Etiketa Artxiboak:Caisse d’Epargne

Azken bi etapak Caisse D’Epargneko bi euskaldunentzat

David LopezGustura izango da Eusebio Unzue. Igandean David Lopezek etapa garaipen bikaina lortu bazuen, gaurkoan Imanol Ervitik lortutakoa ez da gutxiagorako.

10 etapa jokatu dira aurtengo Espainiako Vueltan eta horietako hiru euskaldunek irabazi dituzte. Gainera gaur arte Igor Anton lasterketako lider izan da, baina tarteko helmugako gain sariei esker, Puritok liderraren maillota kendu dio.

Esan bezala, gaur Imanol Ervitiren garaipenarekin 3. euskal garaipena aurtengo Espainiako Vueltan. Gehiago izango direlakoan naiz. Zorionak guztiei!

2010eko Euskal Herriko Itzuliari begira

Samuel SanchezAurtengo EH Itzulian faltan izango denaren inguruan Gure Adituak jakinaren gainean jarri gintuen. Egia da Contadorrek izan duen egutegi aldaketak ez diola mesede askorik egiten lasterketari. Egia da UCIko lasterketa izanik ez duela larritzeko motiborik oraingoz, baina ez da denbora asko pasa Euskal Bizikleta desagertu zela. Gogoratzea baino ez nuen nahi.

Interes gehien dutenen artean Euskaltel-Euskadi taldea izango da. Galdeanok etxeko lasterketak eta Tourra jarri zituen helburu bezala eta Contador izango ez dela kontutan izanda, Samuel Sanchezekin ahalegin berezia egingo dutelakoan naiz.

Ez dakit Caisse D’Epargnetik zein izango diren lasterketan, baina Paris-Nizako podiumeko bikotea, Luis Leon Sanchez eta Valverde izango direla dirudi. Irabazteko lehian izango dira. Cobo ere ez ahaztu Caisse D’Epargnen dela eta 2007an lasterketa bereganatu zuela ezustean.

Blog honetan Liquigaseko talde buruez ere aritu zarete. Kreuziger izango da taldeburu nagusia zalantzarik gabe, baina Nibali ere sasoiko dago Milano-San Remon ikusi genuen bezala. Biak ere lasterketaren garaipenaren lehian arituko diren txirrindulariak iruditzen zaizkit.

Ez nuke zerrenda gehiegi luzatzerik nahi, baina aipatutakoez gain Evans, Schleck anaiak eta Cunego gehituko nituzke. Izen gehiago bere baditut buruan bueltaka, baina oraindik dortsalen zerrenda izan gabe hauekin geratuko nintzateke.

2010eko taldeen analisia (III): Caisse d’Epargne, berebiziko bidegurutzean

Talde aski ezaguna da Caisse d’Epargne, eta tropelean sustrairik zaharrenetakoak dauzkan egitura, 1980an profesionaletan estreinatu zen Reynolds taldearen oinordekoa baita. Eta oraindik orain, bere hastapenetako filosofia eta izan berdinak dauzka: itzuli handietan erreferentzia izatea.

valverde

Horixe berretsi baino ez du egiten euren buru eta izar handia den Alejandro Valverde hiru asteko gizon izatera bultzatzeak. Iazkoan azkenik Espainiako Itzulian gailentzea lortu zuela, aurten Paris-en podiuma zapaltzeko asmo betean da. Zale asko eta asko dira murtziarrarentzat helburu zailegia dela pentsatzen dutenak (ni neu euren artean), baina egia da bestalde palmaresa ederki loditurik duela, huts egiteak horrenbeste kalterik egingo ez liokeela.

Alabaina, bere aurreneko koxka, gogorrena akaso, ez du Rotterdam-eko atariarekin izango espainiarrak, ez eta aurreko lasterketekin egin beharreko prestakuntzan, oraindik Puerto Operazioarekin izan zuen ustezko loturak justiziaren aurrera deklaratzera eraman duen auziagatik baizik. Eta epaiaren zain, espainiarraz gain, talde osoa egongo da, zalantzarik gabe. Horri gainera multzoaren etorkizuna kolokan egotea gehitu behar zaio, orain egun gutxi jakin baitzen ofizialki euren babesle nagusiak ez duela eurekin jarraituko.

FRANCIA CICLISMO

Ez da justua taldea Valverde-rekin hasteaz batera bukatu egiten dela esatea, nazioarteko multzorik sendoenetakoa baita Caisse d’Epargne, baina zutabe aldaezina da euren liderra, zalantza izpirik gabe, eta bere inguruan altxatzen da gainerako egitura; euren mesedetan jardun ahal izateaz gain espainiarraren alde lan egin ohi duten txirrindulariz josia dago talde nafarra. Salbuespenetako bat, beren bigarren erreferentzia den Luis León Sánchez da. Eta kasu honetan ere, bere indarrak eta lasterketan azaldutako jokaerak besterik iradoki balezakete ere (berriki lehiatutako Down Under-eko Tourrean erdietsitako etapa garaipena horren lekuko), hiru astetako gizon bilakatzeko asmotan dira Eusebio Unzue eta konpainia. Txirrindulari ausart bezain ikusgarria; ikusteke da oraindik sabaia non ote duen.

Taldeko hirugarren murtziarra ere beste eginkizun batzuentzako zuzendurik dago, taldeko gizon azkar ia bakarra baita José Joaquín Rojas. Dena den, bere abiadurak munduko onenen artera eramaten ez duela jakinda, beste ezaugarri batzuk biltzen ditu berak, ibilbide zailagoetan aukera gehiago aurkitu ohi duelarik. Hala ere, bere iparraldeko lasterketetarako zaletasunari so eginda, talderik egokienean ez dela pentsatzea ez da okerregia.

cobo

Eta ia horrarte ailegatzen da Caisse d’Epargne-k bete lezakeen espektroa. Taldeak askoz gehiago dauka, baina itzulietan maila ematen duen profila betetzen duena ia bere osotasunean. Batzuk talde buru izateko aukeraren batekin, beste batzuek ia bat bera ere ez. Hurrengo mailan, progresioagatik baino ez bada ere, Rigoberto Uran kolonbiar gazte dohatsua aurki genezake, oraindik nazioarteko erreferentzia izan gabe, izar handia izateko ezaugarriak izan badituena. Mauricio Soler herkidea ere Giroan gizon garrantzitsu izateko fitxatuko zuten seguru asko, eta berarekin batera, ondo bidean Juanjo Cobo-k ere, bere talentuari erreparatuz gero behintzat, behar luke leku batean edo bestean lider izateko aukerarik. Italian beste buru bat David Arroyo izango dela pentsa liteke, azkeneko urteotako ohiturari jarraiki, nahiz eta gerora bestelako eginkizunak ezarriko dizkioten.

marzio

Akaso Rubén Plaza izan liteke aste bakarreko lasterketaren bat lehiatzeko moduan, baina oro har gainontzeko taldeak Valverdek Frantziako Tourreko podiumerako jauzia eman nahi horretan osatutako multzoa dirudi. Egin kontu: Marzio Bruseghin (honek ere Giroan behar luke) eta Christophe Moreau zakur zaharrak fitxatu berritan, Vasil Kiryienka Bielorrusiako mando nekaezina euren artean, eta baita alor pertsonalean protagonismoa galduz dihoan José Iván Gutiérrez erlojuz kontrakoaren espezialista ere, besteak beste. Eta horiekin batera, bakoitza bere eginkizunekin, talde nafarrean diren lau euskal herritarrak: Txente Garcia hilezkorra, bere ondorengoa dirudien Imanol Erviti, Xabier Zandio talde-lagun aparta, eta David Lopez eskalatzaile fina.

Aurrez aipatutako batzuk (Uran eta Rojas kasu) ere oraindik gazteak badira ere, alor honetan zailtze bidean diren beste gizon batzuk ere aipatu behar dira. Hauen artean, Rui Costa portugaldarra da esanguratsuena, iazkoan ezertan bereziki nabarmendu gabe eremu guztietan ongi molda daitekeela erakutsi zuena. Gizon indartsua izateaz gain, erlojuaren aurkakoan sendoa, mendian gora ez da gaizki moldatzen, hortaz aurten derrigorrean jarraitu beharreko gizonetako bat dugu. Costa Ricako Andrey Amador-ek ere hasiera batean antzeko txirrindularia dirudi, nahiz eta bere garapenak motelagoa dirudien, Ángel Madrazo espainiarrarekin gertatzen den bezalaxe.

Esan bezala, tropeleko talderik indartsuenetakoa da Caisse d’Epargne, bai banan-banan zein talde gisa hartuta. Alabaina, Martxoa aldera jakingo den epaiak esango du taldeak bide beretik jarraituko duen, multzo handi xamarra Valverde-ren eginkizunetara kateaturik dela, edo guzti horiek beren aukerak jorratzeko modurik izango duten. Bigarren kasu honetan, epaiak Valverde errudun joko balu alegia, Joaquim Rodriguez eta Dani Moreno jada taldean ez izatea, Oscar Pereiro-z gain, antzemango lukete seguru asko, kataluniarraren kasuan batik-bat. Badaezpada, iazko Espainiako Itzuliko garailea denboraldi hasieran ohikoa baino gehiago lehiatuko dela dirudi. Hortik aurrerakoak, ikusi behar. Edozein kasutan ere, Unzue-renek ez dute lo hartzerik, ez inongo gertakariren zain egoterik, egiturak bere horretan jarraituko badu.

Galdera ikur ugari beraz aurtengoan taldearen inguruan. Erantzunak, datozen hilabeteotan.

“Ikuskizunaren mesedetan”

Honela azaltzen zuen Espainiako Vueltako zuzendarietako batek larunbateko 57 erreskatatuen arrazoia.
Sierra Nevadan amaitutako etapa, aurretik Monachil igo ondoren, oso gogorra suertatu zen. Etapa ikusi zuenak argi asko daki hori. Minutadak galdu zituzten txirrindulari askok, baina ziur oraindik ere batzuk ez duzuela entzun benetan gertatutakoa kontrolez kanpo iritsi ziren 57 txirrindulariekin. Izan ere, ez du oihartzun handirik izan lasterketa jarraitzen ari diren komunikabideetan. Euskadi Irratiaren bidez ohartu nintzen ni behintzat.
Caisse D'Epargne

Asteleheneko ihesaldiko 13 txirrindularietatik 6 kontrolez kanpo iritsi ziren larunbatean. 31 minutu t’erdira iritsi ziren, kontrol itxiera 30:45ean zegoenean (etapako irabazle izan zen Moncoutieren denboraren %10). Epaileek %14ra igo zuten portzentaia (43:07) eta denak lasterketan jarraitzeko aukera izango zuten.

Tartean daude izen handiko txirrindulariak, kasuan Roels alemaniarra, Velits eslovakiarra, edo eta Iglinsky kazakhstandarra.

Zenbait datu interesgarri aipatzera noa ea nola 57 txirrindulari hauek influentzi txiki edo handia izango ote duten lasterketan.
Panderako gainean bigarren postuan sailkatu zen Fulgsang kontrolez kanpo iritsi zen Sierra Nevadan. 12 segundoko gain saria Samuel Sánchezek jasoko zituen, eta Ezequiel Mosqueran aldiz 8 segundokoa.

Columbia taldeak 6 taldekide galduko zituen, tartean Greipel, atzoko etapako garailea (iadanik 3 etapa) eta hurrengo sprintetan hautagai nagusia, eta baita Henderson ere, hau ere etapa garailea aurtengo Vueltan. Ciolek, Bozic eta Hesjedal era kanpoan lirateke.

Garmin taldeak ere 6 taldekide galduko lituzke, eta Danielson eta Martinekin geratuko lirateke soilik.
Ikaragarria.

Eta sailkapen nagusiari begira?? Ba ote dago ezkutuko gizon garrantzitsurik?? Ba bai. Lasterketako lider eta hautagai nagusi den Alejandro Valverderen 3 taldekide iritsi ziren kontrolez kanpo: Txente Garcia, Fran Perez eta Imanol Erviti euskalduna. 3 gizon oso garrantzitsu batik bat geratzen den azken aste honetarako, izan ere beste taldekideak iaioagoak dira aldapa zerura begira jartzen denean. Caisse d’Epargne ahaltsuari beraz laguntza bikaina eman diote azken sailkapen nagusi horri begira. Rabobankek adibidez ez zuen taldekiderik 57 horien artean. Breukink gozo dabil.

Argi dago Valverde dela aurtengo Vueltako hautagai nagusia. Lasterketa hasi denetik da gainera. Eta momentuz indartsuena ere bera da. Beretzat eginiko Vuelta da, eta badirudi gainera antolakuntzaren laguntza ezkutua ere baduela, Esku beltzen bat ote dago Valverderen interesak bermatzen?? Ez da lehen aldia izanen…
“Ikuskizunaren mesedetan hartu dugu erabakia, ez inoren mesedetan”. Abraham Olano eta Javier Guillén Vueltako zuzendari nagusiaren hitzak dira.

Konklusioak norberak atera ditzala…

P.D.: portzierto, Mosquerari 20’’ tako zigorra eman diote Panderako etapan bide ertzean zegoen afizionatu batek emandako ur botila bat hartzeagatik. “Legeak denei berdin aplikatu behar zaizkie” diote lasterketako zuzendariek. Seguru??

Velosok garaipena Xorret del Catin

Veloso. 2009ko Vueltako 9. etapan garaipenaEtapa jarraitzeko aukera izan duzuenok ados izango zarete aspergarria izan dela diodanean Xorret del Cati igotzen hasi diren arte. Ihesaldia aurretik eta atzetik 6 minututik gorako atzerapenarekin tropela. Eskerrak Xorret del Catin sua piztu eta faboritoen arteko lehia ikusi dugun. Etapa garaipena Velosorentzat izan da eta faboritoen artean nagusi Valverde, Vueltako lider berria.

Hasiera hasieratik izan dira mugimenduak tropelean ihesaldia sortzeko eta lortu dutenak Veloso, Taaramae, De la Fuente, Ramirez Abeja, Marzano, Devolder eta Sanchez Pimienta izan dira. Esan bezala tarte handiak izan dituzte tropelarekiko eta Xorret del Cati igotzen hasi arte eutsi ahal izan diote.

Azken 8 kilometroetan Taaramae, Marzano, Veloso eta De la Fuente mugitu dira. Gainontzeko iheskideek jada ezin zioten erritmoari jarraitu 180 kilometro egin eta gero. Laukote honetan indartsuen Taaramae izan da. Hasieran Marzano eta De la Fuentek jarraitzeko saiakera egin dute baina ezin. Cofidiseko estoniarrak hasieran tartea irekitzea zuen helburu eta gero eustea, baina Xorret del Catiko ia %20ko maldek ia aurrera egin ezinda utzi dute. Momenturen batean bazirudien hanka lurrean jarri beharrean izango zela. Atzetik, tarte batera baina erritmo egokiagoan, Marzano eta Veloso zetozkion eta Taaramae harrapatzeko gauza izan dira. Xacobeko galiziarra, ordea, italiarra baino indartsuago zen eta aurrera egitea lortu du helmugaratu den arte. Merezitako garaipena Velosok lortu duena. Taaramaek txakalaldi galanta izan du eta azkenean 8’47”ra helmugaratu da.

Atzean faboritoak ez zeuden lo hartzeko. Kiriyenka eta gainontzeko Caisse D’Epargneko talde kideak lanerako zituen Valverdek. Rodriguezek aurrera egin du tropel nagusitik beranduago Valverdek erasoa jo eta hurrengo metroetan laguntzeko. Halaxe egin du murtziarrak, baina liderraren maillota eskuratzeko ahaleginean, Evans eta Bassok ederki erantzun diote eta uneoro Silence-Lotoko eta Liquigaseko liderrak bere gurpilean izan ditu. Bitartean Samuel Sanchez ez zen faboritoen artean ikusten.

Dakizuen bezala lehen 3 postuentzako gain-sariak daude eta horiek behar zituen Valverdek Evansi 2 segundoko tartea kendu ahal izateko gurpiletik atera ezin zuela ikusita. Dagoeneko Veloso helmugaratua zen, baita Marzano ere. Hirugarren postua behar zuen murtziarrak. Helmuga Xorret del Cati gainetik 3 kilometrora izanik, jaitsiera azkarra egin du Valverdek eta helmugaratzerako orduan De la Fuente harrapatzeko gauza izan da gainontzeko faboritoan gurpilean zituela. Nahi duzuena esango duzue, baina garbi garbi, De la Fuentek Valverde esprinta egiten ari zela ikusi duenean hanka jaso du 8 segundoko gain-saria, eta beraz, lidergoa jaso zezan. Eztabaidarako gaia zalantzarik gabe.

Gaurko etaparen ostean Valverde da lider berria, 2. Evans 7 segundora eta 3. Gesink 37ra. Samuel Sanchezek gaurko atzeraldiaren ondorioz, 6 posturaino atzeratu da.

Lehen euskaldunari dagokionez, Haimar Zubeldiak jarraitzen du 9. postuan, atzo baino postu bat atzerago.

Guztiek Valverde lider nahi dute

Gaurkoan bi gauza ikusi ditut eztabaida gai jarri nahiko nituzkeenak. Alde batetik De la Fuentek hanka jaso izana Valverdek gain saria jaso zezan (nik hori ikusi dut behintzat). Ulertzekoa alde batetik Matxinen txirrindulariak egin duena, baina bestaldetik, Evansi dagokionez, itsusi samarra. Adi izango naiz australiarrak gaiaren inguruan esaten dituenez, ziur bainaiz esango dituela.

Bigarrenik helmugan antolatzaileek Valverde eta De la Fuenteren artean segundo bat izan dela jarri dute. Evansi De la Fuenteren denbora bera eman diote. Zuek horrela ikusi al duzue? Nire ustez zalantzarik gabe Valverde eta De la Fuenteren artean segundo bat egon bada (nik ez dut ikusi segundo hori) beste horrenbeste beharko zukeen De la Fuente eta Evansen tropeltxoaren artean. Sailkapenak ikusterakoan, zinez, honek harrituta utzi nauela. Garbi da, bai, Murtziara sartzerako Valverdek bai ala bai urrezko maillota izan zezan interes asko daudela, nire iritzi apalean behintzat.