Dopin kasuren bat badago Eusko Jaurlaritzak dirulaguntzarik ez du emango

Miguel MadariagaHori da egungo Eusko Jaurlaritzako gobernuak plazaratu duena. Dakizuen bezala aurten amaitzen da Eusko Jaurlaritza eta Euskaltel-Euskadi taldearen artean zuten ia milioi bat eurotako hitzarmena eta berritzea tokatzen da.

Egungo gobernu berrian aurten izan diren Iñigo Landaluze eta Mikel Astarlozaren dopin auziek alarma piztu dute. Beno, gizartean bertan ere bai, eta honek diru publiko eta talde laranjaren inguruko eztabaida bizitu du Tropela.net-en ere izan den bezala. Gertaera hauen aurrean, gobernuak klausula bat gehitu nahi omen du hurrengo hitzarmenean. Klausula honen arabera Euskaltel-Euskadiko txirrindulariren batek positiboren bat emango balu automatikoki diru-laguntzak kenduko lizkioke Eusko Jaurlaritzak. Uste dut guztiok onartzen dugun ekimena dela eta beharrezkoa jazoera hauek guztiak kontutan hartzen baditugu.

Oraindik hitzak besterik ez dira, hitzarmena gauzatu aurretiko elkarrizketen inguruko adierazpenak. Ikusi beharko da azkenean zer sinatzen den, baina dagoeneko Madariagak puntu hau gehitzeko arazorik ez duela ikusten adierazi du. Bere esanetan “jendeak talde honek (Euskaltel-Euskadik) dopinaren aurka zenbat egiten duen jabetu” beharko omen luke. Hala bada, zergatik babestu du taldeak Mikel Astarloza analisi eta kontra analisiek ekaineko laginean EPO aztarnak antzeman badituzte? Kontrakoa pentsatzera eramateko frogak badituzte plazaratzeko garia badela deritzot. Gustatuko litzaidake Euskaltel-Euskadi taldeak dopinaren kontra aritzen dela sinistea, baina egun ez dut horretarako arrazoirik ikusten.

Argazkia: www.diariovasco.com

Mikel Astarlozaren positiboa konfirmatu du B laginak

Mikel Astarlozak ustez EPOarekin positibo eman duEspero genuen bezala, eta zenbait komunikabidetan filtratuta plazaratu moduan, Mikel Astarlozari egin dioten bigarren B laginaren analisiak aurreratutakoa konfirmatu besterik ez du egin. Taldeak oraindik Pasaiako txirrindulariaren errugabetasunean sinesten badu ere eta Mikelek bere errugabetasuna irmoki defendatu bazuen ere Amarako Hoteleko prentsa aurrekoan, Tourreko etapa garaileak etapa garaipena galtzeaz gain 2 urteko zigorra bete beharrean izango da araudiari jarraiki.

Honen guztiaren aurrean Mikelen adierazpen berri bat beharko genukeela uste dut. Berak Amara Hotelean laborategiaren inguruko datuak zituela esan zuen eta hauek errugabetasuna frogatzeko balioko zituela. Datuak baditu publiko egitera animatu nahiko nuke zalegoak bere errugabetasunean sinesteko bere hitzaz gain beste datu objektiboren beharrean aurkitzen baita.

Euskaltel-Euskadi taldeak komunikatu bat kaleratu du bere jarrera eta txirrindulariari elkartasuna helaraziko. Gazteleraz bakarrik dugu eta hemen kopiatzea erabaki dut guztion eskuragarri izan dadin.

“El equipo ciclista profesional Euskaltel Euskadi comunica que el ciclista Mikel Astarloza ha recibido este mediodía el resultado del contra-análisis de la ‘muestra B’ del control antidopaje efectuado el 26 de junio de 2009, siendo calificado este como ‘no-negativo’. El conjunto no se extraña del resultado de dicha notificación, ya que fue filtrada a los medios de comunicación hace unos cuantos días, por lo que estaba preparado para afrontarla. Como se ha mantenido durante el periodo que ha transcurrido desde el anuncio del ‘no-negativo’ de la muestra A (31 de julio), el equipo confía en la inocencia de Mikel Astarloza y ha puesto este asunto en manos de sus abogados y técnicos para demostrar que el ciclista es inocente. Como es lógico, Euskaltel Euskadi se regirá por la normativa vigente en estos casos tanto a nivel UCI como federativo. A su vez, defenderá el daño causado tanto al ciclista como a la propia formación.”

Mikel Astarloza: “Nire errugabetasunaz seguru naiz erabat, erabat!”

Mikel Astarlozaren prentsa oharraren ondoren Amara Hotelaren aurrealdeaGaur eguerdiko 12:00etan genuen hitz ordua Mikel Astarlozarekin Amara Plaza Hotelean. Txikia geratu den Oria aretoan, komunikabide eta jarraitzaile askoren artean, Tropela Elkarteko bi kide ere bertan ginen Twitter bidez prentsaurrekoa zuei zuzenean eskaintzeko.

Gure “txioetan” genioen Euskaltel-Euskadiko inor ez genuela ikusten, baina irteeran Amets Txurruka bere lagunartieko presidentearekin batera ikusi dugu, baita Haimar eta Joseba Zubeldia anaiak, Euskaltel-Euskadiko txirrindulari ohiak. Baina esan bezala, Euskaltel-Euskadiko ordezkaririk ez da egon Mikel Astarlozaren inguruan prentsa aurrekoa ematen izan den unean. Lagunak eta jarraitzaileak bai, hauek bera eserita zen mahaiaren atzean izan dira Astarlozaren peñako kamiseta moreak zituztela. Ezagunen artean, ordea, Iñigo Chaurreau (Mikelen lehengusua, txirrindulari ohia eta egun kazetari lanetan), Jose Luis Arrieta (Euskadiko Txirrindularitza Federazioko Presidentea), Martxelo Otamendi (Berriako zuzendaria), Fermin Aramendi (EITBko kazetaria)… behintzat ikusi ditugu.

12:00ak puntuan sartu da Mikel txalo zaparrada artean aretora. Argazki kamerek ez zuten atsedenik hartzen Mikel mahaiaren atzean eseri den arte. Une horretan, espero genuen prentsaurrekoa hastera zihoan.

Mikelek komunikatuaren irakurketan eskerrak eman dizkigu bertaratu garen guztioi eta garbi utzi digu ez duela galdera edo elkarrizketarik erantzungo auzia argitu arte. Ulergarria deritzot jarrera hau, kontua delikatua baita eta edozein motatako gaizki ulertze batek egoera nahastea besterik ez bailuke lortuko. Seguru naiz komunikatua bera idaztea ere asko kostako zitzaiola bere barrukoa ahalik eta hobekien publiko egin ahal izateko.

Bost minutu inguruko prentsa aurrekoan ustezko positiboaren berria nola jakin zuen esan digu. Horretaz gain, garbi utzi nahi izan du berak ez duela arauz kanpoko ezer hartu eta errugabea dela, erabat seguru. Guri ere errugabetasunaren sentsazioa helarazi digula esan beharra dut, han geundenoi begira eta konbentzimendu osoz esan baitu errugabea dela.

Kontra analisia ostiralean bertan eskatu zuela esan digu eta Madrilgo laborategietan egin diren analisietan irregulartasunak izan direnaren datuak omen ditu. Hori bai, oraingoz ez ditu publiko egin, baina behar den unean plazaratuko dituela esan digu. Dagoeneko egoera honek kalte handia eragin diola aipatu du eta nahiz eta kontra analisiak bere errugabetasuna konfirmatu, egungo sisteman sinesgarritasun guztia galdu duela esan digu. UCIko araudi guztia beti bete duela esan du, uneoro non den jakinaraziz eta analisi guztiak eginez pasaporte biologikoak eskatzen duen bezala. Egun dauden kontrolekin arauz kanpoko zerbait hartzea “kirol suizidioa” izango litzatekeela gaineratu du.

Prentsaurrekoa bukatzeko zin egin du berak ez duela debekatutako ezer hartu eta mahai gaina ukabilez joaz, kosta ala kosta dena argitu arte ikertuko duela esan du.

Txalo zartek eman diote bukaera prentsaurrekoari. Mikel Astarlozak, banan banan, bertaratutako guztiak agurtzeari ekin dio, gu barne. Twitterrean genioen bezala, agurtu gaituenean, askoz lasaiago ikusi dugu txirrindulari pasaitarra. Guk azalpen honen beharra genuela komentatu diogu eta berak esandakoak esan ondoren, barruak lasaiago dituela erantzun digu. Zalantzarik ez azken egunetan inpotentzia eta amorruak hartuta egongo zela Mikel eta gaur, denon aurrean publiko egin du bere egoera eta bere bertsioa.

Bi aldeen informazioa badugu. Alde batetik Mikel Astarlozak gaur eman duen azalpena eta bestetik txirrindulari pasaitarra lehiaketetatik kanporatu duen Madrilgo laborategiaren analisia. Berdinketa hau puskatzeko B laginaren kontra analisiaren zain geratzea besterik ez zaigu geratzen.

Astarlozak ustez EPOa hartu du

Mikel Astarlozak ustez EPOarekin positibo eman duHori da berria. Gordin gordin jarri nahi izan dut zalantzarik izan ez dadin. Aurtengo Tourrean etapa garaipena lortu zuen Pasaiatarrak lehiaketaz kanpo egindako kontrol batean (ekainak 26an hain juxtu), EPOaren zantzuak antzeman dizkiote. Iñigo Landaluzeren kasuaren ondoren, kontra analisiak baieztatzen badu, Euskaltel-Euskadiko bigarren txirrindularia izango litzateke hilabete baten barruan dopinarengatik zigortutakoa.

Aste t’erdi besterik ez da pasa Mikel Astarlozak Alpeetan etapa garaipen ikusgarri hura lortu zuenetik. Azken urteetan Tourrean ez dugu izan garaipenik eskuratu duen  euskal txirrindularirik eta Mikelek poza eta euskal txirrindularitzaren berpiztea erakusten zigun. Baina pozak gutxi iraun digu. Ekaina bukaera aldera zurrumurruren bat iritsi zitzaidan Mikelen inguruan horrelako berriren bat izan zitekeelakoan, baina ez nion sinesgarritasunik eman nahi izan batez ere txirrindularien errugabetasunean sinesteko joera dudalako. Gaur UCIk ekainak 26an egindako kontrol batean EPOa aurkitu dutela argitaratu dute eta zurrumurru haiek egi bihurtu dira tamalez. Iñigo Landaluzeren kasuan ez bezala, Pasaiatarrak bere errugabetasunari eusten dio eta kontra analisia eskatuko duela aurreratu du. Talde laranjak ere atera berri duen komunikatuan Mikel Astarlozaren errugabetasunean sinisten duela (barneko kontrol guztiak gainditu omen ditu Pasaiatarrak) adierazi du eta taldean jarraituko duela. Horrekin batera, B laginak justizia egingo duenaren itxaropena dutela. Hala ere, taldean jarraituko badu ere, Espainiako Federazioak lehiaketetatik kanpo utzi du Mikel Astarloza, beraz, bihar ez da Donostiako Klasikoan izango.

Orbain beltz berri bat euskal txirrindularitzarentzat berria konfirmatzen bada, eta bereziki Euskaltel-Euskadi taldearentzat, hilabete batean bi kasu izan baititu talde barruan.

Oraindik gogoan dut Mayoren auzia orain 2 urte eta orain hau.

Eta bigarren garaipena Juanma Garatek!!

Juanma Garate. 20. etapan garaipenaAzken sei urteetan etapa garaipenik lortu ezinda ibili eta gero, aurtengo edizioan bi etapa garaipen lortu dituzte gure txirrindulariek. Gaurkoan Juanma Garate izan da Martin-i aurre hartuta etapa garaipen itzela lortu duena, non eta Mont Ventoux mendate mitikoan. Zorionak Juanma!

Azken aurreko etapa izaki eta Mont Ventouxen gainean bukatzen zela ikusita, sailkapen nagusiko postuen lehian dabiltzanak zalaparta sortu beharra zuten zerbait egin nahi bazuten. Lehia horrek etapa garaipena aurtengo Tourreko gizonik indartsuenen artean izango zela pentsatzen genuen, baina ez da hala izan.

Eguneko ihesaldian zen Juanma Garate, Ruben Perez, Delage, Gutierrez, Posthuma, Martin, Kuschynski, Roulston, Riblon, Geslin, Bonnet, Righi, Lemoine, Dumoulin, Timmer eta Bouet txirrindulariekin batera. Tropelak ihesaldia 5 minutu ingurura izan du Mont Ventouxeko igoerara gerturatu artean, baina behin igoerari ekiteko 5 kilometro inguru falta zirela, Astana eta Saxo Bank txandakatuz tropel nagusia luzatu dute mozketa bat eragiteraino. Orduan iheslariekiko errenta murrizten joan denez, Juanma Garatek erasoa jo du aurreko tropeltxoan eta Martin eta Riblonek aurrera egin dute. 21 kilometroko portua luzea zen eta indarrak ongi dosifikatu beharrak zeuden eta ederki egin dutelakoan naiz.

Atzealdean sailkapen nagusiaren lehian zebiltzan txirrindulariak erasoka hasi dira. Andy Schleck izan da hamaika eraso egin dituena, baina Contador erne zen erasoak baliogabetzeko. Frank ere saiatu da birritan, baina honen zaintza lanetan Armstrong ederki moldatu da. Sailkapen nagusiko lehen txirrindulariak, beraz, beraien postuak babesten edo eta hobetzeko saiakeratan ziren. Noski, erasoen ondoren atsedenaldiak izaten ziren eta hori bikain etorri zaie aurreko hiru iheslariei bestela harrapatuko baitzituzten.

Azken kilometroetan Riblonek ezin zuen beste bien erritmoarekin jarraitu eta geratu egin da. Atzetik, berriz, sailkapen nagusiko lehiatik kanpo zela aprobetxatuz, Pellizottik aurrera jo du etapa garaipenaren bila, baina ez da gauza izan aurreko biak harrapatzeko. Gauzak horrela, etapa garaipena Juanma eta Martinen artean zen. Azken kilometroan bigarren erasoa jo du. Lehenengoan Martin hurbiltzeko gauza izan bada, azken honetan nahikoa izan da egin duen ahalegina eta etapa garaipena eskuratu du Mont Ventoux handian. Honi eskerrak, Rabobankek aurten eman duen irudi kaxkarra itxura hobetzea lortu du.

Faboritoen artean Schleck anaiak gogor aritu diren arren, lortu duten gauza bakarra Franken postua aurreratzea izan da Klöden atzeratuta iritsi baita helmugara. Ezin esan Schleck anaiak saiatu ez direnik, baina bai Armstrong baita Wiggins bera ere ederki aritu diran beren postuen defentsa lanetan.

Ez zaigu ahaztuko aurtengo Tourra hain erraz. Mikel Astarlozak asteartean Alpeetan eta gaur Juanma Garatek Mont Ventouxen bi garaipen ekarri dituzte Euskal Herrira. Zorionak biei bihotz bihotzez!!

Argazkia: www.cyclingnews.com