2009ko denboraldia amaitu zaigu

Tropela.net2009ko denboraldia igandean jokatu zen Mendrisioko Munduko txapelketarekin amaitu genuen. Orain sarituak izan zareten guztioi sariak banatzea besterik ez zaigu geratzen eta hori ostiral honetan egingo dugu Urola Kostako Udal Elkarteak duen egoitzan.

Aurtengoan Euskal Herriko Itzuliko lehiaketarekin hasi eta atzoko Munduko Txapelketa arte izan ditugu lehiaketak. Lehiaketa berri bat ere sartu dugu aurtengoan, Donostiako Klasikoa. Hemendik aurrera ere Donostiako Klasiko hau gure egutegian mantentzeko asmoa dugu.

2009an parte hartu duzuenen kopurua asko igo da. Iaz 24000 kiniela inguru egin baziren, aurten 35000 baino gehiago egin dira, eta hori Donostiako Klasikokoak kontutan hartu gabe. Azken hau kontutan hartuta ia 39000 izan dira. Tourreko lehiaketan 10000 kinielen marka ere gainditu genuen. Parte hartzea, benetan, ikaragarritzat jotzen dugu.

Sari ugari ere izan ditugu aurtengo ekitaldian. Guztira 100 saritik gora eman ditugu parte hartzaile guztion artean banatzeko. Egia da parte hartzeari begiratuz gero motz geratzen dela.

Berrikuntza ugari egin ditugu aurtengoan ere eta hauetan beharbada lehiaketari dagokionez esanguratsuena Urteko Sailkapena izan da.

Dagoeneko 22 lehiaketa eta 4 urte t’erdiko ibilbide honetan webgunea eta zerbitzua ahalik eta hoberen egiten saiatu gara. Badakigu bide horretan oraindik zer eginak baditugula. Zalantzarik gabe lan horretan jarraituko dugu hurrengo urtean webgune hobeago bat izan dadin.

Genioen bezala, Donostiako Klasikoa gehitu dugu aurtengo egutegian. Hurrengo urtean egutegi hori zabaltzeko asmoa dugu eta segur aski Euskal Herriko Itzulia iritsi aurretik beste lehiaketaren bat ere jokatuko dugu. Hauen artean aztertzen ari garena 2010eko denboraldia Tour Down Underrekin hastea pentsatzen ari gara. Ez dakigu zuek zer irizten diozuen. Norbaitek udaberriko klasikoekin ere zerbait egiteko aipua egin du. Gure aldetik aldaketak egiteko prest gaude baina zalantzak ere sortarazten zaizkigu. Eskertuko genizueke zuen ideiak eta nahiak blog honetan plazaratuko bazenizkigute, beti ere guztiontzako erabakirik onena har dezagun.

Gure babesle eta laguntzaileak ezin ditugu ahaztu. Eskerrak eman nahi dizkiegu sariak eman dizkiguten laguntzaile guzti horiei, publizitatearekin lagundu digutenei, maillotak ematen jarraitzen duten euskal txirrindulari horiei, komunikabideei, administrazio publiko… Guzti guztioi eskerrik asko.

Ezin ahaztu, ordea, protagonista nagusiak. Gure eskerrik beroenak zuentzako dira, lehiaketaz lehiaketa parte hartzen ari zareten guztioi.  Zuek zarete lehiaketa hau handi egiten duzuenak eta guri lanerako indarra bizirik manten arazten dutenak. Eskerrik asko bihotz bihotzez.

Aurrera begira jarrita, 2010eko urtea aurtengoa baino oparoagoa izatea espero dugu, lehiaketa gehiagorekin (ikusiko dugu), sari gehiagorekin eta dibertsiorik onenarekin euskaraz Tropela.net izeneko txirrindularitzaren txoko honetan.

Tropela Sariak 2009

Tropela.net sari banaketa 2005Aurtengo Tropela.net Sari Banaketa ekitaldia Zarautzen izango da urriaren 2a. Zehazki ekitaldia Urola Kostako Udal Elkartearen egoitzan izango da eta ekitaldiari hasiera arratsaldeko 18:30tan emango zaio.

Sari banaketan Euskal Herriko Itzuli, Italiako Giro eta Frantziako Tourreko sailkapen nagusian sarituak izango dira, eta hauetaz gain Espainiako Vueltan eta Mundialean izango direnak. Beraz, oraindik guztiz erabaki gabe daude sari banaketara etorri behar dutenak. Zehazteko, ondorengo hauek izan behar dute sari banaketa ekitaldian:

1. Euskal Herriko Itzuliko sailkapen orokorreko lehen 4 postuetan sailkatutakoak

2. Italiako Giroko sailkapen orokorreko lehen 4 postuetan sailkatutakoak

3. Frantziako Tourreko sailkapen orokorreko lehen 10 postuetan sailkatutakoak eta etapa bakoitzeko garaileak

4. Espainiako Vueltako lehen 6 postuetan sailkatutakoak

5. Munduko Txapelketako irabazlea

6. Urteko bukaerako sailkapeneko lehen 3 sailkatuak (lehiaketa guztiak amaitu eta gero, noski)

Hauei guztiei email bidez bidaliko dizuegu sari banaketa ekitaldirako gonbidapena.

Tourrean zehar aurreratzen genuen bezala, aipatutako parte hartzaile guzti hauen artean Lance Armstrong eta Alberto Contadorren maillotan zozketatuko ditugu sari banaketa ekitaldian bertan. Hori bai, zozketa honetan parte hartu ahal izateko sari banaketa ekitaldian izan beharra izango da.

Sari banaketa ekitaldia Joxe Mari Apaolaza Euskadi Irratiko esatariak aurkeztuko du eta berarekin txirrindulari profesionalen bat edo beste izateaz gain, bertsolariak ere izango dira. Ekitaldia borobiltzeko zizka mizkak eta edariak ere izango dira etorriko zareten guztiontzat.

Contador eta Armstrongek sinatutako maillotak zuen eskura

Contador eta Armstrong 2009 Tourreko podiumeanAurreratu genizuen bezala, Alberto Contador eta Lance Armstrong txirrindulari ezagunen maillotak ditugu gure parte hartzaileen artean banatzeko. Dakizuen bezala Alberto Contador aurtengo Tourreko garailea izan da eta irabazten duen 2.a da. Lance Armstrong, berriz, 7 Tour irabazi ostean berriro txirrindularitza profesionalera itzuli da aurtengoan eta 3. postuan sailkatu da Tourrean. Zalantzarik ez bi txirrindulari paregabeen maillotez ari garela.

Urriaren 2an “2009ko Sari Banaketa Ekitaldia” burutuko dugu. Oraindik ez dakigu non izango den, baina lasai, garaiz jakinaraziko dizuegu eta. Sari banaketa ekitaldi honetara 2009an Tropela.net-en jokatu diren lehiaketa guztietako sarituak gonbidatuak izango zarete, baita urteko sailkapenean podiumeko postuetakoak ere. Sari banaketa ekitaldi honetan irabazi dituzuen sariak banatzeaz gain, aurrez aipatutako bi maillot baliotsu horien zozketa egingo dugu bertara joan eta sarituak izan zareten guztien artean. Sariak banatzeaz gain, “luntx” bat ere izango da bertan.

Oraindik saririk irabazi ez baduzu garaiz zabiltza. Abuztuaren 19tik aurrera, eta 29ra bitartean, Espainiako Vueltako lehiaketan parte hartu al izango duzu. Eta azken aukera irailaren 27an jokatuko den Munduko Txapelketaren lehiaketan izango duzu (adi ibili kiniela egiteko epearekin). Zorte on guztioi!!

2009ko sari banaketa ekitaldia urriaren 2an

2009ko Frantziako Tourreko sariakGaur bukatu da 2009ko Tourra eta berarekin batera Tropela.net-eko lehiaketa. Aurtengoan dakizuen bezala 10.000 parte hartzailetik gora izan dira eta sekula baino meritu gehiago du Tropela.net-eko lehiaketa irabazteak. Aurrez esan bezala, eskerrak eman nahi dizkizuegu guztioi lehiaketa handi honetan parte hartu eta gurekin txirrindularitzaz gozatu izanagatik.

Dakizuen bezala sari dezente genituen aurtengo ekitaldian parte hartzaile guztien artean banatzeko. Tropela Elkartea hurrengo egunetan zehar saritu guztiekin  jarriko da harremanetan, baina dagoenekoz jakin arazi nahi dizuegu urriaren 2an izango dela sari emate ekitaldia. Ekitaldi honetan denboraldi guztian zehar izango diren lehiaketetako sariak banatuko dira, horien artean 2009ko Tourraren azken lehiaketa hau. Saritu guztiak gonbidatuta zaudete sari banaketa ekitaldi honetara. Ekitaldi honen inguruko informazio gehiago emango dugu hurrengo egunetan.

Lehiaketako irabazleei dagokionez, 2009ko Frantziako Tourreko irabazlea mikel10 azpeitiarra da. Berarentzat izango da Eroski Bidaiak-ek emandako Teneriferako bidaia zoragarria. Zorionak, beraz, mikel10!

Sailkapen nagusian bigarren RODILLO donostiarra izan da. Honek 7.112 puntu eskuratu ditu, mikel10-ek baino 195 puntu gutxiago. Berarentzat izango da Kiroljokoak eskainitako mendi bizikleta. Podiuma osatzen, hirugarren posturako dugun saria, Atxaspi Hoteleko relaxa asteburua, Zarautza joan da eta irabazlea ZenonJaskula izan da.

alaika bergararra podiumetik 4 puntura soilik geratu da eta berarentzat izango da Zarauzko Olatu hoteleko asteburua. Bosgarren postua zumaiko San-ek lortu du eta Rezola sagardotegirako 6 pertsonentzako otorduaz gozatzeko aukera izango dute berak eta bere 5 adiskideek. Seigarren postua Zaldibiako zaldibik irabazi du eta honentzat 4 pertsonentzako otordua izango da Rezola sagardotegian. Mendaroko j.voight-ek ere otordua izango du sagardotegian, baina kasu honetan 2 pertsonentzat.

8. postuan zestoar bat sailkatu da, Mardu, eta berarentzat Hernialdeko Ostatuan 2 pertsonentzako otordu bat izango da. 9. eta 10. postuetarako Jakion-ek eskainitako otar eder bana dugu banatzeko eta sarituak bringi zumaiarra eta maryland errenteriarra izan dira.

Sari hauetaz gain, herrietako eta eskualdeetako sariak zeuden jokoan. Irabazleak zeintzuk izan diren ikusteko Sarien atalean begira dezakezue.

Hauetaz gain, egunero etapetan irabazle izan zaretenek euskal txirrindulariek emandako maillotak irabazi dituzue. Sarituen zerrenda hurrengo egunetan zehar argitaratuko dugu.

Zorionak guztioi! 10.000 kinielaren helburua lortu dugu!

Eskerrik asko parte hartu duzuen guztioi!Eskerrik asko guztioi! 10.000 kinielaren helburua lortu dugu. Zehazki 10.491 kiniela egin dira azken hiru aste hauetan 2009ko Frantziako Tourrean lehiatzeko. Orain gozatzea besterik ez zaigu geratzen. Guk gure eskuetan dagoen guztia egingo dugu hala izan dadin.

Zalantzarik gabe zifra hau zuei eskerrak izan da. Asko izan zarete, era berean, zalantzak eta izan dituzuen arazoak gainditzeko laguntza eskatu diguzuenak. Guztira 150 kontsulta inguru erantzun ditugu eta askok eskerrak eman dizkiguzue emandako laguntzagatik. Guk ere zuen laguntza ere asko estimatzen dugu eta hori Tropela.net-eko kamisetak erosiz edo donazioren bat eginez burutu dezakezuela gogorarazi nahi dizuegu. Zenbaitek bide horien bidez laguntza eman digute eta gure eskerrik beroenak eman nahi dizkizuegu. Gainontzekooi berdin egin dezakezue merezi dugula uste baduzue.

Azken urteetan egin ohi dugun bezala, erabiltzaileak errepasatzen izango gara hurrengo orduetan. Errepaso honetan erabiltzaileek Tropela.net-en arauak betetzen al dituzten ala ez egiaztatzen izango gara. Hori dela eta, errepasoa bukatu artean, ez ditugu sailkapenak eguneratuko.  Sentitzen ditugu eragozpenak.

Ikusiko zenuten bezala, aurtengoan erabiltzailea aktibatzeko eskatu zaizue. Honen helburua zuen posta elektronikoak egiaztatzea da. Aurten sariak jaso ahal izateko erabiltzaileak aktibatuta izan behar du, beraz, ez itxaron gehiago eta aktibatu zuen erabiltzaileak lehenbailehen.

Berriro ere eskerrak eman nahi dizkizuegu gure lehiaketa 2009ko Frantziako Tourraz gozatzeko tresna gisa aukeratu izanagatik eta gure zorterik onenak guztioi!!