Valverdek bosgarren aldiz irabazi du Fleche-Wallonne klasikoaJoan den igandean, txirrindularitza zale bat baino gehiago ia maitemindu ginen Amstel Gold Race lasterketarekin. Batez ere, azken 40 kilometroak zirraragarriak izan zirelako. Cauberg aldapa mitikoa ez zen lasterketa amaiera, baina azken kilometroetako profilak, aldapari aldapa, ikuskizun ederra eskaini zigun. Fleche-Wallonen, ordea, ikuskizuna apalagoa izaten da. Huyko hormak ez du ustekabeentzako tartetik uzten. Jungels izan da gaur azken kilometroetan ausartena eta Luxenburgoko ziklista garaiak lehen postuan igaro ditu Huy aurretik jarritako koskak. Marrazoek, baina, ez diote urrutiegi joaten utzi, eta azken kilometroan irentsi dute -erne, dena dela, berarekin igandean Liejera bidean-. Oilarren txanda iritsi da orduan, azken metroetan, eta Valverdek une honetan geldiezina dirudi. Edo geldiezina da, hobe esanda. Aurkariak hankapean hartu ditu gaur. Daniel Martin eta Teuns igo dira podiumera Movistar taldeko txirrindulariaren ezker-eskuin, eta pozik egongo dira ziurrenik… Valverderen aurtengo denboraldiko garaipen zerrenda ikustea eta zorabiatzea, biak bat. Ez hori bakarrik: laugarren aldiz jarraian lortu du Fleche-Wallonnen nagusitzea -eta 2006an ere gailendu zen!-.

Nabarmentzekoa da Ion Izagirre Ardenetan egiten ari dena: zazpigarren Amstelen eta 12. Fleche-Wallonen. Lieje-Bastonge-Liejen ere onenen artean aritzea txapela kentzeko modukoa litzateke.

Emakumezkoen lasterketan, Van der Breggen herbeheretarrak irabazi du, Deignan taldekidearen eta Niewiadoma poloniarraren aurretik. Gizonezkoen lasterketan ez bezala, emakumezkoen proban, Huy aurreko aldapan piztu dira suziriak faboritoen artean eta bertan egin du aurrera podiumera zapaldu duen hirukoteak. Valverdek bezala, Van den Breggenek proba hau benetan maite du, hirugarrenez irabazi du-eta segidan. Euskal txirrindulariei dagokioenez, Lourdes Oyarbide arabarra 80. postuan helmugaratu da eta Lierni Lekuona lezoarrak ez du proba bukatzerik izan.

Argazkia: Cyclingnews