Tropela.eus bloga

Atzo izan zen Het Volk probak eman zion, hain ikusgarriak suertatzen diren Belgikako klasikoen denboraldiari hasiera. Harbidezko errepide zatiak eta muino motz eta pikoez osaturiko lasterketak izaten ditugu berauek. 3 asteko itzulietan bezala, proba hauetarako espezialistak izaten dira eta zaila izaten da “ezustekorik” izatea.

Iaz Milano – San Remon garaile izan genuen Filippo Pozzato nagusitu zen atzoko Het Volk sarian. Dudarik gabe probako txirrindularirik indartsuena zela erakutsi ondoren, eskuak igota izan genuen helmugan. Flecha eta O’Gradyren atzetik zihoan laukotean erreleborik indartsuenak eman ondoren, azken metroetako erasoaldi bat nahiko izan zitzaion garaile irteteko. “Quick Step-eko hierarkiatik aske, nagusi!!!” irakurtzen jarraitu

Azken egunetan asko aipatzen zen gaia izan arren, gaurkoan baieztatu den arte ez zen ziurra berria. Hala ere, Jan Ullrich alemaniarrak txirrindulari profesionala izateari utzi dio.

Hilabeteak zeramatzan errepidean agertu gabe. Oker ez banago bere azken lasterketa Suitzako Tourra izan zen, bertan irabazle izan zelarik. Egun batzuk aurretik Puerto Operazioa martxan zen eta garaipen honen ondoren hasi ziren “Rudicioren semea” zela zioten informazioak, eta horrekin batera Frantziako Tourrean parte hartzeko debekuarekin lotuta, gaur eman duen berria.

Alde batetik pena ematen dit hain ona izan den txirrindulari batek bere lana modu horretan utzi beharrean ikusteak. Gainera, Puerto Operazioan agertu ziren izen batzuk korritzen jarraitzen dute (Basso, Caruso, A.Davis, Mancebo…) eta beste batzuk utzi beharrean edo talderik gabe geratu dira (Ullrich bera, Osa anaiak, D.Etxebarria, Beloki). Orain dela pare bat aste ireki nuen berria hor egongo da gai honi buruz hitzegiteko.

Baina bestalde, bada pena ematen didan beste arrazoi bat. Ullrich badoa, doping kasu batetan zipristinduta (bai, badakit ez duela positibo eman baina betikoan gara) eta ez du ezer garbitu eta aklaratzen lagundu. Tropeleko izarrek zer dagoen esaten ez badute, nola konponduko dugu ba dopingaren orbana txirrindularitzan? izarrek eman beharko lukete etsenplu, Ullrich berak, Basso eta abarrek, baina ez, begiak itxi eta ezer argitzeko asmorik gabe txirrindularitza bizitzaren amaierarte iristen dira. Hau bai dela penagarria niretzat.

Denboraldia hasi berria izan arren, hasi dira tropeleko izarrak agertzen. Garai aproposagoa izan ohi da txirrindulari ezezagunentzat, “onenak” helburuak beranduago izateagatik ez direlako oraindik bere sasoi punturik onenean izaten.

Hala ere, berezko kalitatea dela medio, jadanik ikusi (nire kasuan entzun eta irakurri bakarrik) ditugu Boonen (Qatar), Leipheimer eta Bettini (Kalifornia), Freire (Andaluzia), Eisel (Algarve) edo Bennati (Mediterraneo) bezalako txirrindularien garaipenak.

Hauek guztietatik Freirek dirudi sasoi punturik onenean. Milano – San Remo izango du helburu nagusitzat eta ikusten da ondo preparatuta dagoela. Andaluzian 2 etapa garaipen lortu eta beste bat bere taldekideari utzi ondoren, sailkapen nagusia etxera eman du. Oso indartsu hasi du denboraldia kantabriarrak.

Hala ere, denboraldi honen hasierako izar nagusia Ignatiev ari da izaten. Garaipen bat baino gehiago lortu du eta aditu askok ematen dioten etorkizun bikaina berehala hasi da baieztatzen. Ikusiko dugu hala ere, kasu honetan ere ez den gertatzen garai bateko sobiet batasuneko herrikide askori gertatu izan zaioan, denboraldi motx batean sekulako indarra eta erakustaldiak egin eta bere horretan geratu. Ez ahaztu Berzin, Bobrik, Gontchenkov edo beste maila batetan Popovych bezalako izenekin. Azken hau oraindik gaztea da eta agian ez nuke beste izenekin batera jarri behar baina antzeko bidea hartzen hasi da. Ignatiev gaztea oso gertutik jarraitu beharko dugu hala ere.

Urteak joan, urteak etorri, bai txirrindularitzan, bai beste edozein kiroletan, denboraldi hasieran aurreikuspenak egin izan ohi dira. Urte bukaeran ezer gutxi asmatu dela ikusten bada ere, denok gara zaleak bere aurreikuspenak ematen, norberaren intuiziotik harutz ezer ez baldin badakigu ere. Ez noa urtean zehar izan daitezkeen izar handiei buruz ezer idaztera, denon ahotan dabiltzan Basso, Valverde, Boonen, Bettini edo Vinokouroven izenak esateak ez baitu inongo ekarpenik egiten. Ezagutuko dituzuen, baino gutxiago entzuten diren txirrindulari gazteei buruz pare bat hitz egitea nahiago nuke.

Marcus Fothen

Iaz Cunegorekin lehia gogorra izan ondoren, Tourreko gazterik onenaren maillota galdu zuen azken momentuan. Aurreko urtean Giro polita egin eta iaz Tourrean ere ondo moldatu daitekeela erakutsi du, eta urtetik urtera aurrera doala erakusten du. Erlojupekoetan habila, datozen urteetan itzuli handietan kontutan hartzen hasi beharko dugun txirrindularia.

Vincenzo Nibali

Asko espero dut txirrindulari italiar honengandik. Klasiko batzuetan, itzuli txikietan eta itzuli haundietan ondo ibiltzeko ahalmena duela iruditzen zait. Debuta Fassa Bortolon egin ondoren, Liquigasen dago, eta aurtengo hau bere gorakadarena izan daiteke. Oso gustuko dudan txirrindularia, indar pixkat duen bakoitzean aurrean dagoela esateko bere burua agertzen duen horietakoa. “Gazteen ordua?” irakurtzen jarraitu