Etiketa Artxiboak:Astana

Contador 2010ean Astana taldean

Alberto ContadorSaltsa pixka bat sortarazi du Pintoko txirrindulariak urte amaiera honetan hurrengo urteari begira. Hasiera batean bazirudien taldea utzi behar zuela kontratua bertan behera utzita, baina azkenean ez da hala izan.

Azken egunotan aurre-kontratua sinatu zuten bi aldeek. Aurre-kontratu honetan Contadorrek kontratua ez hausteko hiru baldintza jarri zituen: UCIko lizentzia mantentzea, kode etikoa betetzea eta dopinaren aurkako taldeko barne araudia betetzea. Garrantzizkoena, eta objektiboena aldi berean, UCIren lizentzia zen. Astanak atzo zuen lizentzia berritzeko aurkeztu beharreko dokumentazio guztia aurkezteko epe-muga. Urte hasieran izandako diru ordainketa ezak UCIk lanak asko zaildu dizkio talde kazakhstandarrari , baina atzo baieztatu zen lizentzia mantenduko zuela.

Horren aurrean Contadorrek taldean jarraituko duela publiko egin du. Kontratu hau bi urterako izango da eta urte bakoitzeko 4 milioi euro jasoko ditu. Diru horretaz gain, Specialized bizikleta etxearekin beste akordio bat sinatu berri du etxe honetako bizikletak erabil ditzan. Akordio hau 700.000€-koa da. 4,7 milioi euro, beraz, dakigula Contadorrek 2010ean jasoko dituenak. Negoziaketak borobil irten zaizkiola esango nuke; berdin pentsa al dezakegu kirol arloari dagokionez?

Argazkia: www.albertocontador.com

Haimar Zubeldia ere Armstrongen taldera

Haimar ZubeldiaAmstrongek Radio Shack talde berria osatzera zihoala esan zuenean, denboraldi amaieran Haimar Zubeldiak Armstrongen taldera joan nahi zuela esan zuen. Kontu, ordea, ez zen hain erraza Astana taldearekin 2 urteko kontratua sinatua baitzuen eta zail zirudien talde aldaketa gauzatzea. Zalantzak izan ditugu gaur arte, baina gaur guztia argitu da. Radio Shack talde berriak bere taldearen berri eman du eta Haimar Zubeldiaren izena zerrendan azaldu da Markel Irizarrenarekin batera.

Bi euskaldun izango ditugu, beraz, 2010ean Radio Shack taldean, Armstrong txirrindulari mediatikoa eta Bruyneel zuzendari ezaguna dituen taldean. Astana taldean, berriz, Contador eta Vinokourov izango lirateke geratzen diren txirrindularirik ezagunenak. Badirudi taldea hanka motz geratzen dela Haimar bezalako txirrindulari bat kenduta. Egoera honen aurrean talde kazakhstandarrak fitxaketa berriren bat egin beharrean izango da. Horien artea David Herrero bilbotarraren zurrumurrua zabaldu da. Ez da, ordea, bakarra izan; zenbait iturrik Contadorrek hurrengo urterako Basso italiarra aldamenean izan nahi duela esan baitute eta zentzu horretan lanean ari omen dira.

Nire ustez Haimarrek zentzuzkoena egin du. Astana taldea galdera ikurrez jositako talde bat da oraindik (gogora dezagun ordaindu gabe izan zirela denboraldi hasieran, babesleekin arazoak, oraindik UCI lizentzia berritzeko…). Radio Shackek, berriz, talde berria izanik ere, Armstrongek duen erakarpen indarrari esker babesleak erraz inguratzen ditu. Kirol arloan ere zuzendariarengandik hasita, talde bikaina bildu dute zalantzarik gabe: Klöden, Leipheimer, Popovych, Steegmans… besteak beste.

Seguru Contador zaleen artean honek zeresana emango duela. Badakizue, aurten Armstrong-Contador binomioak egunkari asko bete ditu eta horri tiraka jarraitzeko aitzakia bikaina izango da usurbildarraren erabakia horientzat.

Iban Mayoz eta David Herrerok taldea izan dezakete

David HerreroEsaten genizuen bezala, Iban Mayoz eta David Herrero talde bila zebiltzan eta badirudi hurrengo urterako taldea izan dezaketela.

Donostiarraren kasuan Footon-Servetto taldea izan daiteke. Badirudi guztia hitz eginda dagoela eta ofizial egitea besterik ez dela falta. Bilbotarraren kasuan, berriz, Astana taldea izan daitekeela esan dute. Hau konfirmatuko balitz, hurrengo urtean, eta azken uneko aldaketarik ez bada (Haimarrengatik diot), bi euskaldun izango ditugu talde kazakhstandarra, Haimar Zubeldia eta David Herrero.

Espero dugu bi berri hauek baieztatzea eta bi txirrindulari hauek goi mailako tropelean izatea 2010ean ere.

Aldaketak Astana taldean

Vinokourov, Ulrich eta ArmstrongAtzo bukatu berri zen Irlandako Tourra. Irabazlea Downing izan zen, 31 urteko ingelesa. Amaitu ez bazuen ere, lasterketa berean izan da Armstrong Texaseko txirrindulari famatua. Hiru eguneko lasterketa izan da Irlandako lurretan jokatu berri dena eta Armstrongek bertan lehiatzeko hitzordua zuen.

Lasterketa hau izango da Armstrong azkenengoz Astanaren maillot urdinaz bideetan ikusi duguna. Dagoeneko Tour Down Under-en hasi zuen denboraldia aurtengoz bere amaierara iritsi zaio amerikarrari. Astanak, edo hobeki esanda, Bruyneelek, aukera eman zion Armstrongi aurten talde urdinean lehiatzen aritzeko. Egia esan espero baino emaitza hobeekin gainera: Giroan 12. postuan sailkatu zen eta Tourrean 3. postuan. Bere hitzetan, doan aritu den urte honetan txirrindularitzara itzultzearen arrazoia kantzerraren aurkako duen fundazioarentzat dirua biltzea izan da. Seguru zenbait milioi dolar biltzeko gai izan dela bere bizikleta ezberdinekin hara eta hona. Eta ezberdinekin diot, berak esan zuen bezala, hauek enkantean saltzeko helburuaz erabili baititu eta Tourrekoa historiako bizikletarik garestiena izango dela aurreratzen zuen. Ez dakit saldu dituen ala ez, ez eta zenbatean, baina gustura jakingo nuke.

Kontua da Armstrongek bere bide laburra egin duela Astanan, polemika eta guzti. Ez baita ahaztekoa izango Contador eta bera talde berean izateak sortarazi duen ikusmina. Pena Gaztela eta Leongo lehen etapa hartan Armstrong erori izana, hala gertatu ez balitz, beharbada bestelako emaitzak lortuko zituela uste baitut. Hala ere, hori nire imajinazioaren fruitu besterik ez da.

Armstrong badoa eta Vinokourov itzuli da. Kazakhstandarrak bere itzulerako debuta l’Ain-eko Tourrean egin zuen orain egun batzuk esan bezala, garaipen eta guzti. Kazakhstandarra Vueltan ikusteko aukera altuak daudela dirudi, izan ere Astanak lehen erreserba gisa gehitu baitu bere zerrendan. Ez da harritzekoa izango, beraz, Vinokourov Assen-eko irteeran bere maillot urdinarekin ikustea.

Rasmussen-i ere amaitu zaio zigorra. Honek ere lehiaketa ofizialetan parte hartzeko aukera dagoeneko badu. Bere esanetan Espainiako Vueltan parte hartu nahi izan omen du, baina bere taldeak lehen izen ematean zerrendan gehitu ez zuenez, ez du posible izango. Lastima, gogoa baitut daniarra berriro ere errepidean ikusteko. Eta are interesgarriagoa litzateke Vuelta bai Rasmussen baita Vinokourov biak, orain bi urteko Tourrean baztertuak izan ziren txirrindulariak, beraien itzulerarako lasterketa hau aukeratu izan balute.

Vinokouroven lehen garaipena 2 urteko zigorraren ondoren

l'Ain-eko Tourra. Vinokourov garaile 3. etapako 2. sektoreanKazakhstandarra l’Ain-eko Tourra UCI ProTourreko lasterketa ari da lehiatzen eta atzo arratsaldean jokatu zen sektorean garaipena lortu zuen. Dakizuen bezala, 2007ko Tourreko positibo entzutetsu haren ondoren, 2 urterako zigortu zuten Astanako txirrindularia. bi urteko zigorra bete ostean, berriro ere bizikleta gainean da profesional gisa.

35 urte ditu Vinokourovek, baina sasoiko dagoela dirudi. Atzo bi sektore jokatu ziren: bat goizean Leles Monts-Jura-an 103,2 km-tako mendiko etapa. Arratsaldean, berriz,  8,6 km-tako erlojupekoa. Kazakhstandarrak 9’50” segundo behar izan zituen ibilbidea betetzeko eta Elijzen eta Horner taldekidearen aurretik geratzea lortu zuen.

Vinokourovek bere burua probatu nahi zuela adierazi du, eta inolaz ere ez omen zigorrak eragindako amorrazioz. Bere helburua horrelako zigor baten ostean lasterketak irabaztea posible dela erakustea zela adierazi du, eta esan daiteke lortu duela.

Gaur  l’Ain-eko Tourreko azken etapa jokatuko da. Etapa hau 129,6 km-takoa izango da eta Colombier-en amaituko da. Lasterketako lider Horner da eta Astana taldeak bere esku dagoen guztia egiten saiatu beharko du lasterketa irabazi nahi badu ez baitu erraz izango, Turpin eta Moncoutie 19 eta 20 segundora ditu hurrenez hurren eta hauek ez dute amore emango.