Hilabetekako Artxiboak:abendua 2009

Txirrindulariak lotu ezinda

Evans 2009ko munduko txapeldunaHala gertatu zaie Garmin, Silence-Lotto, Katusha eta Saxo Bank taldeei Wiggins, Evans, Swift eta Kolobnev txirrindulariekin. Lau txirrindulari hauek beraien taldeekin 2010erako ere lotuta bazeuden ere, kontratu hori albo batera utzi eta taldez aldatu dute. Badirudi txirrindularitzan sinatutako kontratuak berme gutxiegi ematen diela taldeei.

Egia esanda kasu hauetan txirrindulariek isilean egin dute talde aldaketa, zenbait kasutan taldeko managerrek talde aldaketaz prentsatik jakin dutelarik. UCIk honen inguruan araudi bat badu ere, kasu hauetan bezala, txirrindulariei ihesbidea ematen diela argi geratu da.

UCIk, gertakari hauek ikusita, legedia hobetzeko jarrera erakutsi dute holakorik etorkizunean gerta ez dadin. Beraien esanetan, asmoa bai taldearen baita txirrindularien eskubideak bermatzea da. McQuaid-en esanetan, egungo araudiak ez omen du horrelako talde aldaketarik egiten uzten: orduan nola da posible gutxienez lau txirrindulari hauek taldez aldatzea era honetan?

2010erako ez da aldaketarik aurre ikusten denborarik ez baitute, baina ondorengoetarako araudian lanean hasiko omen dira. Beti bezala txirrindulari “potoloak” protagonista izan arte eta zalaparta sortu arte inork ez du behatzik ere mugitzen.

Radio Shack, 2010ko Talde Erakargarriena?

Armstrong Radio Shack maillot berriarekinArgi dago 2010an Radio Shack izango dela talde jarraituena edo erakargarrienetako bat.

Alde batetik, nola ez, 2009ko txirrindularirik “mediatikoena” bertan delako, 7 Tourren garaile den Lance Armstrong. Bestalde, inguruan izango dituen taldekideak ere hala nolako “Dream Team”a osatzen dutelako: Lepheimer, Klöden, Haimar Zubeldia…

Astana taldearekin eta konkretuago Contadorrekin Tourrean izango den “pike”aren zain dago txirrindularitza profesionala jarraitzen duen oro. Gerra moduko bat izango dela dirudi.

Hurrengo denboraldian erabiliko duten maillota ere aurkeztu dute estatubatuarrek. Eta esan beharra dago, honetan ere iaioak direla hauek. Gorri zuri eta gris konbinazio politarekin, ziur naiz hurrengo urtean Euskal Herriko errepideetan ere asko ikusiko dugula maillot hau.

2010ko Talde Erakargarriena al da? Bai ala ez?

Argazkia: @lancearmstrong

Milramek ur botila biodegradagarriak erabiliko ditu

Ur botilak bide bazterreanAsko kexatu omen dira txirrindulariek bide bazterraren ur botilak botatzen dituztelako. Ez da harritzekoa, asko baitira botatzen diren botilak. Egoera horren aurrean bi aukera daude: ur botila horiek ez botatzea hurrengo lasterketaren batean erabiltzeko (zailagoa dela dirudi) edo botila biodegradagarriak egitea.

Hori da Milramen babesle kide den Tacx etxeak egin duena. Hurrengo urterako botila biodegradagarriak ekoiztuko ditu bide bazterrean geratu arren denborarekin ingurumenean degradatuko direnak. Polietilenozko botilatxoak izango omen dira eta urte bat eta 5en artean degradatzen omen dira. Esan bezala, botilatxoak gordetzea baino hobea dela dirudi bide bazterrera botatzea 5 urtera arte bertan egon badaitezke ere.

Aurrera pausua dela esan beharko dugu. Kontutan hartu behar da txirrindulari talde bakoitzak 20.000 eta 30.000 botila artean erabiltzen dituela denboraldi bakoitzean. Kantitate hau dauden talde kopuruaz biderkatuta, ez al dira askotxo bide bazterrean geratzen diren botilak?

Argazkia: http://cormacphoto.wordpress.com/

Astana eta Pereiroren arteko “zirkoa”

Oscar PereiroHala iruditzen zait. Ez dakit Pereiro zer dabilen azken aldi honetan, baina badirudi atzeko atetik utziko duela txirrindularitza. Beharbada ez da bere errua izango, baina egia esan 2006ko Tourra irabazi zuenetik, gauzak zuzen ez zaizkiola joan esango nuke.

Prentsaurreko bat eman berri du orain egun gutxi Astanakin duen egoera zaila plazaratzeko. Dirudienez azaroaren 12an kontratu bat sinatu zuten bi aldeek 2010erako, baina Astana taldeak aurrekontuarekin bat ez zetorren kontratua izan dela argudiatuz ordaindu beharreko diru kantitatea berriro negoziatzeko asmoa helarazi omen zion txirrindulari galiziarrari. Honek dagoeneko nahikoa jaitsi duela kantitatea kontratua sinatzerako eta ez dagoela ezer negoziatzeko prest. Zalantzarik gabe hau hala bada, galiziarrarekin erabat bat egiten dut.

Zailtasun hauen aurrean Pereirok txirrindularitza uzteko unera iristen ari dela esan zuen. Hau bai ez zaidala harritzekoa egiten. Dakizuen bezala aurtengo Tourra utzi egin zuen eta Vueltan lehiatzeko asmoa adierazi bazuen ere, azkenean Unzuek ez zuen 9ko taldean sartu. Esan bezala, galiziarra atzeko atetik joango dela dirudi.

Astana taldeari dagokionez, aurreko post batean esaten nuen bezala, badirudi oraingoz urte hasierako mamu horiek ez direla desagertu. Oraingoan ere gai ilunak talde kazakhstandarraren inguruan.

Romain Sicarden debuta Australian

Romain SicardEuskaltel-Euskadi taldea Derion izan da kontzentratuta aste honetan zehar. Kontzentrazio honetan zenbaiti hurrengo urteko egutegia zehaztu diote eta horien artean Romain Sicard txirrindulari gaztea agertzen da. Dakizuen bezala, Sicard 23 urtez azpiko egungo munduko txapelduna da.

Hazparneko txirrindulari gazteak Tour Down Under Australiako lasterketan egingo du debuta. Gainera taldeburu gisa aurkeztu dute. Ez dakit ez ote den goizegi Romaini horrenbesteko ardura emateko, baina hori Euskaltel-Euskadi taldeko zuzendariek jakingo dute.

Edonola ere, urtarrilak 17tik 24ra jokatuko den Tour Down Underrean hasiko da Euskaltel-Euskadi taldearen 2010ko denboraldia. 2003an Mikel Astarlozak irabazi zuen lasterketa hau Ag2r taldean zela. Beharbada talde laranja lasterketa irabazteko gai izan daiteke. Ikusiko dugu.