Egile Artxiboak:Aritz

Pozgarritzat hartu behar genuke Jan Ullrich alemaniarraren maila duen txirrindulari batek Italiako Giroan parte hartu behar duela jakiteak baina Frantziako Tourrak hainbesteko indarra duen eta askoren urteko helburu bakarra den momentu honetan, berri honek niretzat indar guztia galdu du. Izan ere, garbi dago alemaniarra Girora kalitatezko kilometroak egitera doala, beti ere bere burua uztailera begira jarrita. Ia behintzat egunen batean bere maila ikusteko moduan garen baino egia esanda, harrituko ninduke.

Askoren hitzetan, uztailean Frantzian arerio nagusia izan daitekeen Ivan Basso ere Giroan izatekotan da, honen kasuan ordea irabazteko asmoarekin, bere talde zuzendaria den Bjarne Rijs daniarraren gomendioei kasurik egin gabe. Rijsek, Armstrongen falta dela eta, italiarrak helburu bakarra izatea nahi omen zuen, Frantziako Tourra, baina Ivan Bassok ez du Frantziara aurretik Giroan irabazteko saiakera egin gabe joateko asmorik. Mentalitate aldetik behintzat desberdintasun galanta. Continue reading “Ullrich Giroan izango dugu”

Gainean dugu iaz UCI Pro Tour ligarekin batera desagertu zen Munduko Kopako lehen klasikoa. Ez gainera edozein klasiko, Flandriako Tourra, Paris – Roubaix, Liege – Bastogne – Liege eta Lombardiako Giroarekin batera “5 monumentuetako” bat baitugu Milano – San Remo klasikoa.

Azken urteetan askotan errepikatzen den esprinta ekiditeko, urtero ibilbidean sartu asmo dituzten aldaketei buruz irakurri ahal izaten dugu, baina aurten ere ez da azkenean aldaketarik izango eta Cipressa eta Poggio mendateak izango ditugu puntu ikusgarrienak bezala. Ez da erraza izango, berriro ere, Via Roman esprinta ikusi gabe gelditzea, ez baitira garai batean bezalako erabakigarriak sortatzen ibilbideko mendatetxoak eta gaurko sprinterrak “erraz” pasatzen dituzte berak. Gainera, hain sasoi puntu onean zegoen, eta tropela hausteko gaitasuna duen gutxietako bat, Paolo Bettini, erorketa baten ondorio, zalantza da. Continue reading “Eta larunbatean… “classicissima””

Aspaldidanik entzun dut ortzadar maillota soinean daraman gizonak denboraldi horretan ez duela arrakastarik lortzeko modurik izaten.

Egia esateko ez dakit noiztik eta nondik datorren kontu hau, baina egia da azken urteetan, gehiago edo gutxiago, maldizio hori bete dela. Astarloak Kanadan irabazi ondoren, Freire bere lesioekin… baina aurtengo honetan marka guztiak hautsi ditzakeen txirrindulari baten soinean dagoela uste dut. Kontua oker ez baldin badut, Tom Boonenek 10 garaipen lortu ditu dagoeneko, eta denboraldia ez da hasi besterik egin!!!! Egia da oraindik berak esandako helburu nagusiak ez direla iritsi eta horiek pasatakoan egin beharko dugula balantzea baina ortzadar maillota norbaiten bizkarrean ondo badago, belgikar gazte honen bizkarrean dagoela iruditzen zait. A zer txirrindulari puska!!! Ba al da hau baino txirrindulari hoberik zuentzat?

Jakina da tropelean diru kantitate oso desberdinak mugitzen dituzten taldeak ditugula. Ezin daitezke konparatu adibidez Quick Step, CSC, Discovery edo T-Mobile taldeen diru indarra, askoz ere apalagoak diren Bouygues, FDJ edo AG2R taldeenekin eta hori epe luzera, garaipenak lortzerako orduan, nabarmentzen da.

Hala ere, denboraldi hasiera honetan behintzat diru alde hori ez da gehiegi nabarmendu, agian Quick Step taldearen kasua ezik. Jakina da betidanik klasikoetarako talde zoragarria izan dutela, baina aurtengo denboraldi hasiera ez da hobetu erraza. Jakina, Tom Boonen eta Paolo Bettini talde berean edukitzearen abantailak ditugu horiek. Ez ahaztu hala ere, talde berekoak direla Nuyens gaztea, Pozzato, Garate edo ekainetik aurrera Rujano bezalako txirrindulariak. Continue reading “Talde indartsuak ezkutuan”

Apirilaren 3an Irunen hasi eta 8an Zallan amaituko den aurtengo edizioa aurkeztu berri dute. Euskal Herrian, Donostiako Klasikoarekin batera antolatzen den UCI Pro Tourreko lasterketa bakarra.

Bereziki bi aldaketa nabarmendu daitezke ibilbidean. Batetik aurten 6 eguneko lasterketa izango dugula, eta nolabait horrekin lotuta, azkenengo egunean aspaldiko erlojupekorik luzeena ikusiko dugula. Egia da Euskal Herrian zerbait baldin bada mendate motz eta ugarien kopurua dela, eta aurten ere makina bat ikusteko moduan izango gara, hala eta guztiz ere, batez ere erlojupekoan nabarmentzen den norbaitek irabaziko duenaren susmoa dut. Ez zait iruditzen batez ere goraka nabarmentzen diren txirrindulariek sailkapen orokorrean nagusitzeko adinako ibilbiderik dutenik, ez behintzat azkenengo eguneko erlojupeko kilometro kopuruarekin parekatzeko adinakoa.

Eta hori aurreneko bi etapa oso gogorrak izango direla kontutan hartuta. Ez baita txantxetakoa aurrenekoan Erlaitz (tropela apurtu behar luke) eta Jaizkibel helmugatik hain gertu izatea eta asteartean 11 mendaterekin osatutako etapa bat burutu beharra izatea. Ziur egon bi etapa hauetan tropeleko hainbat eta hainbat txirrindularik sailkapen orokorreko aukera guztiak galduko dituztela. Hala ere, oso zaila iruditzen zait lasterketa azken erlojupekoa baino lehen erabakita egotea. Oso gutxiren artean egongo dela garaipena azkenengo egunean? Litekeena da, baina txirrindulari bakar bat alde nabarmenarekin iristea zaila deritzot.

Oraindik goiz da hautagaien izenak emateko, baina argi samar dut zein motatako txirrindulariez apustu egingo nukeen.