Hilabetekako Artxiboak:abuztua 2009

Gaurko esprintean beste esprinter bat garaile: Henderson

Henderson. Vueltako 3. etapan garaipena

Ez da izan Cavendish. Ohituak gaude Columbia-HTCko esprinterren batek irabazten duenean Cavendish dela pentsatzen, argazkia jarri izan ditugun askoren antzekoa baita, baina ingelesa ez da Vueltan. Hori bai, Columbia-HTCk gaurkoan argi utzi du esprinter on bat baino gehiago dituela taldean.

Espero bezala gaurko etapako irabazlea ere esprintean erabaki da. Askok Boonen, Farrar, Ciolek edo Bennatiren urrezko maillotaren goseak garaipena hauen artean izango zela pentsatu dugu, baina ezustekoa emanda, Hendersonek eskuratu du garaipena.

Etapa hasieran hirukote batek osatu du gaurko ihesaldia: Rosendo, Hoogerland eta Boomek. Bi holandar eta espainiarrek kilometro askotan ihes eginda izan dira, baina gaur ere tropela ez zegoen ihesaldirik onartzeko. 30 km-ren faltan begi bistan izan du tropelak hirukotea eta horretaz ohartuta, Boomek amore ematea erabaki du. Rosendok, berriz, ez zuen amore emateko asmorik eta hasieran Hoogerland berarekin zuela eta beranduago bakarrik, 15 km inguru egin ditu tropelaren aurretik. Ahalegindu da Anducia CajaSur-eko txirrindularia, baina alferrik zen.

Gaurkoan ere abiadura handia hartu du tropelak, baina atzokoan ez bezala, txirrindulariek zuhurtzia gehiagoz hartu dutelako edo, ez da erorikorik izan. Azken metroetan bazirudien Vacansoleil taldeak Bozic-i garaipena eskura jarri diola, baina ez da gauza izan abiadura mantentzeko eta Hendersonek aurre hartuaz etapa garaipena eskuratu du. Gaurkoan Freire hobeto ibili da eta hirugarren sailkatu da.

Garbi dago esprintetan ez dagoela faborito garbirik (Cavendish falta delako behar bada?). Zalantzarik gabe, egoera honek mesede gehien Cancellarari berari egiten dio, helmugan diren gain-sariak txirrindulari ezberdinen artean banatzen ari baitira eta horrela ez dira gauza lidergoa kentzeko. Horrenbestez, hirugarren egunez jarraian Cancellarak lasterketako lider jarraitzen du pronostiko askoren kontra.

Biharko etapan lasterketa Holandatik Belgikara pasako da. Bi herrialde hauetan zehar egin behar duten ibilbidean 4. mailako hiru mendate igaro beharko dituzte. Horrek etapa ehiztariei txanda etor dakiekeela pentsa arazten digu. Hala eta guztiz ere, ikusi beharko da esprinterren taldeek zein jarrera hartzen duten.

Ciolek gaur esprinterrik azkarrena

Ciolek. Vueltako 2. etapan garaipena

Espero bezala, gaurko etapa esprintean erabaki da. Guztiok begiak Boonen edo Farrar-i begira genituen etapa amaierako gain sariei esker hauek baitziren Cancellarari maillota ken ziezaioketen bakarrak. Azkenean, suitzarraren pozerako, Ciolek-ek eskuratu du etapa garaipena. Sabatini gertu izan du eta hirugarren, atzerago, Hammond sailkatu da.

Etaparen hasieran ihesaldi bat osatu da. Tropeltxoa Martinez Perez, Leezer, Roels, Garcia Da Pena eta Westra txirrindulariek osatu dute. Txirrindulari hauetatik sailkapenean aurreratuena Westra izanik eta 4 minutu t’erdiko tartea izateraino iritsi direlarik, bera izan da etaparen une askotan lasterketako lider birtuala.

Esprinterrek ezin zuten aukera galtzen utzi, batez ere Boonen eta Farrar-ek, esan bezala, liderraren maillota eskuratzeko aukerak baitzituzten gaurkoan. Garmin eta Quick Step-eko ihesaldia kontrolpean izan dute eta helmugarako 15 kilometroren faltan, tropelak ihesaldia irentsi du.

Vacansoleil taldeak atzo Mourisekin itxura ona eman bazuten, gaur Westrak protagonismoa bereganatu nahi izan du. Dirudienez 26 urteko txirrindulariak etapan zehar behin behineko lider izateak indarrak eman dizkio, eta azken kilometroetan beste saiakera bati ekin dio. Tropeletik ihes egin du egunean bigarren aldiz, eta tropelaren baimenarekin, 50 segundoko errenta izateraino iritsi da. Hala esprinterren taldeek kontrolpean izan dute saiakera hori eta helmugarako hamar kilometroren falta berriro harrapatu dute. Esprinta, beraz, bermatua zen azken kilometroetan.

Esprinterren taldeek beren espezialistak bideratzen izan dira. Hauetan lehena saiatzen Boonen izan da, baina azkarregi ekin dio (urrezko maillotak itsututa edo) eta bukaerarako indarrik gabe geratu da. Azkarrena, berriz, Ciolek izan da. Bigarren Sabatini italiarra, askok Bennatirekin nahastu dutena, eta hirugarren Hammond.

Erorikoa azken kilometroetan

Helmugatik 3,2 km ingurura eroriko bat izan eta horrek tropelean mozketa eragin du. Mozketak zenbait faboritori eragin die, Cunego, Samuel Sanchez, Vinokourov eta Tondo besteak beste. Moztutako taldea 18 segundora helmugaratu da eta nola erorikoa azken 3 km-etatik kanpo izan den, atzerapenek eragin egingo du gaurko sailkapenean.

Euskaltel-Euskadik Madariagak esan duenez errekurtsoa aurkeztu du gertakari honen aurrean denbora tartea kontutan hartu ez zedin, baina arauzko 3 km-etatik kanpo izan denez, errekurtsoa bertan behera geratu da. Talde laranjari, beraz, 18 segundo galdu izanak sailkapen nagusian min egin diola dirudi.

Cancellara motoen pare

Cancellara. Vueltako 1. etapan garaipenaBai, egia da. Beharbada gehiegizko konparazioa izan da, baina suitzarrak 4,8 km-tako motoak aritzen diren zirkuituan azkarrena bera dela erakutsi du 54km/h bataz-besteko abiadurarekin. Motoen zirkuituan bihurguneak ere etzan-etzan eginda eman ditu. Zalantzarik gabe erlojuaren aurkako espezialista bikaina da Cancellara eta gaur ere hala erakutsi du.

Bazirudien protagonista euriak izan behar zuela. Erlojupekoa 15:30ak inguruan hasi da eta lehen irten direnei lur lehorra egokitu zaie eta horien artean denborarik onena markatzen Kreuziger izan da 5’37”ko markarekin.

Euria hasi du eta lurzorua asko busti da eta TVEkoek transmisioari ekin diotenean nabarmen ikusten zen txirrindulariak ez zeudela arriskatzeko. Horren adibide Barredok irteerako maldan izan duen erorikoa. Hala ere, faborito nagusiak irten aurretik, eguraldiak hobera egin du eta lasterketarako prestatutako zirkuitua izaki, azkar lehortu da beranduago irten diren txirrindularien mesedetan.

Lur lehor horretaz aprobetxatzen lehena Mouris izan da. Vacansoleil taldeko txirrindulariak ezustekoa eman eta 3 segundoz hobetu du txekiarraren marka. Kontuan hartzekoa lehen etapa honetan Vacansoleil taldeko kideak egin duena, izan ere taldea holandarra Vueltak gonbidatutakoa baita. Hasiera ona hauentzat.

Eguraldia hobera zioan eta faboritoak zirkuituari ekiten hasi dira. Erlojupeko laburra izanik begik esprinterretan jarriak nituen, hauek gaitasuna baitute denbora gutxian esfortzu handiak egiteko. Horren adibide Bennati izan da, Mouris eta Kreuzigerren artean sailkatu baita. Beranduago zen, ordea, Boonen flandestarra lanak bukatzekoa eta bikain aritu da Quick Step-ekoa. Denborarik onena markatzera iritsi da, 5’29”. Ez nuen uste Boonen hain ondo ibiliko zenik, baina gaurko etapari gogotsu ekin dio zalantzarik gabe.

Farrar zen hurrengoa iristen. Estatu Batuarrak garaipen aunitz eskuratu ditu azken egunetan eta oso motibatuta zetorren. Bere helburuetako bat gaur urre koloreko maillota janztea zen, baina Boonengandik 3 segundora helmugaratu da. Sailkapen nagusikok txirrindulariek denbora onak egin dituzte, baina ez etapa irabazteko modukoak espero zen bezala. Aipatutako txirrindulariak helmugaratuak zirela, Cancellara jotzen zen denbora hobetzeko hautagai.

Esan bezala, kilometro gutxiko erlojuaren kontrako lana izaki, garaipena esprinterren artean izango zela uste handiagoa nuen Cancellara berarengan baino. Baina argi dago oker nintzela. Cancellarak izugarrizko erlojupekoa egin eta 9 segundotan hobetu du Boonenen denbora. Merezimendu osoz beretzat etapa garaipena eta lasterketako lidergoa.

Sailkapen nagusiko faboritoei dagokienez, gaurkoa trantsizio egun bat besterik ez da izan eta postuetan alde handiak egon badaitezke ere, denborei dagokienez tarteak ez dira nabarmenak. Beraz, esan daiteke, aurrerago ala atzerago, guztiak espero bezala aritu direla. Hori bai, nabarmentzekoa Liquigasek emandako erakustaldia, lehen 10 postuetan lau txirrindulari sailkatu baitira.

Euskaldunei dagokionez, Imanol Erviti, David Herrero eta Markel Irizarren lanak gogoratu nahiko nituzke, 16, 17 eta 23. postuetan sailkatu baitira.

8000 kinielatik gora 2009ko Vueltan

8141 kiniela, Espainiako Vueltan inoizko markaKiniela egiteko epea bukatu berri da eta 8000 kinielatik gora egin dira, 8141 hain justu. Inoizko parte hartzerik handiena, beraz, Espainiako Vuelta batean Tropela.net-eko lehiaketan izango duguna. Guztioi lan talde osoaren izenean eskerrak eman nahi dizkizuegu lehiaketa honetan ere parte hartzeagatik.

Gogoratu zenbait sari ere izango direla Espainiako Vueltaren lehiaketa honetan eta Sariak atalean begira ditzakezuela.

Orain irailak 20 bitartean Vueltaz gozatzea besterik ez dugu.

Zorte on guztioi eta gozatu!

Vuelta hasteko bezperan ibilbideari begira

2009ko Espainiako Vuelta24 ordu eskas falta da 2009ko Espainiako Vuelta hasteko. Badirudi dagoeneko txirrindulariak prest daudela Holandako parajeetan edizio berri honi ekiteko.

Abraham Olano eta bere lankideek aurtengo Vuelta Holanda, Belgika eta Espainiako errepideetan jokatzea erabaki dute. Biharko hasiera Assenen jokatuko den erlojupeko motza izango da (4,8km) ingurukoa, esprinterrentzat egokia urrezko maillota janzteko. Erlojupekoa arratsaldeko 15:30ak aldera hasiko da eta azken txirrindulariaren helmugaratzea arratsaldeko 19:00etarako aurre ikusten da.

Holandan 2. eta 3. etapak jokatuko dira, lehena Assen eta Emmen artean, eta bigarrena Zuphen eta Venlo artean. Etapa hauek ia laua dira eta esprinterrentzako egokiak dirudite. 4. etapa Holandako Venlo eta Belgikako Liège herri ezagunean amaituko da. Etapa honetan 4. mailako mendate batzuk sartu dituzte, beraz, pentsa daiteke klasikoetan bezala ihesaldiren batek erabakiko duela etapa honetako garailea.

Asteazkenez atseden eguna izango dute txirrindulariek, Belgikatik Espainiara egin behar baitute “salto”. Garbi dago ibilbideak eskatuta hartu dutela egun hau atseden egun gisa eta zalantzarik gabe txirrindularientzat goizegi izan daiteke.

5. eta 6. etapak mediterraneo kostaldean jokatuko diren bi etapa  izango dira, bata Tarragona eta Vinaròs artean eta bestea Xàtiva inguruan.  Vinaròsen amaituko den etapan 2. mailako mendate bat igo beharko dute, baina etapa hasieran denez, ez zait iruditzen esprinterren taldeek etapa hau ihesaldiren bati oparitzeko izango direnik. Xàtivan jokatuko denak, berriz, 3. mailako hiru mendate izanik, ihesaldientzako aproposa dela deritzot. Ikusi beharko da.

7. etapan beste erlojupeko bat jokatuko da. Oraingo hau Valentzian izango da eta 30km distantzia izango duena. Erabat laua izaki, Cancellara bezalako espezialistentzat egokia ikusten dut.

Irailak 6 igandez hasiko dira mendiko etapak. Bigarren aste honetan 2009ko Vueltako mendiko etapa garrantzitsuenak pilatu dituzte eta badirudi Vueltaren garailea aste honetan bertan erabakiko dela. Alicanteko probintzian aurkitzen den Alto de Aitana izango da sailkapen nagusian eragiten hasiko den lehen igoera. 8. etapa amaiera bertan izango da 3. mailako 4 eta 2. mailako 3 mendate igo eta gero. 18 km inguruko igoera izango eta etapa amaieran bertan izaki, faboritoek beren indarrak erakutsi beharko dituztelakoan naiz.

9. etapak Alicanten bertan jarraituko du. Etapa hau ere menditsua da eta helmuga baino lehenago 1. mailako mendate bat igo beharko dute, Xorret de Cati gaina. Hau sailkapen nagusiko txirrindularientzat baino ihesaldi edota mendiko maillotaren lehian arituko direnen artean izango da interesgarri.

10. etapa trantsiziozko etapa bat izan daiteke. Ez dauka berezitasun gehiegirik Alicante eta Murtzia batuko dituen etapa honek ez bada azken kilometroetan dagoen 2. mailako mendatea. Mendate hau helmugatik 12 km ingurura dago eta kalte egingo die esprinterrei etaparen garaipenaren lehian zalantzarik gabe.

11. etapa azken atseden egunaren aurretik jokatuko da Murtzia eta Caravaca de la Cruz artean. Irteeratik 50 km-tara 1. mailako mendate bat aurkitzen da eta honek ihesaldiak sortzen lagunduko duela uste dut. Eguneko ihesaldia ondo antolatzen bada etapa garaipenaren lehian izan daitezkeela deritzot.

Ostegunean atseden hartuko dute txirrindulariek, beharko duten atsedena. Lasterketa lider denak hurrengo hiru egunetan jasan beharko dituen erasoetarako indarrak errekuperatzeko beharrezko izango du, eta berdin urrezko maillot horren atzetik dabiltzanek, indar guztiak beharko baitituzte hiru etapa horiei etekina ateratzeko. Hiru etapa hauek amaierak goian izango dituzte: lehena Velefiqueren gainean erabakiko da, bigarrena Sierra Nevada gainean eta hirugarrena Sierra de la Pandera gainean. Lehen bi etapak 170 km ingurukoak dira eta azken hau (beharbada txirrindulariek pilatuta izango duten nekea kontutan hartuta edo) 152 km-takoa. Abraham Olano eta bere taldeak, beraz, Almeria, Granada eta Jaenen jokatuko diren hiru etapa hauetan sailkapena erabakitzeko moduko etapak prestatu dituzte. Iraileko bigarren asteburua gorriz markatu beharrean izango gara ibilbide hau ikusita.

Vueltak izango dituen bi atseden egunak agortuta, astelehenean ere aurrera jarraitu beharko du tropelak. Esan bezala, nire ustez ordurako sailkapen nagusiko posturik garrantzitsuenak erabakita izan daitezke. 3. asteko lehen etapatan esprinterrak eta oraindik garaipenik eskuratu ez duten taldeetako iheslariak izango dira.

Oraindik sailkapen nagusian postuak aurreratu nahi dituztenek ostegun eta ostiralean jokatuko diren 18 eta 19. etapak erabil ditzakete horretarako, baina etekina atera nahi badute lasterketa asko gogortu beharko dutela iruditzen zait eta hori, itzuliko azken egunak direla kontutan izanda eta indarrak sobran izango ez direnez, zail iruditzen zait. Hori bai, mendiko maillotaren lehian dihardutenek ezin dituzte bi etapa hauek alferrik galdu.

Madrila iritsi bezperan, Vueltako hirugarren eta azken erlojupekoa jokatuko da. 27,8 km-tako neurketa izango da Toledon. Distantzia motz xamarra sailkapen nagusiari begira zerbait egin nahi bada, baina hori denbora tarteen araberakoa izango da. Lasterketaren nondik norakoaren arabera, erlojupeko hau zirraragarria ala tramite hutsa izan daiteke, eta zoritxarrez, interes gehiegirik piztuko ez duelakoan nago.

Igandean, irailak 20ean iritsiko da Vuelta Madrileko kaleetara. Itzuli handietan egin ohi den bezala, hiriburuan sei itzuli eman beharreko zirkuitu bat prestatu dute. Zalantzarik gabe esprinterrek beraien gaitasunak erakusteko azken etapa izango da. Lasterketako liderrak, berriz, ospakizunez eta podiumean jartzen dioten ereserkia egokia den ala ez ziurtatzeaz besterik ez du arduratu beharko.

Ikuskizuna hastear dago. Kinielak prest? Ba zorte on guztioi!