Hauek dira aurtengo Espainiako Vuelta lehiatuko duten bi txirrindulariak nire ustez ezbeharrik gertatzen ez bazaie behintzat. Gaurko etapan Puritok denbora ikaragarri galdu du eta Peter Velitsek, berriz, ikaragarrizko erlojupekoa eginda etapa eta sailkapen nagusian hirugarren postuan sartzea lortu du. Purito bostgarren aurkitzen da Frank Schlecken atzetik.
Italiarra eta galiziarra, beraz, aurrez aurre. 39 segundoko tarteak bereizten ditu biak italiarraren alde. Bihar eta etziko etapak arazorik gabe pasatzea izango dute helburu larunbatean Bola del Mundoko etapan duten guztia emateko lasterketa irabazteko.
Ni gaurkoan harrituta geratu naiz Mosqueraren erlojuaren aurkako lanarekin. Egia da Nibalik zulatua izan duela eta horrek denbora galarazi diola, baina egoera bikainean jarri da galiziarra. Lehia bizia ikusiko dugula uste dut eta apusturen bat egitekotan Mosqueraren alde egingo nuke. Ez galdetu zergatik.
Podiuma oraindik erabaki gabe dagoela iruditzen zait. Peter Velits sartu da baina Frank Schleck, Purito eta, zergatik ez, Tondo saiatuko dira eslovakiarrarekiko duten 1’45”eko atzerapena jaten podiumean sartzeko.
Larunbateko etaparen zain geratzen gara oraindik asko baitugu ikusteko.
Pena da. Handia gainera. Espainiako Vuelta bero -bero dagoen honetan, Igor Antonek etxerako bidea hartu behar izan du. Nire adiskide batek Euskaltel Euskadiko txirrindulariaren sasoiak berotuta edo, gogorarazi zidan aurreko batean duela bi urteko Vuelta, Anglirura bidean erori izan ez balitz, Contador estu har zezakeela. Batek daki. Kontuak kontu, aurten bai bazirudiela bere Vuelta izan zitekeela, baina berriz ere eroriko batek bere bidea eten egin du. Galdakaoko igotzaileak erorikoa izan du helmugatik zazpi bat kilometrora, txirrindulariak azken aldapari ekiteko pronto zeudela. Niri Joseba Belokiren Tourreko erorikoa etorri zait burura, nahiz eta hura larriagoa izan zen. Baita Abraham Olanorena 1999ko Vueltan; saihetsa hautsita igo zuen Angliru, baina handik egun gutxira erretiratu zen.