Bira 2013 : Emma-ren ordua

Azkenean bai! Bereganatu du Emma Johansson suediarrak bere kalitatearen mailako garaipen haundi bat. Lortu du Marianne Vos ahaltsuaren uztarritik askatzea. Bira hontan, profesional bezela lehen pedalkadak eman zituen errepideetan, berak eraman du aginte makila.

“Justizia”, “merezimendua” izan dira Biraren ostekoetan Emma-ri gehien zuzendutako hitzak. Eta ez alferrik, Vos-en tiraniapean bizitzen ikasi behar izan duen izar honek ahotsa noiz altsatuko zai izan bait gara luzaroan.

Johansson-en errebeldia ekintza hontaz aparte, eguraldi petralagatik ere gogoratuko degu aurtengo Bira. Zaila, okerragoa egitea. Zenbat eroriko, zenbat aldrebeskeri… test konplikatua kalitatea arroaka zerion tropelarentzat.

Eta Tropelak bere egutegian sartu zuen lehen Bira bezela ere gogoratuko degu. Euskal txirrindulari egutegiak, Itzulia eta Donostiako Klasikatik haratago, altxor ederrak gordetzen dituenaren seinale.

Izen propioekin jarraituz, Marianne Vos-ena aipatu behar. Haseratik esan genuen, galtzak bete lan izango zuela. Ibilbidea gogor xamarra da berarentzat eta daraman denboraldi astunak erasan diola dirudi (ia urtebete darama apenas atseden hartuta). Galtzaile izanda ere ordea, dizdira berezia damaio parte hartzen duen lasterketa orori. Vos etorri ez balitz, Johansson-en garaipenari ez genioke hainbesteko oihartzunik emango, hori seguru.

Elisa Longo Borghini-k ere merezi du bere tartea. 21 urte izateko, ezohiko heldutasuna eta sendotasuna azaltzen ditu. Urte osoan erakutsitakoari, irabazteko gaitasuna gehitu dio Bira hontan. Etorkizuneko txirrindularia zalantzarik gabe, aurtengo Giro Rosa-tik bertatik hasita, akaso.

Eta azkenik, podiuma osatu duen Evelyn Stevens amerikarra. Nahikoa egin du baldar moldatzen den egun euritsu zein jeitsiera umeletan aurrean izatearekin. Asko du hobetzeko lanabes duen txirrinduaren kontrolean, ziklismora berandu iritsia izaki eta horrek dezente mugatzen du Bira hau lehiatu den bezelako baldintzetan.

Banakakoak utzita, taldeei dagokinez:

  • Orica – AIS: Birako garaile haundia. Johansson-ek denboraldi hontarako taldez aldatzea erabaki zuenean, apustu potoloa egin zuen : “aurrerapausoa emateko, talde aldaketa baten beharra sumatzen dut” zion. Asmatu duelakoan nago, taldeak nola erantzun dion ikusita.
  • Rabobank Women: Ohi bezela, taldeak maila altua erakutsi du (3 txirrindulari lehen 8etan), baino errematatzaileek hutsegin diote oraingoan, arraroa bada ere: Vos zein Van Vleuten-ek. Stultiens-ek “hasiberrien” saria eramateak, taldeak harrobia ere zaintzen duela erakusten du.
  • Specialized: taldea pixkanaka bere piezak berreskuratzen ari da: aipatu dugu Stevens aitzinean. Worrack ere Biran berragertu da eta Van Dijk denboraldiaren lehen zatiko atsedenalditik bueltatzen ari da. Elkar hartzen dutenean, ta hori Giro Rosa-n gerta daiteke, erreferentzia izango dira.
  • Lointek: taldekakoan lortu duten 7. postua, lorpen itzela da, aurtengo denboraldiko lan aipagarriaren islada. Belén López top-10 etik kanpo gelditu izanak eta Eider Merino-k lehen euskaldunaren saria azken etapan galdu izanak minduko ditu akaso, baino harro egoteko moduan dira Jorge Sanz eta bere neskak.
  • Bizkaia Durango: zortearekin ez dabiltza lagun aurten eta Biran ere bizkarra eman die zoriak. Anna Sanchís-en inguruan moldatutako taldea, estratejia guztiz aldatu beharrean gertatu dira espainiarraren erorikoek baldintzatuta. Ane Santesteban-ek azken etapa dotore baten ondoren lortutako lehen euskaldunaren sariak, ziur alaitu dituela. Ea Giro Rosa-rako bidaia moldatzen duten eta Italia aldean zoriak irri egiten dien
  • Euskaldunen artean, Ane Santesteban eta Eider Merinoren arteko borroka hori izan da aipagarriena. Azkenean, lehia horrek emaitza ona izan du bientzat: Santestebanek top-20an meritu haundiko lekua lortu du eta Eider Merinok, 18 urterekin etorkizun aparta izan dezakela baieztatu du, taldea zein zaleok itxaropenez betez.

    Baldintzek lagundu ez arren, aurtengo edizioa ikusgarria suertatu da. Eskertzea besterik ez zait gelditzen: antolatzaileen lana alde batetik, eta txirrindulariena bestetik.

    Emma-ren ordua izan da gure eta bere diren errepideetan; munduko txirrindularitza hoberenarekin hitzordua.