Mobi-Bike eguna: haur minbizidunak laguntzeko eguna bizikletaz Zarautzen

Mobi-bike eguna. AspanogiIgande honetarako Aspanogik (Gipuzkoako Haur Minbizidunen Gurasoen Elkartea) Mobi-bike eguna antolatu du. Jai giroan eta bizikleten bueltan egun berezi hau ospatuko da Zarautzen eta ateratzen duten diru guztia elkartearentzako izango da.

Bizikletari lotutako eguna izango da batez ere igandekoa, bizikleta eta etxeko txikienak lotzen dituena: BTT ibilaldia izango da, Zarauzko I. triatloi txikia, bizikletaz aritzeko zirkuitu ezberdinak eta bizikletaz Zarautz inguruetan aritzeko aukera. Arratsalderako Pirritx, Porrotx eta Marimototx-en ekitalddia ere izango da (emankizunerako sarrera ordaindu beharko da).

Ekitaldi honetan Orbea Orca bizikleta bat zozketatuko da. Horretarako euro bateko salneurrian txartelak daude salgai. Tropela Elkartea Mobi-Bike egunari bere atxikimendua adierazten dio eta Tropela.net-eko erabiltzaileen artean bizikleta honen zozketarako 20 txartel zozketatuko ditugu. Txartelak eskuratzeko Twitter bidez zuen mezuak bidali beharko dituzue egun honen inguruko aipamenen bat eginez. Ez ahaztu #tropela eta #mobibike etiketak txertatzea mezuan bestela ez baitzarete zozketan sartuko. Mezuak bidaltzeko epea larunbat eguerdiko 14:00tan amaituko da. Garaileak zein izango diren larunbat arratsaldean emango dugu jakitera Twitter bidez.

Igandean egun polit bat izango denaren esperantzan ondo pasatzera gonbidatzen zaituztegu Zarautzera.

Amets Txurrukak Taiwan Cup 2010 irabazi du

Amets Txurrukaren garaipena Taiwanen

Berriki jokatu da Taiwan Cup 2010. Mundu mailako txirrindulari onenek 6km kriterium bat eta 210km-tako bide lasterketa bat ziren jokatzekoak, baina tifoi batek irla asiarreko planak aldatzera eraman ditu antolatzaileak. Eguraldia hobetu denean lasterketa motz baina gogorra antolatu dute Ametsek berak dioen bezala.

Hemen gehitzen dizuet Ametsek hitzetan etaparen nondik norakoak. Zorionak Amets!!

Amets Txurrukaren kronika Taiwanetik

“Badirudi tifoiak atseden hartu duela (“Taichung” inguru honetan behinik behin) eta horrenbestez guri egokitu zaigu atsedena eten eta lanean hastea! Esan bezala atzo laku inguruan bueltatxo bat eman ondoren Orbeak Taiwanen daukan ordezkariarekin ibili ginen inguruak ezagutzen. Berak ezagutarazi zigun, gaurko egunerako, antolakuntzak “Taiwan Cup”-ari alternatiba bat eman nahi ziola eta agian irla honetako mendaterik altuenera igoera antolatuko zutela. Bai antolatu ere! 700m tan atera eta 3275m arte igotzen duen mendatera igoera antolatu dute: hau mendatetzarra! “Wu-ling” mendatearen hasierako kilometroak nahiko etzanak dira baina gerora edarto gogortzen dira eta oxigenoa faltan nabaritzen den 3000m gorako altuera horretara iristeko 52km egin beharra dago! Azken kilometroak errepide estua dela eta antolatzaileek 2200m inguruan jarri dute helmuga eta bertan saritxo batzuk ere bai. Ez da hasieran pentsatuta zuten lasterketa baina egoera nolakoa izan den ikusita irtenbide gogor bezain polita. Esandako hasierako kilometrotan eraso saiakerak ugariak izan badira ere, maldan gora egin beharreko kilometro mordo horrek erabaki du gora iristeko ordena. Igoera erdi aldera Tadej Valjavec, frantziar igotzaile gazte bat eta hirurok geratu gara buruan. Hemengo Orbeako ordezkari eta nire abenturakide Xeberren animoekin aurrera jo eta Taiwan Cup-eko pankartapean lehendabizi pasatzea lortu dugu. Munduaren bestalde honetara arte etorri behar pankartape batean lehendabiziko pasatu ahal izateko? Hau da marka gero! Valjavec iritsi da bigarren eta frantziarra ondoren. Sariak jaso ondoren, puntu horretatik gorengo puntura arte zer geratzen den ikustera joan gara kotxez eta ikaragarria nolako gogorra den ditxosozko “Wu-ling” hau! Interesgarria bestalde, 3000m-tik gora nolako landaredia dagoen oraindik, dena berde berdea! Klima sub-tropikal honek paisaia ikusgarriak eskaintzen ditu mendate garai horietatik! Indarrak berreskuratzeko, berriz ere, dozena bat plater inguruko jatordu ederra egin (platerak txikitxoak dira, ez pentsa, eh!) eta turismoa egiteko prest gara! Bizikleta “Art Ticiano Lin” (Orbea Taiwaneko) gure lagunari entregatu eta bera konpondu dadila aurrerantzean! Orain bai, oporretan gaude eta eguraldiak ere errespetatzen gaituenez azkenera arte disfrutatzen saiatuko gara!

Amets Txurruka”

Argazkia: Fundacioneuskadi.com

2011ko Itzuli Handien ibilbideak (II). Italiako Giroa

Tourraren ibilbidea aurkeztu eta egun gutxira, Italiako Giroaren ordua izan da. Larunbatean aurkeztu dute italiarrentzat hain maitatua den txirrindularitza proba. giro11

Beti gertatzen den moduan, aurkeztu aurretik baziren ibilbideari buruzko zurrumurru batzuk kalean baina egia esateko, gehiegizkoa iruditzen zitzaidan esaten ari zen guztia edizio bakarrean izatea eta zailtasunean “mozketak” espero nituen. Baina iritsi zen larunbata, eta zurrumurru guztiak goitik behera bete dira, hau da, beldurgarrizko gogortasuna izango duen edizio baten aurrean gaude. Agian, nik itzuli handiak jarraitzen ditudanetik ezagutu dudan gogorrena.

Azken urteetan Italiako Giroaren ibilbideak ikusgarritzat jo daitezke. Egia da Italiako orografiak asko laguntzen diola lan horretan baina egia da baita ere, bere zuzendaria den Angelo Zomegnan-ek izaera gogorra eta ausardia erakutsi duela, iazko Montalcinoko etaparen ondoren jaso zituen kritiken ondoren, aurten ere “sterrato”ko kilometro mordoxka bat ipini baititu eta orokorrean etapen luzera mozteko ohitura orokortzen ari den garai honetan, sekulako kilometrotze pila izango dituztelako.

Tourrean bezala, hemen ere erlojupeko kilometro gehiago botatzen ditut faltan baina, egia esateko, ez dakit zenbat kilometro beharko liratekeen ibilbidea orekatua dela esateko. Izan ere, hain da beldurgarria datorren urterako prestatu duten mendiko anoa!!! bestalde, nire esku egon balitz, mendateetan bukatzen diren hainbeste etapa izan beharrean, behean bukatu edo mendate errazago batean bukatzen direnen alde egingo nukeen. Bi puntu hauetxek ikusten ditut ibilbide ikusgarri hau hobetzeko modukoak.

Aurreneko aste zoragarri batekin hasiko da Giroa. Taldekako erlojupekoak emango dio hasiera eta ondoren sprinterrentzat eta amaieran tranpak izango dituzten etapak nahastuko dira. Ez dugu Cavendish 5 etapetan eskuak igota ikusteko arrisku handirik. Izan ere, aurreneko asteko Rapallo, Orvieto, Fiuggi Terme, Montevergine eta Etnako amaierak ikusi ondoren, hasiera ikusgarri baten aurrean gaudela esan daiteke.

Eta hortik aurrera zer? zailtasuna gutxitu beharrean goraka joango da. Sekulako “astakeria” da 13, 14 eta 15 etapetako profiletan ikusten dena, ikaragarria!!! 15. etapa hori istorian paper gainean prestatu den 5 etaparik gogorrenetakoa izan daiteke.

Horren ondoren atseden eguna izango dute eta hobe dute ondo aprobetxatzea, hortik Milanera bidean ez baitute askoz aukera gehiagorik izango. Nevegal-go kronoigoera, Sondriora Tonale eta Aprica igota, San Pellegrinora Passo Ganda igota, Mottarone eta Macugnagako etapa eta Finestre eta Sestriereko etapa izango baitituzte Milango 32,8 kmko erlojupekoaren aurretik. Amaiera beldurgarria benetan!!

Ez nuen uste ni hau esatera iritsiko nintzenik baina “gehiegizkoa” dela iruditzen zait. Dena dela, gauza bat garbi dago, jendeak mugitzeko asmorik agertzen ez badu ere, ibilbidea bera arduratuko da helmugan txirrindulari multzo txikiak ikustearekin. Biziraupen proba bat bihurtu daiteke datorren urteko Giroa. Dudarik gabe, datorren urtean ere atentzio gehiena emango diodan itzuli handia hauxe izango da, Italiako Giroa. W il Giro!!!

Contador: “Txirrindularitzan sartzen zarenean Erregeak gurasoak direla konturatzen zarenean bezala da. Desilusio bera da”

Contadorri eginiko ongi etorri ekitaldia. PintoOraintxe ikusi dut Marca.com-en bere amari egindako elkarrizketatxo batean Contadorrek hitz hauek nola esan zizkion adierazten. Egia esanda ez dakit nondik hartu adierazpenok. Zuek ideiarik bai?

Contadorren kasuaren ebazpenaren zain nago. Asko ari da atzeratzen eta ez dakit ba hori zenbaterainoko ona den.

Bitartean kasuaren inguruko informazio ezberdinen berri jasotzen ari gara. Alde batetik VIAR operazioa dugu. Dakizuen bezala operazio honetan 34 pertsona atxilotu dituzte tartean albaitariak eta txirrindulari bat. Dirudienez zerabilten klenbuterola lasterketako zaldiak bizitzeko zen, baina ez dirudi kontsumorako abereetan erabili denik. Hala ere esanguratsua deritzot operazio honen nondik norakoak egun hauetan aireratzea.

Horretaz gain Contadorrek Oviedoko Criteriumean parte hartu ala ez eztabaidagai aurkitzen da. Hasiera batean Pintokoa joango zela adierazi zen. Beranduago ez zela joango esan omen zuen eta azkena Espainiako txirrindulari federazioak esandakoa da. Honen esanetan legalki ez dago inongo eragozpenik Contador Oviedoko Criteriumean izateko ez UCI ez eta WADAk ere ez baitie inolako zigorren berririk eman. Legalki, beraz, Contador Oviedon izan daitekeela dirudi. Nire ustez, ordea, ebazpena ematen ez den bitartean Pintokoa agerraldi publikoak ekiditen saiatuko da; nik behintzat hori egingo nuke bere lekuan.

Eta amaitzeko Pinto herriak Contadorri ematen ari zaion baldintzarik gabeko babesa aipatuko nuke. Post honen hasierako Contadorren amaren adierazpenak atzo egin zen ekitaldikoak dira. Ez da lehen ekitaldia izan eta ez da azkena izango ere. Hori bai, Marca.com-eko iruzkinak irakurrita badirudi ez duela babes gehiegirik txirrindulari zaleen artean Pintokoak.

Argazkia: picapp.com

2011ko Itzuli Handien ibilbideak (I). Frantziako Tourra

tour11Aurkeztu berri dute Parisen, 2011.ko lehen itzuli handiaren ibilbidea, Frantziako Tourrarena. Hurrengo aurkezpena Italiako Giroarena izango da eta azkena Espainiako Vueltak izan da.

Azken urteetako ibilbideek ez naute gehiegi betetzen. Beti daude salbuespenak baina orokorrean ibilbide kaskarrak iruditzen zaizkit, batez ere Frantziako Tourrekoak inongo berrikuntzarik gabekoak (eta izaten direnak txarrerako) eta Espainiako Vueltakoak, oso zailtasun gutxiko mendiko etapekin. Urtero gehien gustatzen zaizkidanak Italiako Girokoak izaten dira, nahiz eta aspaldian mendizaleen alde agian gehiegi egiten ari diren eta agian nahiko desorekatuak izaten diren. Izango dugu Italiako Giroko eta Espainiako Vueltako ibilbideen berri emateko astia, goazen orain Frantziako Tourrarekin.

“Berrikuntza” batekin hasiko da hurrengo urteko Tourra, ez baitugu hainbeste aldiz ikusitako aitzin etaparik izango. Aldapatxo baten amaitzen den etapa batekin emango zaio hasiera, aurreneko mailot horia lortzeko aukera betiko erlojupekariengandik zabaltzeko asmoarekin. Ez zait gaizki iruditzen puntu hau, ez baitago zertan urteak joan, urteak etorri, Cancellara bezalako bat beti aurreneko maillot horiarekin ikusi beharrik.

Bigarren egunean taldekako erlojupekoa izango da. Aurreneko denbora tarteak izango dira baina 23km bakarrik direla kontuan harturik, ezin esan taldearen garrantzia bere bizikoa izango denik aurtengo Tourra irabazteko. Hortik aurrera, sprinterako aukera mordoxka bat, agian 4.n etapakoa salbuespen izanik, mendiaren zain.

8. etapan izango dugu aurreneko mendatetxoa, Superbessen izango den amaierarekin. Dena dela, indartsuenen arteko sprinta besterik ez da espero bertan.

Pirinioetan sartuko gara ondoren eta agian nire ustez aurtengo etapa erregina izango denarekin emango zaio hasiera 2011ko mendiari. Hourquette, Tourmalet eta Luz Ardiden dituen etapa hauxe izan daiteke gogorrena baina mendiko aurrenekoa izateak ezer gutxi ikusiko dugun beldurra ematen dit. Lourdesen amaituko den etapa ez dut kontatzen nik mendikotzat eta hurrengo egunean Plateau de Beillen amaituko dena izango dugu.

Datorren urtean Alpeen 100. urteurrena izango dela eta, asko espero zen mendi horiengandik baina zer esango dizuet ba, ni ez naute inondik ere bete. Pineroloko etapan, aurretik aipatzen ziren aukeren aldean erraza jarri dute. Galibierren amaitzen den etapan, ondo diseinatuta egon ez arren, bertan izango diren menditzarrek (Agnello, Izoard eta Galibier alde “errazetik”) sortuko dituzte denbora tarteak. Izoardetik Galibierren hasierara km askoko tartea izango da eta horrek urrutitik etapa gogortzeko aukerak txikiagotu egiten ditu baina azken mendatean denbora tarteak izango direla uste dut. Hurrengo egunean, 109km soikeko etapa. Egia da bertan Galibier Telegrapheko aldetik eta Alpe d’Huez izango dituztela baina kilometro kopuru hori gazteentzako aproposagoa iruditzen zait.

Azken larunbatean 41 km-ko erlojupekoa zain izango dute eta horrekin Tourra amaitutzat emateko moduan izango gara.

Ibilbidea hau orokorrean baloratu beharko banu, 10tik 4 puntu emango nizkioke. Aldaketatxo bakar batekin, mendiaren aurretik 50km inguruko erlojupeko bat gehitze hutsarekin, nire nota 8ko batera igoko nukeen (orokorrean ibilbideak km gutxi izaten jarraituko lukeelako). Aldaketa txikia dirudi nota hainbeste igotzeko baina nire ustez beharrezkoa zen ikuskizuna erabat aldatzeko.

Ibilbidea planteatu den moduan, mendizaleek ez dute azken kilometroek arte mugitzeko beharrik izango eta horrek, ikuskizun eza dakar. Zenbat aldatuko litzatekeen mendiaren aurretik ganorazko erlojupeko bat izan ezkero Menchov, Leipheimer, Kloden… bezalako txirrindulari batzuk erlojupekoan lortutako denbora tartea gordetzeko asmotan eta mendizaleak denbora tarte hori mozteko asmotan izango lirateke mendiko etapak. Alde ederra!!!

Bestalde, ez nator bat azken aldiko ibilbideen etapen luzerarekin. Ezin dut onartu munduko iraupen luzeko txirrindulari onena izendatu behar lukeen proban, azken 12 etapetan bakarra izatea 190 km-tik gorakoa. Ez da hau nik 90. hamarkadan ikusten nuena, eta egia esan, hori zen niri gustatzen zitzaidan txirrindularitza. Frantziako Tourrak denetik izan behar luke, harbidea, erlojupeko kilometro asko, mendi asko, “media-montaña” asko… eta ez da hau aspaldian ikusten ari garen ibilbidea. Penagarria!!