Egile Artxiboak:Gure aditua

Ari da Euskal Herriko Itzuliaren amaiera iristen eta oraindik ez dago batere argi zein izango diren podiumean izango diren txirrindulariak. Denbora tarte oso txikiak dira aurrenekoen artean eta behin honez gero larunbateko erlojupekora arte bere horretan jarraituko dutela uste dut.

5. etapak amaiera bihurri samarra izan arren ez zait iruditzen sailkapen nagusiko aurrenekoen artean diferentziak sortzeko adinakoa izango denik. Ziurrenik, izango dira oilarren arteko erasoak baina etapa honetan baino zailtasun handiagoek denbora tarterik lortu ez badute harritzekoa izango litzateke Avellaneda edo Beci bezalako mendatetxoetan hori lortzea.

Sailkapen nagusirako aukerarik ez duten txirrindulari batzuek osatutako ihesaldi batek bere helburua lortzeko agian etaparik aproposena dugu hau, hala ere, litekeena da azken kilometroetan, Freireren Rabobank edo Valverderen taldekideek esprinta ziurtatzeko ahaleginak egitea eta dakizuen bezala, tropelean esprintean iristeko aukera hartzen bada, ibilbidearen zailtasunak oztopatzen ez badu behintzat bere helburua lortzen duela.

Kuriositate gisa, adi egon etapako azken kilometroei, bereziki Avellaneda eta Beci mendateei, larunbateko erlojupekoan izango duten ibilbidea errepikatuko baitute.

Etapa ohikoa dugu Gasteizen amaitzen dena. 3 etapa gorabeheratsu izan ondoren lasaitasun pixka bat etorri behar luke laugarren etapa honetan, bai behintzat sailkapen nagusira begira dabiltzan gizonen artean.

Herrerako mendatea izango dute etaparen erdialdera. Tropela multzo dezentetan apurtzeko adinako gogortasuna izan arren, helmugatik hain urruti egoteak interes apur bat galdu araziko dio, hala ere, etapa ehiztariek mendate hau baliatu beharko lukete ihesaldi bat sortu eta aurrera egiteko.

Biharkoan, etaparen kontrolaren gakoa Euskaltel Euskadi taldearen baino gehiago Rabobanken gainean izango da. Arrazoia? Garbia, euren taldean Oscar Freire izanda eta beretzat aproposa gerta daitekeen helmuga bat izanik, bihar tropel buruan laranja kolorezko maillot asko ikusi dugula uste dut, Euskaltelekoak batetik, Rabobankekoak bestetik.

Tropelean ez da gizon azkar gehiegi, Oscar Freirez aparte eta gelditzen direnetatik azkarrenetakoak sailkapen nagusiaren lehian sartuak dira, Valverde, Rebellin edo Perdigueroren kasu eta ikusi beharko da esprintean sartuaz euren sailkapen nagusirako aukerak arriskatzeko gogorik izango duten.

1. Freire
2. Leukemans
3. Bru

Bigarrengo etapak sailkapen nagusia irabazteko aukera dutenen gizonen zerrenda asko txikitu du. Ez da erraza izango hirugarren etapak, gaur lehenengo taldean iritsi direnetako norbait jokoz kanpo uztea baina helmugara eramango gaituen aldapa aurrenekoen artean segundutxo batzuk ateratzeko baliagarria gerta daiteke. Segundo gutxi izango dira, noski, aldapa motza delako baina segurutzat jo daiteke segundo gutxiren aldeak bederen izango direla.

Interesgarria gerta daiteke etapa garaipenaren lehia. Euskaltelek du momentu honetan lasterketako liderra baina ikusi beharko da lidertza horri eusteko esfortzu extra bat egiteko prest dagoen edo ez. Izan ere, liderra taldean du baina Contador bere denbora berdinean da eta hainbat eta hainbat txirrindulari bi segundo eskasera, beraz ez daukat hain garbi lidertza mantentzeko zenbaterainoko lana egiteko prest izango diren eta beste talde batzuen laguntzarik jaso ezean, urrutitik sortutako ihesaldiren batek helmugan bere saria izan dezake.

Denak azkeneko aldapara batera iritsi ezkero Gomez Marchantek irabaztea gustuko izango nuke, atsegin dudan txirrindulari bat baita eta gainera aurreneko bi egunetan aldapa gora indartsuenetarikoa dela demostratu duena. Oraingo honetan beraz, buruarekin baino bihotzarekin pronostikoa eginaz:

1. Gomez Marchante
2. Valverde
3. Rebellin

Aurreneko etapak uste baino gutxiago erabaki du, izan ere, hasera batean Euskal Herriko Itzulia irabazteko aipatzen ziren izen denak aurreko taldean izan ditugu. Tropeleko hautagaien artean ere uste baino mugimendu gutxiago izan da eta joera hori aldatu nahi badute, bada oraindik aukerarik eta biharko etapa horretarakoxe aproposa da.

Ez dago leku konkretu bat, non bertan erasoaldia jotzeko aproposa dela esan daitekeenik baina etapa osoko ibilbidea gorabeheratsua da, 12 mendatetxo igaro beharko dituztelarik. Inor ez da luzea baino badira aldapa pikoko kilometroren batzuk.

Eguraldiak ere zer esan handia izan dezake, ibilbideak berak baino handiagoa agian, aldapen jaitsierak igoerek baino garrantzia handiagoa hartu dezaketelarik. Eta honelako kasuetan, indarrez gain bakoitzaren gogo eta arriskuak hartzeko erabakiek zer esan handia izan dezakete etaparen amaieran.

Biharko ere Valverde hautagai nagusitzat jo beharra dago, izan ere murtziarrari ondo etortzen zaizkion helmuga mota asko dira eta Segurakoa ere horien artean da. Talde txikiko esprintean areriorik ez aurkitzea litekeena da, beraz, etapa irabazi nahi dutenek aurrez jo beharko dute gogor, murtziarraren talde berean helmugara iritsi ezkero honek urritan kale egiten baitu. Hau dena kontutan hartuta nire pronostikoa honako hau:

1. Valverde
2. Horner
3. Garzelli

Gaur hasiko den Euskal Herriko Itzuliak gogortasuna du ezaugarri nagusitzat, hala ere badira etapa batzuk besteak baino erabakigarriagoak suertatuko direnak eta horien artean aurreneko etapa hau dugu. Ziurrenik, gaurkoa, asteartekoa eta azken eguneko erlojupekoa (Lerinen amaituko den etapak segundutxo batzuk bakarrik irabazteko balio behar luke) izango dira aurtengo edizio honetako irabazlea zein izango den jakiten lagundu diguten etapak.

Ohitura bihurtu zaigu Euskal Herriko Itzulian aurreneko etapan azken kilometroetan tropela apurtzeko aldapatxoren bat izatea. Beti saiatu dira aurreneko egunetik selekzio txikiren bat lortzen, aurtengoan ordea, aurreko urteetan baino selekzio handiagoa sortu dezaketen bi mendate jarri dituzte, Erlaitz bata, motza baina pikoa eta honen ondoren, aski ezaguna den Jaizkibel. Beti bezala txirrindularien gogoen menpe geratzen da egin daitekeen selekzioa baina Erlaitzetik mugimenduak hasten badira ez litzateke harritzekoa izango 15 txirrindulari baino gutxiagoko taldetxo bat izatea helmugan. Askotan esaten den bezala zaila izango da biharkoan aurtengo edizioko garailearen izena jakitea baina egon seguru aurrez hautagai bezala ematen ditugun txirrindulari bat baino gehiago lehenengo etapatik euren aukera guztiak galduko dituztela.

Pronostikoa? Sasoiko dauden eta talde txikietan bizkorrak direnen aldeko apustua egin beharra dago. Ez dakit Valverde sasoian dagoen baina modu honetako helmugetan habila denez beragatik apustu egingo nuke:

1. Valverde
2. Garzelli
3. S.Sanchez