apirila 2006 – 2 orrialdea – Tropela.eus bloga

Euskal Herriko Itzulia Gomez Marchanterentzat

Inor gutxik espero lezakeen emaitza batekin amaitu da aurtengo Euskal Herriko Itzulia. Gomez Marchanteren garaipena ezustekoen artean sartzeko modukoa dela esan daiteke, nahiz eta 6 egunetan, gizonik indartsuena ez dakit baina indartsuenetako bat dela erakutsi digun. Orain arte ez zuen erlojupekoetan larunbatean erakutsitako mailarik agertu baina beste zenbait txirrindularirekin gertatu izan ohi den bezala, duen gaztetasunak bere akatsak hobetzeko astia ematen dio eta dirudienez aurtengo neguan Estatu Batuetan eginiko froga aerodinamikoek emaitza onak eman dituzte.

Bere atzetik Valverde sailkatu da. Honen kasuan ere pixka bat harrigarria lortutako emaitza. Asko ziren etapa bat edo bi irabazteko gai zela iragartzera ausartzen zirenak, gutxi ordea erlojupekoan eman zuen maila emango zuela aurreratzera ausartu zirenak.

Continue reading “Euskal Herriko Itzulia Gomez Marchanterentzat”

2006ko Euskal Herriko Itzulia ere amaitu da

Tropela Elkarteak landutako webgune honetan, aurtengo Euskal Herriko Itzulia antolatzeko erabakia hartu genuen. Izan dugun partehartzaile kopurua kontutan izanda, esan beharra dago antolatzeaz ez garela damutzen.

Lehiaketa honetan zarauztarrak eta azkoitiar bat izan ditugu podiumean: garailea eneko, bigarren txarli1 eta hirugarren HARITZ. Gustatuko litzaiguke sariren bat ematea bai aurreko postuetan amaitu dutenei baita parte hartu duzuen guztioi ere. Ez da izan saiatu ez garelako, gure nahietan baitzegoen sariren bat edo beste eskuratzea, baina ez da posible izan. Beraz, besterik ezean, gure zorionik beroenak aurreko postuetan izan zareten eta parte hartu duzuen guztioi.

Txirrindulari denboraldia aurrera doa eta berarekin tropela.eus ere bai. Hau hasi besterik ez da egin. Aurrera begira Italiako Giroa eta Frantziako Tourra ere antolatzekotan gara. Okerrik ezean, hobekuntzak burutu eta sariren bat edo beste inguratzekotan gara. Hala espero dugu behintzat.

Izan dezagun, beraz, aurtengoan ere txirrindularitzaz euskaraz gozatzeko parada! Noski, zuek guztiokin eta tropela.eus webgunean.

6. etapa: Zalla – Zalla

Aditua EH Itzulia Iritsi da aurtengo edizioko garailea ezagutzeko ordua! Hasera batetik pentsatze zen moduan azken eguneko erlojupekoa izango da bai irabazlea, bai podioa bereiziko duen etapa.

Aurtengo erlojupekoa gainera azken urteetako luzeena dugu. UCIk egun berean bi sektore egitea debekatu zuenez, erlojupekoarentzat egun oso bat gelditu zen eta horrekin batera bere luzera ere handiagoa izango dugu. Eztabaidatzeko beste gai bat izan daiteke baina ez zait iruditzen 24km-tako erlojupeko bat berdintzeko adinako mendirik izan denik, ez eta erraza izango litzaketenik Euskal Herriko mendateen ezaugarriak ezagututa halako mendi etaparik egiterik. Beti dago Urkiola, San Miguel de Aralar, Arrate edo antzerako mendate batean etapa amaituaz erlojupeko luze bat berdintzeko aukera baina pertsonalki, 24km gehiegizkoa iruditzen zait Euskal Herriko Itzuli batentzat.

Denek bi hautagai bakarrik aipatzen dituzte, Samuel Sanchez eta Alberto Contador. Egia da agian probako bi txirrindularirik onenak bezala agertu direla baina hain dira txikiak denen arteko diferentziak, ezin dudala ulertu zergatik ez diren kontutan hartzen beste zenbait txirrindulari: Evans, Azevedo, Rebellin, Sinkewitz, Vila…

Logikari jarraituz, Liberty taldeko hanka meharren alde egin beharko nuke, askotan erakutsi baitu erlojupekoak menperatzen dituela (gogoratu, urrutira joan gabe iazko garaipena) baina jende gehienaren iritziaren aurka Samuel Sanchez-gatik apustu egingo dut. Ez ditut bere erlojupeko on asko gogoratzen baina probako txirrindularirik sasoikoena dela erakutsi du, maillot horia soinean izango du eta bere bizilekua Enkarterriak izaki, etxean bezala sentiaraziko dute. Hau dena kontutan harturik Euskalteleko asturiarraren aldeko apustua egingo nuke.

Eta sailkapen nagusiarekin batera, www.tropela.eus webguneko porra ere erabakiko da. Hor ere kontuak estu daude eta puntu guztien beharra izango da porrako garaile izateko. Aupa “txarli1”, egin gogor kostako jende horri, jeje.

5. etapa: Gasteiz – Zalla

Aditua EH Itzulia Ari da Euskal Herriko Itzuliaren amaiera iristen eta oraindik ez dago batere argi zein izango diren podiumean izango diren txirrindulariak. Denbora tarte oso txikiak dira aurrenekoen artean eta behin honez gero larunbateko erlojupekora arte bere horretan jarraituko dutela uste dut.

5. etapak amaiera bihurri samarra izan arren ez zait iruditzen sailkapen nagusiko aurrenekoen artean diferentziak sortzeko adinakoa izango denik. Ziurrenik, izango dira oilarren arteko erasoak baina etapa honetan baino zailtasun handiagoek denbora tarterik lortu ez badute harritzekoa izango litzateke Avellaneda edo Beci bezalako mendatetxoetan hori lortzea.

Sailkapen nagusirako aukerarik ez duten txirrindulari batzuek osatutako ihesaldi batek bere helburua lortzeko agian etaparik aproposena dugu hau, hala ere, litekeena da azken kilometroetan, Freireren Rabobank edo Valverderen taldekideek esprinta ziurtatzeko ahaleginak egitea eta dakizuen bezala, tropelean esprintean iristeko aukera hartzen bada, ibilbidearen zailtasunak oztopatzen ez badu behintzat bere helburua lortzen duela.

Kuriositate gisa, adi egon etapako azken kilometroei, bereziki Avellaneda eta Beci mendateei, larunbateko erlojupekoan izango duten ibilbidea errepikatuko baitute.

Igandean Paris – Roubaix

Gehienok Euskal Herriko Itzuliari begira gauden honetan ez dugu ahaztu behar proba garrantzitsuak ari direla korritzen munduko beste parte batzutan. Esaterako atzo Gante – Wevelgem handia korritu zen, Thor Hushovd norvegiarraren garaipenarekin. Bertan elkar ikusi zuten igande honetan Paris – Roubaix lasterketa handian lehiatuko diren hautagai nagusienak.

Urteko lasterketarik “arraroenetakoa” dugu Paris – Roubaix klasiko handi hau. Milan – San Remo eta Flandriako Tourraren ondoren urteko hirugarren monumentua dugu honako hau. Denboraldia amaitu aurretik beste bi geratuko direlarik, Liege – Bastogne – Liege eta Lombardiako Giroa.

Betidanik esan izan da txirrindulari batek, horrela kontsideratua izateko bere kirol bizitzan behin bada ere Roubaixko belodromora iritsi beharko lukeela baina asko eta asko dira sentsazio hori ezagutzera iristen ez direnak. Continue reading “Igandean Paris – Roubaix”