Kategoria Artxiboak:Txirrindularitza

17. etapa: Pau – Revel

Hau da hau etapa luzea!!!! Tourreko azkeneko astean sartu gara eta 239,5km dituen etapa amaitu beharrean izango dira txirrindulariak. Uste dut etapa garaipenaren borrokak bakarrik manten dezakeela telebista aurrean dagoena loak hartu gabe. Egon ziur gaurkoan ihesaldia iritsiko dela helmugara, ez daukat zalantza handirik, eta gainera, bertan sailkapen nagusian 20-25 aurrenekoetan dagoen txirrindularirik sartzen ez baldin bada alde handiarekin gainera. Davitamon-Lotto edo beste talderen batek kontrol lana egiteko etapa luzeegia da, ezin da etapa hasieran sortu daitekeen ihesaldia hainbeste denboran kontrolpean izan. Agian Tour hasieran eta esprinterako nahia zuten talde gehiagorekin bai, baina gaurkoan ia ezinezkoa ikusten dut.

Uste dut, benetan oso txirrindularitza zalea denak bakarrik ikusiko duela gaurko etapa bere osotasunean. Gomendio bat ematen baimendua baldin banago, aprobetxatu ezazue bazkalondorena lo kuluxka egiteko eta ikus azkeneko 15km, agian nahikoa izan baitaiteke etaparen zatirik interesgarriena ikusteko, ez espero gaurkoan azken 50km-tan ezer berezirik gertatuko denik.

Ihesaldian zein sartuko denaren aurreikuspena eman beharrean nago, lan zaila beti moduan. Atzoko ihesaldian sartu izan ez balira Flecha edo Gilbert esatea pentsatuta neukan, ez zait iruditzen ordea bi egun jarraian tropelari aurrea hartuta ibiltzeko indarrik izango dutenik, hobe izango dute hurrengo bi etapetarako indarrak gordetzea. Beraz, izan dezagun euskaldunen bat bertan izango denaren itxaropena, zergatik ez, Landaluze, Garate edo Txente bezalako txirrindulariren bat. Etapa mota hau beraien ezaugarriei ondo etortzen zaien txirrindulari gehiago ere badira, Arvesen, Commesso, Posthuma eta batez ere Erik Dekker edo Laurent Brochard. Agian, azken bi hauetakoren bat Revel-go helmugan besoak igota ikusteko moduan izango gara.

16. etapa: Mourenx – Pau

Pirinioetako azken etapa burutuko dute txirrindulariek gaurkoan, Mourenx eta Pau artean 180,5km-tan pedalei eman ondoren. Aurreko bi egunetan garbi geratu da, ezbeharrik ezean, aurten ere Lance Armstrong izango dugula horiz jantzita Parisko kaleetan. Basso izan daiteke podioan bere alboan eta hirugarren postua Rasmussen eta Ullrichek jokatu beharko dute larunbateko erlojupekoan, ostegunean Mende-n bukatzen den etapak besterik esaten ez baldin badu behintzat.

Gaurko etapa, Pirinioetako hirugarrena izanda ere, ez da sailkapenean aurrean dauden txirrindularien artean borroka ikusteko aproposena. Hobea da sailkapenean atzeratuxeago dauden (10. postutik atzerago dagoen jendea)eta ihesaldiari probetxua atera ondoren postu dezente aurreratzeko erabiltzeko. Ez zait iruditzen Basso, Ullrich, Rasmussen, Mancebo, Landis edo Leipheimer bezalako txirrindulariak gaurko mendateetan mugituko direnik eta hala baldin bada euren taldeak izango dira erasoaldi horiek behera botatzen jardungo dutenak. Duten postua mantentzeko lanetan gehiago ikusten ditut, arriskatu eta goragoko postuen begira baino.

Ia egunero bezala etapa hasieran ihesaldi bat sortuko da eta ezusteko handirik ezean ihesaldia Pau-ko kaleetara tropelari aurre hartuta iritsi daiteke. Zein sartuko diren ihesaldi horretan? Zaila benetan asmatzea, baina aurreko eguneko estrategia berdinari jarraituz, Hincapie ihesaldian sartu zutenean bezala, Discovery taldeak oraingoan Popovych izan daiteke bertan, kontrol lana egiteko aitzakiarekin, ihesaldiaren atzeko partean jarri eta lan gehiegirik egin gabe sailkapen nagusian aurrera egiteko arriskua izanez. Beste iheskide posible batzuk Mazzoleni, Casar, Contador, Jaksche, Kashechkin, Julich, Fedrigo, Garate, Arroyo, Goubert, Gilbert, , Kessler, Q. Gutierrez, Egoi Martinez, Mayo (gaurko izan daiteke, ostegunekoarekin batera agertzeko azken aukera) bezalako txirrindulariak izan daitezke. O’Grady ere ziurrenik saiatuko da ihesaldi horretan sartzen bai baitaki tropelari aurre hartuta ez bada mendateak igotzen hasten denbora asko galduko duela eta horrekin batera mailot berdea irabazteko aukera txikiak galduko dituela. Ihesaldietan lortutako puntuekin du mailot berdea irabazteko aukera eta justu horretantxe saiatuko den susmoa daukat. Agian gaurkoa ez du horretarako aproposena baino ziur astean zehar ihesaldietan sartzen saiatuko dela.

Garaipena ihesaldian sartzen direnen artean jokatuko dela iruditzen zait, ez baitzait iruditzen tropelean esprintera iristeko asmoarekin lana egiteko gogoarekin talderik izango denik eta gogoa izanda ere indarrak faltako direla iruditzen zait. Beraz, garaile posible bat emateagatik eta ezusteko bezala Eddy Mazzoleni esango dut, bere taldean Cunego eta Simoniren faltan, Tour polita egiten ari den italiarra.

Azken astean sartu gara

Jada gutxi falta da txapeldunak ezagutzeko. 'Tropela elkarteko zenbait kide Piriniotan izan gara euskal txirrindulariak eta gainontzekoak animatzen, baina berriro hemen gara garaileen berri emateko.

13. etapan Igor Gonzalez Galdeanoren maillota lore elgoibartarrak irabazi zuen, 14. etapan Patxi Vilaren maillota mlezertua etxauriarrak eta 15.etapako maillotak horiek Aulestiko pototok Gorka Gonzalezen maillota, yontxu eibartarrak Iker Leonetena, AINHOA itsasondoarrak Ruben Oarbeaskoarena, altuna arrasatearrak Joseba Zumetarena eta Ekai donostiarrak Javier Ruiz de Larrinagarena. Sailkapen nagusian jexux usurbildarra da oraindik lider.

Zorionak guztiei eta gure eskerrik beronak txirrindulari hauei eskaini dizkiguten maillotengatik.

15. etapa: Lezat Sur Leze – St. Lary Soulan

Zalantzarik gabe Tourreko etaparik gogorrena dugu gaurko hau. Ezin da beste modu batetara kalifikatu 205km, horietatik 52km igoeran eta batez beste %7 inguruan dabiltzan maldez osatutako etapa hau.

Etapa aproposa hau ere urrunetik erasoak jotzeko baina urteak joan, urteak etorri mendiko azken etapan bakoitzak duen postua hobetzea baino mantentzeari begiratzen dio gehiago. Eskalatzaileak (hemen sartzen ditut Rasmussen eta Mancebo adibidez) saiatu daitezke hala ere erlojupekoan ondo ibiltzen direnak (Ullrich, Leipheimer, Landis) ahal bezain asko atzeratzen, hauek ez baitute azken erlojupeko luzean hutsik egingo.

Etaparen garaipena, hala eta guztiz ere ihesaldi batean egon daiteke. Beti moduan tropelak hartzen duen jarreraren menpe eta batez ere ihesaldian sartzen diren txirrindularien sailkapen nagusiko postuen menpe izango da etapako garaipena lortzeko aukera izatea edo ez.

Sailkapen nagusirako mehatxu handirik gabeko ihesaldia sortzen bada ez nintzateke harrituko Popovych bertan izatea, kontrol lana egiteko aitzakiarekin postu mordo bat aurreratzeko arriskua izango baitu. Hori, beti ere ihesaldi horretan sailkapenean bere aurretik dagoen beste txirrindularirik ez baldin badago, bestela estrategia horrek ez baitio balio.

Aurreneko mendatea baino lehen edo bertan sortu daitekeen ihesaldiak aurrera egin dezake, ez zait iruditzen sailkapen nagusiko hautagaiak azken bi mendateak iritsi arte mugituko direnik. Ikusiko dugu ihesaldi honetan zein sartzen diren baina Vinokourov, Botero (sailkapen nagusiko itxaropenak galdu ondore baliteke mendiko maillotaren borrokan sartzea), Pereiro, Contador, Garate, Sastre, Totschnig, Heras… bezalako txirrindulariak sartuko balira ezin harritu. Mayo, aurreko egunetan baino hobeto ikusten bada ihesaldi honetan sartzen saiatu behar luke, Tourra jokatzen ari diren oilarrekin buruz-buruko borroka batean jai izan baitezake azken mendateetan.

Ihesaldirik iristen ez baldin bada, Lance Armstrong hautagai nagusitzat ematea besterik ez zaigu geratzen. Azken 6 urteetan ikusi diogun anbizioa ez zait iruditzen egun batetik bestera galduko zuenik eta etaparen garaipena lortzeko aukera ikusi ezkero egon seguru saiatuko dela (eta ez da urruti ibiliko!!). Aurtengo Tourrean gainera oraindik ez du garaipenik eta ez du gustuko izango egoera horretan jarraitzea.

14. etapa: Agde – AX 3 Domaines

Hemen ditugu Pirinioak!!!! Eta horrekin batera bi etapa oso gogor eta erabakigarriak. Euskaldunez osaturiko mendateetan, kamixeta laranjak nagusi direlarik (Tropela.net-ko kamixeta pistatxoak ere bat baino gehiago ikustea espero dugu, salgai ere izango ditugu bertan) Tourra irabazi nahi dutenek hanketan dituzten indar guztiak bertan utzi beharra dauzkate. Hemen bai ez dagoela hurrengo egunen zain hasterik.

2003 urtean Carlos Sastrek ihes eginda irabazi zuen etaparen oso antzekoa dugu, bertan Armstrong-ek azken urteetan erakutsi duen ahulaldietako bat (ahulaldia baldin bada behintzat segundutxo batzuk atzeratzea!!!) ikusi ahal izan genuelarik.

Aurtengo Tourrean ez dira urrundik erasoa jotzeko prestatuta dauden etapa asko baina gutxietako bat gaurko hau dugu. Pirinioetan igotzen den mendaterik gogorrenetakoa (gogorrena ez esateagatik) dute, Pailheres, 15 km bataz beste 8,1%ko maldekin. Mendate hau jaitsi orduko azken igoera hasten da, beraz, aproposa urrunetik erasoa jotzeko, hala ere, azken urteetako jendearen portaera ikusirik beldur naiz sailkapenean aurrean daudenen arteko borroka azken 5 km-etara mugatzea.

Pailheres mendatean sailkapenean atzeraxeago dauden Vinokourov, Botero, Evans, Kashechkin bezalako txirrindularien erasoak espero ditut, agian Rasmussenena ere bai hala ere aurten oraindik garaipenik ez duen eta horretarako irrikaz beteta dagoen Lance Armstrong izango da hautagai nagusi AX-3-Domaines gainean. Gainera, Courchevel-en gertatu zitzaiona errepikatzea, hau da, esprintean norbaitek irabaztea, oso zaila ikusten dut, Valverderen faltan, amaieran beraren adinako abiadarik duenik ez baita Tourreko tropelean.