Gure aditua

21. etapa: Corbeil Essonses – Paris

Tourra, eta honekin batera Tropelaren ibilaldia, aurtengoz amaitzear da. Agian aurreko urtetako nagusitasunik ez digu erakutsi Lance Armstrong-ek, batez ere mendateetan, nahiz eta mendiko etapetan beti beti aurrean ikusi izan dugun txirrindulari bakarra izan. Bere taldeak ere agian ez du erakutsi aurreko urtetako nagusitasun zapaltzailea baina hala ere onenak izan dira… laburbilduz, azken urtetako egoera berdina, talderik onenaz inguratutako txirrindularirik onenak irabazi du.

Datorren urterako beste guztiak eguzki printzak ikusten hasiak izango dira, ia nor dugun estatubatuarraren lekukoa hartzen duena. Denen ahotan Ivan Basso dabil baina 21 egunetan hainbeste egoera ematen diren kirol batekin zaila baldin bada aurreikuspena ematea, zer esan urtebete gelditzen denean? Ullrich, Cunego, Valverde, Popovych, Leipheimer, Pereiro, Vinokourov, Contador, Mayo (zergatik ez?)… hor izango ditugu berriro ere eta garaia iristen denean ikusiko dugu zein dugun garaile.

Parisko Champs Elysees-tan amaitzen diren etapa gehienak esprintean amaitu izan dira. Badira salbuespenak hala ere, Eddy Seigneur frantziarraren kasu. Gaurkoan ere logikari jarraituz esprint bat ikusi behar genuke baina egia esateko aurreko urtetan adinako garbi ez dut ikusten hala izango denik. Hushovd-i, maillot berdearen jabea izaki, ihesaldi bat iristea komeni zaio. Hori ekiditeko, Davitamon-Lotto eta Cofidis taldeak izan behar lukete interes gehien jarri behar luketenak eta agian Francaise des Jeux edo Gerolsteinerrek ere bai esku bat bota dakieke baina denen indarrak gutxituta daudela garbia da eta ez nuke esprinta segurutzat joko. Azken kilometroetan sortzen den ihesaldian Francaise des Jeux, Cofidis eta Gerolsteinerrekoren bat sartuko balitz, Davitamon Lotto taldea bakarrik geldituko litzake tropel buruan eta orduan etor daitezke arazoak.

Aurreikuspena emateko logikari jarraituko diot eta ia gehienok buruan izango duzuen Robbie McEwen australiarraren izena emango dut, baino ez nuke ihesaldian garaile izan daitezkeen izen batzuk eman gabe gelditu nahi, Bradley McGee edo Fabian Cancellara adibidez.

Gozatu azken etapa Tropelarekin eta zorionak porrako garaile izan direnei!!!

20. etapa: St. Etienne – St. Etienne

Aurten ez dute erlojupekoan ondo ibiltzen direnek aukera gehiegirik izan. Gaurkoan 55 km dituzte baina ez espero garai honetan erlojupekoan espezialista hutsak direnek irabazteko aukerarik izango dutenik, ez behintzat eguraldiak edo beste baldintzaren batek aurkakorik esaten ez badu. Gogoratu 2003 urtean izan zen azkeneko erlojupeko, bertan Millar, eguraldi txarraren ondorioz garaile izan zela.

Gaurko hautagai nagusia Lance Armstrong dela esateak ez dut pentsatzen inor harrituko duenik. Aurtengo denboraldi osoan ez du garaipenik eta bera ezagututa ez dut uste horrek grazia handirik egingo dionik. Tour honetako “boss”-a dela behin betikoz garbi uzteko ere asmoa izango duela iruditzen zait eta ziurrenik hori lortu ere bai.

Agian, etapa garaipena lortzeko baino handiago izango da podiumeko 3. koska edo 10 aurrenekoen artean posturen bat irabazteko borroka. Armstrong eta Basso-ren aurreneko eta bigarrengo postua ia ziur daude, ez ordea Rasmussen-ek momentu honetan duen 3.a. Atzo Ullrich-ekiko galdu zituen segundotxoak erabakigarriak izan daitezke. Kolokan dauden beste postuak Mancebo eta Leipheimer-en artekoa eta Evans, Vinokourov eta Landis-en artekoak izan daitezke. Kasu hauetan, azkenean Ullrich, Leipheimer eta Vinokourov garaile irtengo direla iruditzen zait.

Beraz, etapa garaipenerako Lance Armstrong da hautagai nagusia eta sailkapen nagusia honela gelditu daitekeela iruditzen zait:

Armstrong
Basso
Ullrich
Rasmussen
Leipheimer
Mancebo
Vinokourov
Evans
Landis
Pereiro

19. etapa: Issoire – Le Puy en Velay

Etapa ehiztarientzat azken aukera. Hainbeste denboran Tourra prestatzen eman duen jendearentzat ere bai, eta nola ez, garaipenik ez duten taldeentzat ere bai. Larunbata eta igandeko etapak gelditzen direla esango didazue eta arrazoirik ez zaizue falta, hala ere bi garaipen horiek oso jende gutxiri mugatuta egongo direla jakina da, sailkapen nagusiko jendearentzat larunbatekoa eta esprinterrentzat igandekoa (aurten hala ere neure dudatxoak dituk esprinta egongo den edo ez esaterakoan).

Azken egunetan bezala etapa hasieran sekulako borroka izango da Issoire eta Le Puy en Velay lotzen dituen etapan. Behin ihesaldia sortutakoan etapa lasaiak direla dirudite baina aurreneko kilometroetan egunak joan, egunak etorri, sekulako batezbestekoak ateratzen dituzte, egoten den borroka itzelaren seinale.

Harritu nau orain arte Txente ihesaldietan ez ikustea. Urtero izaten du etaparen batetan bere protagonismoa eta agian hauxe izan daiteke. Izango dira hala ere etapa hau begi artean sartuta duten beste hainbat txirrindulari eta seguru horietako batzuk Flecha, Halgand, Dekker, Gilbert, A.Davis edo Commesso izango direla. Esan ditudan txirrindulari hauetatik bat aukeratzea ez da lan erraza baino argentinan jaiotako Juan Antonio Flecha kataluniarragatik egingo dut apustu.

Nahiz eta ihesaldia helmugara iritsi, zeharo talde handia ez bada, tropelean maillot berdeagatik borroka izaten jarraituko du, soberan gelditzen diren puntuak irabazi asmoz, noski, beti ere berauek ihesaldian sartzen ez baldin badira.

17. etapa: Pau – Revel

Hau da hau etapa luzea!!!! Tourreko azkeneko astean sartu gara eta 239,5km dituen etapa amaitu beharrean izango dira txirrindulariak. Uste dut etapa garaipenaren borrokak bakarrik manten dezakeela telebista aurrean dagoena loak hartu gabe. Egon ziur gaurkoan ihesaldia iritsiko dela helmugara, ez daukat zalantza handirik, eta gainera, bertan sailkapen nagusian 20-25 aurrenekoetan dagoen txirrindularirik sartzen ez baldin bada alde handiarekin gainera. Davitamon-Lotto edo beste talderen batek kontrol lana egiteko etapa luzeegia da, ezin da etapa hasieran sortu daitekeen ihesaldia hainbeste denboran kontrolpean izan. Agian Tour hasieran eta esprinterako nahia zuten talde gehiagorekin bai, baina gaurkoan ia ezinezkoa ikusten dut.

Uste dut, benetan oso txirrindularitza zalea denak bakarrik ikusiko duela gaurko etapa bere osotasunean. Gomendio bat ematen baimendua baldin banago, aprobetxatu ezazue bazkalondorena lo kuluxka egiteko eta ikus azkeneko 15km, agian nahikoa izan baitaiteke etaparen zatirik interesgarriena ikusteko, ez espero gaurkoan azken 50km-tan ezer berezirik gertatuko denik.

Ihesaldian zein sartuko denaren aurreikuspena eman beharrean nago, lan zaila beti moduan. Atzoko ihesaldian sartu izan ez balira Flecha edo Gilbert esatea pentsatuta neukan, ez zait iruditzen ordea bi egun jarraian tropelari aurrea hartuta ibiltzeko indarrik izango dutenik, hobe izango dute hurrengo bi etapetarako indarrak gordetzea. Beraz, izan dezagun euskaldunen bat bertan izango denaren itxaropena, zergatik ez, Landaluze, Garate edo Txente bezalako txirrindulariren bat. Etapa mota hau beraien ezaugarriei ondo etortzen zaien txirrindulari gehiago ere badira, Arvesen, Commesso, Posthuma eta batez ere Erik Dekker edo Laurent Brochard. Agian, azken bi hauetakoren bat Revel-go helmugan besoak igota ikusteko moduan izango gara.

16. etapa: Mourenx – Pau

Pirinioetako azken etapa burutuko dute txirrindulariek gaurkoan, Mourenx eta Pau artean 180,5km-tan pedalei eman ondoren. Aurreko bi egunetan garbi geratu da, ezbeharrik ezean, aurten ere Lance Armstrong izango dugula horiz jantzita Parisko kaleetan. Basso izan daiteke podioan bere alboan eta hirugarren postua Rasmussen eta Ullrichek jokatu beharko dute larunbateko erlojupekoan, ostegunean Mende-n bukatzen den etapak besterik esaten ez baldin badu behintzat.

Gaurko etapa, Pirinioetako hirugarrena izanda ere, ez da sailkapenean aurrean dauden txirrindularien artean borroka ikusteko aproposena. Hobea da sailkapenean atzeratuxeago dauden (10. postutik atzerago dagoen jendea)eta ihesaldiari probetxua atera ondoren postu dezente aurreratzeko erabiltzeko. Ez zait iruditzen Basso, Ullrich, Rasmussen, Mancebo, Landis edo Leipheimer bezalako txirrindulariak gaurko mendateetan mugituko direnik eta hala baldin bada euren taldeak izango dira erasoaldi horiek behera botatzen jardungo dutenak. Duten postua mantentzeko lanetan gehiago ikusten ditut, arriskatu eta goragoko postuen begira baino.

Ia egunero bezala etapa hasieran ihesaldi bat sortuko da eta ezusteko handirik ezean ihesaldia Pau-ko kaleetara tropelari aurre hartuta iritsi daiteke. Zein sartuko diren ihesaldi horretan? Zaila benetan asmatzea, baina aurreko eguneko estrategia berdinari jarraituz, Hincapie ihesaldian sartu zutenean bezala, Discovery taldeak oraingoan Popovych izan daiteke bertan, kontrol lana egiteko aitzakiarekin, ihesaldiaren atzeko partean jarri eta lan gehiegirik egin gabe sailkapen nagusian aurrera egiteko arriskua izanez. Beste iheskide posible batzuk Mazzoleni, Casar, Contador, Jaksche, Kashechkin, Julich, Fedrigo, Garate, Arroyo, Goubert, Gilbert, , Kessler, Q. Gutierrez, Egoi Martinez, Mayo (gaurko izan daiteke, ostegunekoarekin batera agertzeko azken aukera) bezalako txirrindulariak izan daitezke. O’Grady ere ziurrenik saiatuko da ihesaldi horretan sartzen bai baitaki tropelari aurre hartuta ez bada mendateak igotzen hasten denbora asko galduko duela eta horrekin batera mailot berdea irabazteko aukera txikiak galduko dituela. Ihesaldietan lortutako puntuekin du mailot berdea irabazteko aukera eta justu horretantxe saiatuko den susmoa daukat. Agian gaurkoa ez du horretarako aproposena baino ziur astean zehar ihesaldietan sartzen saiatuko dela.

Garaipena ihesaldian sartzen direnen artean jokatuko dela iruditzen zait, ez baitzait iruditzen tropelean esprintera iristeko asmoarekin lana egiteko gogoarekin talderik izango denik eta gogoa izanda ere indarrak faltako direla iruditzen zait. Beraz, garaile posible bat emateagatik eta ezusteko bezala Eddy Mazzoleni esango dut, bere taldean Cunego eta Simoniren faltan, Tour polita egiten ari den italiarra.