol batean EPOa aurkitu dutela argitaratu dute eta zurrumurru haiek egi bihurtu dira tamalez. Iñigo Landaluzeren kasuan ez bezala, Pasaiatarrak bere errugabetasunari eusten dio eta kontra analisia eskatuko duela aurreratu du. Talde laranjak ere atera berri duen komunikatuan Mikel Astarlozaren errugabetasunean sinisten duela (barneko kontrol guztiak gainditu omen ditu Pasaiatarrak) adierazi du eta taldean jarraituko duela. Horrekin batera, B laginak justizia egingo duenaren itxaropena dutela. Hala ere, taldean jarraituko badu ere, Espainiako Federazioak lehiaketetatik kanpo utzi du Mikel Astarloza, beraz, bihar ez da Donostiako Klasikoan izango.

Orbain beltz berri bat euskal txirrindularitzarentzat berria konfirmatzen bada, eta bereziki Euskaltel-Euskadi taldearentzat, hilabete batean bi kasu izan baititu talde barruan.

Oraindik gogoan dut Mayoren auzia orain 2 urte eta orain hau.

Amorruz beteriko etapa garaipena

Mikel Astarloza. 16. etapan garaileAzkenean iritsi dan zaleok nahi genuen euskal garaipena. Saiatu bai saiatu dira orain arte talde laranjako kideak ihesaldietan sartu eta etapa garaipenaren lehian sartzen, baina gaur arte lortu ez dena gaur Mikel Astarlozak lortu du. Zorionak Mikel!!

Euskaltel-Euskadik Egoi Martinezek mendiko maillota eskuratzeko aukeraren lehian Egoi eta Gorka Verdugo eguneko lehen ihesaldian sartu ditu. Bertan zen Pellizzoti eta maillotaren lehian jarraitu nahi bazuen, gertutik zaindu beharra zuten. Baina ez da posible izan. Italiarra gehiago da eta Col du Grand Saint-Berndard igotzen ari zirela Karpets eta Pellizzoti aurrera joan dira. Egoi Martinezek bere eskuetan zegoen guztia egin du hauei jarraitu ahal izateko, baina ezinak jota, amore eman behar izan du. Zoragarria Egoi Martinezen jarrera, txalotzekoa zalantzarik gabe.

Tropela atzetik Astanako kideak gidatuta zetorren. Mikel Astarloza gaur zerbait egiteko gogoz zen eta tropela utzi eta aurreko iheslarien bila joan da. Lortu ere lortu du. Lehen mendatearen pankartapetik pasatzen lehenak Pellizzoti, Karpets, Fedrigo, Casar, Igor Anton, Voigt, Mikel Astarloza, Velits, Ten Dam eta Goubert izan dira.

Col du Petit Saint-Bernard eguneko bigarren mendatea igotzen hasi direnerako tropel nagusiarekiko ia bost minututako diferentziak zituzten. Mendateko honetan erasoak espero ziren eta hala izan da. Aurreko tropeltxoan Van de Broeck izan da taldea astindu duena eta bere atzetik Pellizzoti joan da. Biak aurrera egin dute eta bazirudien tropeltxoko gainontzekoak ez zirela gai izango haiei jarraitzeko, baina Mikel Astarlozak atzetik aurrera jo du eta muinera iritsi aurretik aurreko biekin bat egin du. Hirukote honi Moinard gehitu zaie eta laukotea osatu dute.

Tropel nagusian ere mugimendu asko izan dira. Saxo Bankek tropela tiratzen hasi da eta noski, beranduago Andy Schleckek erasoa jo du. Atzetik Frank Schleck, Contador, Wiggins eta Nibali izan dira jarraitu diotenak, baina Armstrong, Sastre eta Evans geratu egin dira. Hala ere amerikarra ez zegoen amore emateko, eta metro batzuk aurrerago erasoa jo eta aurrekoak harrapatzea lortu du. Batek daki nondik atera dituen indarrak Texaseko txirrindulari ezagunak, baina egin duenak harrituta utzi nau.

Mendian behera lasterketa buruan Mikel Astarloza eta gainontzeko hiruak ziren. Atzetik Fedrigo eta beste laukote bat 15 segundo ingurura eta tropel nagusia Wiggins buru zutela 1’15” ingurura. 20 kilometro falta ziren helmugarako eta aurreko lauek zuten guztia eman dute diferentziak mantendu eta etapa garaipena lauen artean gera zedin. Tarteak mantentzea lortu dute eta 4 kilometroren faltan Moinard izan da lehen erasoa jo duena baina besteak gurpilera jarri zaizkie. Bi kilometroren faltan, ordea, Mikel Astarlozak hamarreko handian bertsoa abestu die gainontzeko iheskideei. Hauek harri eta zur geratu dira ezer ez baitzuten ulertzen elkarri begira eta ez dira gauza izan Pasaiako txirrindulari adoretsuari jarraitzeko. Fedrigo eta bere taldeak bitartean aurrekoak harrapatzea lortu dute, baina ez Mikel. Mikelek amorru biziz bere azken kilometroetan gogor eutsi dio abiadurari eta amorrazio guztiak kanporatuz helmugako pankarta besoak jasota pasa du. Ikaragarria, Mikel!!

Euskal zalegoak behar zuen horrelako garaipen bat. Urte honetan garaipen gutxi izan dira eta gaurkoa, zalantzarik gabe, handiena. Denbora asko pasa da euskaldun batek Tourrean etapa garaipenik lortzen ez zuela, eta hainbeste itxaron eta gero, gaur iritsi da. Lan bikaina Mikelena, eta lan bikaina, era berean, Euskaltel-Euskadi taldearena mendiko maillota lehiatzen saiatu baitira eta hori galdu badute ere, etapa garaipen lortu baitute. Egun askoren ahalegina izan da ostiraleko etapan Amets Txurrukak bigarren egin zuenekoa bezala eta hona hemen esfortzu guztien fruitua. Zalegoak eskertzen dizue egindako guztia eta honek etorkizuneko txirrindulariei ere motibazioa eragingo diela uste dut. Zorionak guztioi!!

Landaluzek EPOa hartu izana onartu du

Iñigo Landaluzek positiboa EPO CERArekinGaur jakin arazi denez, Iñigo Landaluzek aurten ekainak 7an Dauphiné Libéréko etapan eta 9 egun beranduago eginiko bi analisietan. Dirudienez lehenago ere txizaren dentsitatean aldaketak nabaritu zizkioten analisi egileek, baina ez omen ziren ezer ziurtatzeko modukoa. Gogora dezagun 2005ko Dauphiné Libéré berak irabazi zuela.

Kontuak kontu, Getxoko txirrindulariak onartu egin du hala izan dela eta 34 urte beteak dituela kontutan izanda, txirrindularitza profesionalari agur esango diola argi dago. Mamu beltzak, beraz, talde laranjara ere iritsi dira. Kezkatzen hasi behar ote dugu?

Astanak estu hartu du Cancellara

Astana. 4. etapan garaipena0 segundo. Hori da Cancellara eta Armstrongen arteko diferentzia sailkapen nagusian gaur jokatu den 4. etaparen ondoren. Cancellarak antolakuntzak berria eman duenean bi erroskillen keinua egiten zion norbaiti “0.0”. Gaurko etapan ez ziren diferentzia handirik espero, baina ia ia lidergo aldaketa izan da.

Etapari jarraipena egiten hasi naizenean Liquigasek zuen denborarik onena helmugan. Lehiatzen ari ziren gainontzeko taldeak ikusi ditudanean, orduan jakin dut Garmin-Splistream taldea 5 txirrindularirekin bakarrik ari zela lehian gainontzeko lauak bidean utzi ondoren. Eta ez ziren kilometro gutxi falta, baina arriskatzea erabaki du taldeak. Hori ikusita marka guztiak puskatuko zituztela uste nuen, baina ez da hala izan. Hala ere, Vandevelderen taldea helmugara sartzean denborarik onena egin dute.

Cancellararen Saxo Bank taldeak maillot horia defendatu beharra zeukan. Schleck anaiei ere komeni zitzaien denbora ona egitea eta horretan saiatu dira. Indarrak mugaraino eraman dituzte eta babesean joateko ahaleginak ere bai, behin baino gehiagotan elkarren kontra jotzeraino arriskatuz. Erreferentziak ikusita, bazirudien maillota mantentzeko gai izango zirela. Helmugaratzean Garmin-Splistreamen atzetik geratu dira baina Liquigasen aurretik 22 segundo soilik galduaz. Denbora ona zen, baina Columbia-HTC eta Astanak zer egiten zuten ikusi beharra zegoen.

Cavendishen taldeak aurre ikuspenetatik oso aparte ibili da. Bazirudien blokeak atzo bezala gaur ere etekina ateratzeko gai izango zela, baina ibilbideak hain estua izateak eta hain konplikatua, gauzak asko zaildu dizkio Columbia-HTC taldeari eta Liquigasen atzetik helmugaratu da.

Astana zen azkena helmugaratzen eta tarteko helmugetan denbora oso onak markatzen ari zen. Garmin-Splistream taldeari 17 segundoko tartea ateratzen zion helmuga horietan eta garbi ikusten zen etapa garaipena poltsikoan zuela, baina maillot horiaren lehian sartu da orduan bete betean. 3. mugarrian 41 segundo ateratzen zizkion eta Armstrongek Cancellararekiko zuen atzerapena 40 segundokoa zen. Birtualki Armstrong lider zen, baina helmugan 40 segundoko atzerapena izan dutela esan dute. Hortxe hasi dira zalantzak epaileek zerbait esan artean. Azkenean mili segundoak tarteko, Cancellarak maillot horia mantentzen jarraitzen duela adierazi dute.

Ikaragarria Astana taldeak eman duen erakustaldia. Ez dago esaterik talde lanean aritu ez denik. Bi oilar ditu oilategi honek, baina gaurkoan biek lan ukondoz ukondo egin dute eta ederki egin ere. Munduko talderik onena dela argi erakutsi dute eta gure zorionerako Haimar Zubeldiaren garaipena ospatu beharko genuke, helmugaratu den taldean baitzegoen gainontzekoek besteko lana eginda. Zorionak Haimar!!!

Aipatu era berean Euskaltel-Euskadik egindako lan bikaina. Bagenekien Tourrera joan aurretik taldeak erlojupeko hau prestatzen jardun zuela eta oso ondo egin dutela esango nuke. 10. postua lortu dute Rabobank bezalako talde baten aurretik.

Faboritoei dagokienez, gaurko etapak Evans eta batez ere Menchov kaltetu dituela esango nuke. Evans 2’59”ra jarri da eta Menchov 3’52”. Errusiarrak erorikoa izan du etapa hasieran eta horrek asko baldintzatu die gaurko erlojupekoa Rabobankeko txirrindulariei.

Biharko etapa laua izanik ere itsaso bazterretik egin behar dute ibilbidea eta atzoko mozketaren bat gerta daiteke tropelean, kosta aldean beti ere haizeak indar gehiagoz jotzen baitu. Hala ere, ez dut uste atzoko gertakaria errepikatzeko moduan izan daitekeenik guztiak ere tentuz ibiliko baitira. Gauzak ondo bidean eta helmugan gain saririk ez dagoenez, Pirinioetako etapen zain geratu beharko dugu sailkapen nagusian aldaketak ikusteko.

2009ko Dauphiné Libéré lasterketan euskaldunak aurrean

2009-Dauphiné Libéré. Mikel Astarloza eta Haimaz ZubeldiaLasterketa igandean bukatu bazen ere, ez nuen nahi euskaldunek Dauphiné Libéré lasterketan aurtengoan izan duten protagonismoa aipatu gabe utzi nahi. Mikel Astarlozak 5.  postuan amaitu zuen eta Haimar Zubeldiak, lehen urtez Astana taldean ari dela, 8. postuan. Top ten-eko sailkapenean, beraz, bi gipuzkoarrak.

Euskaltel-Euskadi taldeko txirrindulari pasaitarrak 4. etapan jokatu zen erlojupekoan ikaragarri aritu zen eta 9. sailkatzea lortu zuen. Ondorioz egun horretan dagoeneko 10. postuan zen eta sailkapen nagusiaren lehian sartu zen. Mont Ventoux-eko etapa zetorren hurrengo egunean eta Mikelek etapa ona eginda, sailkapen nagusian postu bat aurrera egitea lortu zuen. Zerbait gehiago nahi zuen Euskaltel-Euskadiko txirrindulariak, eta hurrengo egunean faboritoen artetik ihes egin eta han joan zen aurrera denbora atera asmoz. Zalantzarik gabe gogorra egingo zitzaion ibilbidea, baina lortutako etekina ere ez zen nola nahikoa izan. Briançongo helmugan bigarren euskalduna izan zen Bingen Fernandezen atzetik eta talde nagusiari ia minutuko errenta ateratzea lortu zuen. Denbora tarte nahikoa 9. postutik 4.eraino jauzi egiteko. Lan ikaragarria pasaitarrak egindakoa. Podiumeko postuak eskura geratu zitzaizkion, baina hurrengo egunean St Frnaçois Longchampeko igoera zuten. Zoritxarrez Mikel Astarlozari aurreko eguneko gain esfortzuak ez zion barkatu eta fabortoi jarraitu ezinda geratu zen. Hala ere oso ondo egin zuen azken igoera eta postu bakarra galdu zuen. Bostgarren amaitu zuen, beraz, 2009ko Dauphine Libéréko lasterketa edizio honetako protagonistetako bat izanda.

Haimar Zubeldiak Mont Venouxeko etapan eman zuen kolpea. Szmyd eta Valverderen atzetik, 3. helmugaratu zen aurtengo Dauphine Libéré lasterketako garailea erabaki zuen etapan. Bezperako erlojupekoan ez zen lehen ibiltzen zen bezain ondo jardun, baina mendian aspaldiko ondoen ikusi genuela esan daiteke. Sailkapen nagusian 5. postura igo zen eta bere taldeburuaren ondoren, bera zen sailkapen nagusiko bigarrena. Briançongo etapan Mikel Astarlozak ez bezala, berak denbora galdu zuen 7. posturaino jaitsiz. Normala izan zela esan daiteke bere helburua Astanako taldeburuari laguntzea baitzen. Azken aurreko etapan ere, oilarren lehia zela eta, denbora gehiago galdu eta 8. postuan amaitu zuen. Usurbildarra ere, beraz, ikaragarri.

Bi euskaldun lehen hamar postuetan. Eta sailkapen nagusian pixka bat aurrerago egiten badugu Txente Garcia eta Igor Anton aurkituko ditugu 15 eta 18. hurrenez urren. Emaitza pozgarriak zalantzarik gabe euskal zalegoarentzat. Tourrean beste horrenbeste egiteko gai izango al dira gure txirrindulariak?