Casper garaile, Hincapie lider berria eta Hushovd hospitalera

Hincapie prestu ibili da gaurkoan eta bonifikazioei esker, maillot horiaz jabetu da sprintean amaitu den etapan.Casper

Ihesaldi bat izan da gaurko etapan, 3. kilometroan abiatu dena. 7 kidez osatutako tropeltxo honetan, Unai Etxeberria zen tartean. Hala ere, sprinterrek gaurko etapa irabazteko zuten interesak, etapa amaierarako ihesaldia ezerezean utzi dute eta sprinta jokatu da.

Esan beharra dago sprinta nahiko arraro joan dela, eta askoren ezusterako, Casper frantziarra izan dela azkarrena. Hushovdek, berriz, ezbeharra izan du eta hospitalera eraman dute. Dirudienez, ikusle batek zuen publizitatea duen kartoizko esku ezagun horietako batekin besoan zauritu egin da. Sprinta jokatu ondoren odoletan etzanda izan da helmuga ondoreneko bidean.

Gerard Porte Tourreko mediku ofizialaren hitzetan eta lehen azterketa egin ostean, puntu batzuk beharko dituela argitu du eta lasterketan jarraitzeko moduan izango dela uste duela.

*** tropela.eus ***

Gaurkoan, Zeraingo ibani erabiltzailea izan dugu garaile 347 punturekin. Sailkapen metatuan ehtxok hartu du lehen postua 751 punturekin.

Amerikarrei aurre hartuz, Hushovd-entzat etapa eta lidergoa

Azkenean hasi da Tourra. Ea hemendik aurrera kirol arloaz eta gure lehiaketa ederraz soilik jarduteko aukerarik daukagun.

Thor Hushovd, lehen liderraTourrari dagokionez, esan 176 txirrindulari irten direla Estrasburgetik. Amerikarrak ziren prologo lau eta labur hau irabazteko faborito, David Zabriskie, batez ere. Baina ia beti gure adituari gertatzen zaion bezala, ez du asmatzen. Azkenean, Thor Hushovd norvegiarra, guretzat sprinterra dena nagusi eta bere atzetik bi amerikar, Hincapie eta Zabriskie. Kontuz ibili beharko dugu Discoveryko honekin, aurten dagoen mendi eskasiarekin sailkapen orokorrean aurrean buka dezakeenetako bat baita.

Bestalde, esprinter batek maillot horia janztean eta O’Grady, Boonen eta beste esprinter batzuk liderrarengandik gertu egotean lehen etapa lau hauetan, bonifikazio-segunduak lortzeko lehia gogorra aurrikusten da. Borroka polita ikusiko dugu eta ea Credit Agricoleko morroskoari maillot hori preziatua kentzeko gai diren. Kostako zaie. (Beno, ea zer dioen gure adituak datozen etapei begira…) Continue reading “Amerikarrei aurre hartuz, Hushovd-entzat etapa eta lidergoa”

Tourra hasi, hasiko da

PrentsaAzkenean gaur Tourra abiatuko dela dirudi. Azken 7 urteetako irabazlea, Lance Armstrong erretiratu ondoren Tour irekiago bat ikusiko genuela bazirudien, zer esanik ez atzoko eskandalu guztiarekin. Azkenean, Tourreko antolatzaileek Puerto operazioan susmagarri direnak kanporatzea erabaki zuen eta honela, iaz amerikarraren atzetik amaitu zuten hirurek (Basso, Ullrich eta Mancebo) etxerako bidea hartu zuten. Horiez gain, Sevilla (T-Mobile) eta Astaná-Wurth taldeko 5 txirrindulari (horien artean Joseba Beloki) ere kanporatuak izan ziren. Honela, Tourreko arauen arabera, talde batek 6 txirrindulari baino gutxiagorekin parte hartu ezin duenez, Astaná talde osoak etxerako bidea hartu behar izan zuen eta bertan Alexandre Vinokourov, iaz Tourrean 5. postuan amaitu zuena ere parte hartu ezinik geratu da. Beraz, iazko lehen bostak faltako dira Tourrean…

Azkenean, 2 talde oso (Comunidad Valenciana eta Astaná) eta 4 txirrindulari gutxiagorekin abiatuko da Tourra. Ea zenbat iristen dira Parisa.
Izen aldetik galera handia izan da Tourrarentzat baina ikuskizun aldetik, hain irekia egotean, oso erakargarria gerta daiteke aurtengo Tourra. Ikusiko dugu. Halere, aurtengo garaileari nork sinetsiko dio “garbi” dagoela?

Argazkian ikus daitekeen bezala, bai prentsa eta baita zalegoa ere azalpen gosez da eta horrek oraindik aurtengo Tourrari min handia egin diezaioke. Batez ere, oraindik azken operazio honetako paper guztiak ez direlako sekretupetik atera (kaxa bat falta omen da). Laster aterako dira, bai horixe… Kazetari batzuk ez dute horretarako beldurrik, nahiz eta errugabetasun presuntzioa zer den oso ongi jakin…

Larunbatean prologoa. Tourrik izango al dugu?

Ullrich motorra berotzenIazko salbuespena kontutan hartu gabe, aurten ere kilometro gutxiko erlojupeko batekin emango zaio hasiera Frantziako Tourrari. Txirrindularitza bera baino bere inguruko gaiei hitz egiten ari den momentu honetan, lasterketa ahalik eta azkarren hastea komeni dela ematen du. Oraindik ez dakigu Astana – Wurth taldea irteera lerroan izango den, eta beste txirrindulari asko ere zalantza dira; eta ezin esan hori berri ona denik. Ez naiz ari irten behar duten edo ez duten epaitzen, oraindik ez jakitea baizik.

7 Km lau dituen ibilbideak emango dio hasiera. Hain kilometro lauak izateak espezialistentzat aproposa dela esatera gonbida gaitzake, hala ere ikusi beharko da ibilbidea hiri erditik edo zuzenbide luzeetan egiten den. Modu batekoa izan edo bestekoa, hautagaien batzuk aldatzera eman baikaitzake. Continue reading “Larunbatean prologoa. Tourrik izango al dugu?”

Dudaz jositako 4 egun: kontu kinielarekin…

Jan UllrichGaur jakin dugu Tourreko antolakuntzak Astaná-Würth taldeari Tourrean parte ez hartzeko gonbitea luzatu diola. Saiz-en taldeak errekurtsoa aurkeztu du, eta bitartean badirudi Vinokurov Tourrean izateko talde baten bila hasi dela (gogoan izan berak ekarri zuela Astaná babesle bezala Libertyk taldea uztean).

Nahas-mahaste honek Jan Ullrich ere busti du, eta oraingoz aldarrikapen ofizialik ez badago ere itxuraz Tourrak T-Mobile taldeari Jan eta Oscar Sevilla gabe joateko eskatu die. Frogak argi izan gabe erabakiak hartzen ari dira eta txirrindularitza leku penagarri batetan gelditzen ari da: egunkarien lehen orrialdean, baina odolez jantzitako titularrekin. Eta guzti hau Tourra hasteko lau egun baino falta ez direnean.

Tropela Elkarteak dortsalak eguneratu ditu azken berrien arabera (Thomas Dekkerrek ere Tourrera ez joatea erabaki du, honek forma punturik aurkitu ez duelako), eta hurrengo egunetan joango gara gertakizunen ildoan erabakiak hartzen.

Gauzak horrela, ez ahaztu larunbata baino lehen kinielari begiratu bat ematea!