Egile Artxiboak:Egoitz

Hilaren 12an hasiko da Italiako Giro famatua. Noski, Tropelean ere lehiaketa izango da aurten ere lasterketa honen inguruan. Beraz, adi!!

Baina Giroaren bezperatan, beste italiar bat dugu albiste: Ivan Basso. Iaz Puerto Operazioak eraginda Tourretik alboratua izan eta gero, atzo taldea uztea erabaki zuen italiarrak. Baina zergatik orain? Zer gertatu da?

Italiako Komite Olinpikoak kasua artxibatzea erabaki bazuen ere iazko urrian, orain azken egunetako berrien ostean, gehiago argitzeko erabakia hartu du. Ullrich alemaniarrari bezala, ADN froga bat egitea eskatu zaio Bassori. Ullrich talde gabe geratu zen eta Bassok taldea utzi du bere kabuz. Bihar joango omen da azalpenak ematera erakundeen aurrera. Badirudi alemaniarraren kasuan prozesua azkarrago joan zela eta ondorioak lehenago pairatu zituela; Bassori, berriz, orain etorri zaio ordaina. Bazen garaia!!

Kontuak kontu, badirudi beste 47 txirrindulariren izenak badirela Puerto Operazioaren txostenen batetan. Noiz agertuko dira? Giroa hastear denean? Tourrean?

Frantziarrak ez daude Puerto operazioa edonola albo batera uzteko gertu. Le Monde egunkariak atzoko alean kaleratutakoaren arabera, Bartzelona, Real Madrid, Betis eta Valentzia futbol taldeetako jokalariak Eufemiano Fuentes mediku ospetsuaren eskuetatik pasa omen ziren. Datuok 2005-2006ko denboraldiari dagozkionak omen dira.

Dirudienez egunkari honetako langileak Kanariar irletan Eufemianok duen bere egoitza nagusian aurkitzen diren dokumentuetan oinarritzen da notizia berri hau. Guardia Zibilak informazio hau ez edukitzearen arrazoi nagusia egoitza hau arakatu gabe utzi dutela da.

Operazioa abian jarri zenetik jakinarazi zen ez zeudela txirrindulariak soilik saltsa honetan nahastuta, beste hainbat kirolari ere bai. Continue reading ““Puerto”k ez du amaierarik”

Badakit gaia pare bat aste ingurukoa dela, baina gogo bizia nuen honetaz aritzeko eta denboraz justu bizi garen honetan, ez zait posible izan lehenago idaztea.

Orain hilabete batzuk adierazten nizuen nola Carmelo Barrio popularrak Espainiako Itzuliaren etaparen bat Euskal Herrian amaitzeko eskaria gauzatu nahi zuela Gasteizko legebiltzarrean. Eta hori izan da hain juxtu orain bi aste eztabaidatu zena eta onartu ez zena.

Ez onartzeko arrazoi nagusiak aurreko artikuluan azaldutakoa zen: Carmelok eta bere alderdiak politika eta kirola nahastu nahi izatea, beti ere beraien intereserako noski.

Nik neuk ere ez dut nahi Espainiako Itzulia Euskal Herrian izaterik nahi. Eta ez diot lurraldetasun ikuspegitik, kirol ikuspegitik baizik. Beharbada hau irakurrita harritu egingo zineten, baina seguru laster ulertuko duzuela.

Unipublic-ek antolatzen duen lasterketan gainontzekoetan bezala automatikoki parte hartzen duten taldeak eta gonbidatuak daude. Jakingo duzuen bezala aurtengoan zalantzak izan ziren ia Kaiku gonbidatua izango zen ala ez. Azkenean ezagutzen ez ditugun interesak tarteko, Kaikuren ordez Relax taldea izan zen gonbidatua. Hori guztia berria argitaratu zenerako Kaikuk lau etapa garaipen eskuratuta zituela: Valentziako Komunitateko itzuliko etapa bat, Errioxako itzuliko beste bat eta Asturiaskoan bi.

Dakizuen bezala Kaiku txirrindulari taldea eta Kaiku enpresaren arteko akordioak denboraldi honen amaiera arte zuten adostua kontratua. Iazkoa baino denboraldi hobea egin du taldeak eta beste babesleren bat topatzen saiatu bada ere, ezinezkoa izan zaio. Beraz, euskal taldea deuseztatua izan da.

Baina zergatik ez zen Kaiku Espainiako Itzulira gonbidatua izan? Relaxek baino meritu gehiago egin zituen, hori begi bistakoa izan da. Euskal taldea delako? Hau guztia kontuan izanda, nire ustez Unipublicek zerikusi handia izan du Kaiku taldearen etorkizuna erabakitzerako garaian. Hori dela, nik nahiago dut Espainiako Itzulia Euskal Herritik ez pasatzea. Hau bai dela nahikoa arrazoi Espainiako Itzuliaren aurka izateko, bai horixe!!