Sari banaketa ederra!

Irabazleak beraien sariekinGaur iluntzean egin da Zestoako bainuetxean sari banaketa eta jende dezente bildu gara. 36 sari genituen banatzeko eta irabazle gehienak horiek jasotzera hurbildu dira Zestoara.

Kepa Iribar Euskadi Irratiko kiroletako kazetariak eraman du sari banaketaren gidaritza eta sariak banatzen Iker Leonet (Caisse d’Epargne) oiartzuarra eta aurtengo Tourra bukatu berri duen Mikel Astarloza (Ag2r) izan dira. Hasteko, bi txirrindulariek pare bat galdera erantzun dizkiote Kepari eta eguneko berria ere jorratu dute, Astarlozak gaur bertan itxi baitu datozen bi urteetarako kontratua Euskaltel-Euskadi taldearekin. Oso gustura zegoen pasaitarra.

Ondoren, banan-banan 21 etapetako irabazleak “Sari banaketa ederra!” irakurtzen jarraitu

Danimarkako lehen etapa eta lidergoa Galdosentzat

Galdos podiumeanLehengo astean Valoniako itzulian egin zuen bezala gaur Danimarkako Itzulian lehen etapa irabaztea lortu du eta ondorioz lidergoa ere bai. Ea Valonian baino egun gehiagoan mantentzen duen lidertza.
Danimarkako Itzuliak, ordea, maila hobea du. Ikusi besterik ez dago ermuarrarekin batera bere atzetik zein saru diren: Haselbacher (Gerolsteiner) eta O’Grady (CSC). Biak esperientzia handikoak eta azkarrak.

Sailkapen orokorrean Aitor Galdos dugu lider, noski eta gainsariei esker, 4 segunduko aldea ateratzen dio Haselbacherri eta 6 segundukoa O’Gradyri.
Animo Aitor eta jarraitu horrela!! Beharbada bi garaipen hauekin talde handiagoek arreta gehiagorekin jarraituko zaituzte.

Eneritz Iturriaga Espainiako erlojupekoko txapelduna

Eneritz erlojupekoanIazkoa errepikatuz Eneritz Iturriaga (Fassa Bortolo Top Girls) aurten ere Espainiako txapelketan erlojupean irabazita etxeratuko da. Denboraldi erdia osasun arazoekin ibili da baina Italiako Giroan txukun aritu ostean aurtengo bere lehen garaipena lortu du. Gainera nahiko erraz lortu duela esan genezake uneoro denborarik onenak markatuz joan baita eta azkenean minutu bateko aldea atera baitio bigarrenari.

Cristina Alcaldek egin duen lan bikaina ezin aipatu gabe utzi, nafarrak 4. postuan sailkatzea lortu baitu.

Beste euskaldunei dagokienez, Maria Gallastegi zazpigarrena izan da, Iosune Murillo eta Leire Olaberria 12 eta 13. postuetan geratu dira eta Agurtzane Elorriaga 18.a.

Txurruka eta Azanza Euskaltel-Euskadira

Amets TxurrukaEuskaltel-Euskadi taldea datorren urterako txirrindulariak lotzen hasi da. Gaur bertan Kaiku taldeko Jorge Azanza eta Barloworld taldeko Amets Txurrukaren fitxaketak itxita daudela adierazi dute. Bestalde, Gorka Verdugori beste bi urtez luzatu diote kontratua beraz, 2008ra arte etxeko taldean arituko da.

Ea etxeko talde laranjak fitxaketa (eta ez fitxategi) on batzuk egin eta taldea sendotzeko aukera duten, hor zehar, beste taldeetan sakabanatuta dauden euskal txirrindulariekin benetako talde indartsua egin baitaiteke. Hori bai litzatekeela benetako euskal selekzioa!!

Fitxaketak hasi dira. Ea zenbat datozen eta zenbat doazen. Gainera, gogoratu Haimar Zubeldia eta Iban Mayoren kontratuak ere aurten bukatzen direla. Samuel Sanchezek ere aurten bukatzen zuen baina luzatu zioten duela egun batzuk.

Tourrean positibo bat. Landis ote?

Tour2006 podiumaAtzo Tourreko kontroletako batean positibo bat egon zela adierazi zuten. Nik neuk txirrindulari “arrunt” batek emango zuela pentsatu eta ez nion garrantzia handiegirik eman. Gainera prentsa espainiarrak espainiarra ez zela esan zutenez, euskaldun batek ez zuela positibo hori eman pentsatu nuen.

Baina hara non, berria zabaltzen hasi da eta Danimarkako egunkari batean Floyd Landis-en izena agertu da susmagarri nagusi bezala. Badirudi azken egunetan parte hartu behar zuen kriteriumetara ez dela agertu eta gainera ezin dituztela lokalizatu. Egia ote da?

Oraingo honetan bai, txirrindularitza pikutara doa… Azken hiru itzuli handietako irabazleak doping kasuengatik kakaztuta… Iazko Vueltan Roberto Heras, Giroan Iban Basso (eta Gutierrez bigarrena) eta orain, Landisena Tourrean.

Oraindik ez da konfirmatu eta gainera kontranalisien zain egon beharko dugu baina… nik argi daukat. Informazio gehiago daukagunean emango dizuegu. Galdera honako hau da: Noiz jakingo dugu zein den aurtengo Tourreko irabazlea? Eta podiuma, argazkian dagoen bezala mantenduko al da?